Dios ja̧’a̧ o’ca juiyönä Aditinömä. ’Cuäopönä kö̧, yoröiso hua’ö icuocö (1 Timoteo 1:17). Pidettötä icha’a adihuä huȩnȩmä̧ Dios I̧huȩnȩ Isä’tänä räopömä (1 Timoteo 1:11). Ta̧’cua̧rö̧ iyina’attö, Ja̧u̧ru̧tä̧ tucuota pä’ö ja̧’a̧, Chutä hueötä tadita pä’ö ja̧’a̧. Apocalipsis 4:11 ucuocui.

Diosmä isoppa hua̧, Ja̧u̧ru̧ topömä ya̧tȩ’i̧nä̧ toa’a. Diosmä ujututtu’inä abonänö rö̧ȩnä̧ ju̧ru̧hua̧, ujutumä juiyupätöjä redä’ca i̧sa̧ppȩttö̧ adicuotö ta’attö (Juan 1:18; 4:24). Chutä aditinöttö topö Ja̧u̧ru̧ tu̧huo̧juä̧chö̧’a̧nö̧ ja̧’a̧. Huȩnȩtö̧ pähuä, rö̧ȩnä̧ u̧hua̧ju̧’i̧nä̧, ȩ’u̧ a̧’cua̧cu̧nä̧’i̧nä̧ aditinö, pi̧yȩnä̧ i̧jȩpö̧ rö̧ȩnä̧ repeä̧u̧jä̧ pä’ö, rö̧ȩnä̧ huo̧jua̧ pä’ö’inä. Ja̧’hua̧ta̧nö̧, mo̧ro̧jä̧nä̧ ka̧cu̧ o’ca juiyönä totomenä i̧jȩpä̧u̧jä̧ rö̧ȩnä̧ ujuru ku̧nä̧rö̧ pä’ö. Romanos 1:20 ucuocui.

Ja̧’hua̧ta̧nö̧ Diosrö tu̧huo̧ju̧’a̧nö̧ ja̧’a̧ Dios I̧huȩnȩ Isä’tänä tucuocuomenä. ¿Tta̧’a̧nö̧ toa’attö Dios ttö̧ja̧rö̧mä̧? ¿Däje öjö’cönä toa’attö? ¿Däje öjö’cö juiyönä toa’attö? ¿Däje jȩa̧’a̧ttö̧ suronä jȩtto̧mȩnä̧mä̧? Pi̧yȩmä̧ jiähua’a I̧huȩnȩ Isä’tänätä. 1 Juan 1:9; 4:8 ucuocui.

Jesús pä’inödo: “Tä’o Dios, mo̧ro̧jä̧ra̧’a̧ kö̧jä̧. Ucu cui̧mi̧mä̧ adihuä cui̧mi̧ pä’ö ttucuotaja” (Mateo 6:9). Ja̧’hua̧nö̧ ja̧’a̧ttö̧, ttö̧ja̧ i̧mi̧cu̧nä̧ otta’anä, Chutä katä i̧mi̧ ku̧nä̧rö̧ tti̧huȩnȩ pö̧nä̧. Huo̧ttö̧ja̧ tti̧huȩnȩnä̧mä̧ Dios i̧mi̧mä̧ mi̧cua̧ “Jeohua”. Säbäräri tti̧huȩnȩnä̧mä̧ Dios i̧mi̧mä̧ mi̧cua̧ “Jehová”. Säbärärittö, yotöcunämä o’ätö “Yavé” pä’ö. Salmo 83:18 ucuocui (yi’täcunämä räopa’a 82:19⁠nä).

Dios I̧huȩnȩ Isä’tä tti̧huȩnȩ pö̧nä̧ huȩyu̧tu̧ rättepomenä, Dios i̧mi̧mä̧ pärotö icuinätö, Tö̧ä̧nä̧hua̧, Tu̧ru̧hua̧ pä’ö huȩyu̧ti̧nä̧tö̧. Dios I̧huȩnȩ Isä’tä äcuomenä tti̧huȩyu̧ti̧nö̧ pä̧nä̧mä̧, siete milnö jo̧mȩnä̧ abonänö räopina’a Dios i̧mi̧mä̧.  Jesús ttö̧ja̧rö̧ Dios ötö’cö jähuä u̧huo̧juȩto̧mȩnä̧mä̧ ’cuäopönä Dios i̧mi̧ o’inödo. Juan 12:28 ucuocui.

Jeohua ujuturu iso päi’önä repeöttömä, ¿tta̧’a̧nö̧ pä’ö jaroa’attö ubara ttuta’anämä? Yotöcunä pä’ätö Dios ttö̧ja̧rö̧ suronä jȩpö̧, ka̧cuä̧mö̧ toa pä’ö. Pi̧yȩmä̧ yapare ja̧’a̧. Santiago 1:13 ucuocui.

Jeohuamä ja̧’a̧tä̧ topö ujuturutä pä̧huä̧ rö̧jö̧ jȩta̧’a̧nä̧. Ja̧’hua̧nö̧ ja̧’a̧nä̧ Chutä päö ta’anötä jȩta̧ pä’ö ja̧’a̧ (Romanos 12:2). Recuätö ttö̧ja̧mä̧ ttamönä ttöjö’comenä ka̧cuä̧tö̧, ja̧’hua̧nö̧ ja̧’a̧ttö̧ rö̧ȩnä̧ ubara ttuhuähuä ka̧’a̧. Pi̧yȩ tomenä Jeohuamä rö̧ȩnä̧ a̧’cua̧ tta̧’ȩcu̧. Hechos 7:34 ucuocui.

Jeohuamä rö̧ȩnä̧ repeä̧u̧jä̧, pä̧huä̧ rö̧jä̧cu̧ eseunu tö̧ja̧ pä’ö. Yodojinänö ubara ttuhuähuä’inä, ttö̧ja̧ suronä jȩttö̧’i̧nä̧ si’epö i̧cuä̧cua̧. Pi̧yȩ ’cuäopome jubö jaropö ubara ttuta’anä, pi̧yȩ täcö tö’cöhuächa’a. Huo̧jui̧cuä̧ 8nä pi̧yȩ ötö’cö jähuä jiähuäcua’a. 2 Pedro 2:9; 3:7, 13 ucuocui.

Jeohuamä ja̧’a̧tä̧ topö Churutä ucuocu tötö’cöhuächa’anä. Ja̧u̧mä̧ ya̧tȩ pö̧nä̧rö̧ a̧mö̧cuä̧rö̧ (Juan 9:31). Ja̧’hua̧ta̧nö̧ pä̧huä̧ rö̧jä̧cu̧ suronä jȩtö̧ unichi’a pä’ö, tami ’cuätö tu̧ju̧nä̧ra̧’a̧nä̧ Diosrö pä̧huä̧ rö̧jö̧ jȩpö̧ tujuruhuächomenä, Ja̧u̧mä̧ eseunu topö. Ja̧’hua̧nö̧ ja̧’a̧ttö̧, suronä jȩä̧cuä̧huä̧ tu̧ju̧nä̧ra̧’a̧nä̧ Dios ahuaruhuä huotö päi’önä tö̧jö̧’a̧nö̧ ja̧’a̧. Santiago 4:8 ucuocui.

Ta̧’cua̧rö̧ iya’attö korottö’inä abonänö Diosrö repeta pä’ö ja̧’a̧ (Marcos 12:30). Dios ötö’cö jähuä tu̧huo̧jui̧’o̧mȩnä̧’i̧nä̧, Chutä hueö ta’anö jȩto̧mȩnä̧’i̧nä̧ i̧jȩpä̧tö̧jä̧ Churutä repe’ätöjä pä’ö. Pi̧yȩ jȩto̧mȩnä̧ Dios ahuaruhuä päti’äcuotöjä. 1 Timoteo 2:4; 1 Juan 5:3 ucuocui.