Ttö̧ja̧ pi̧jä̧nä̧ ka̧cuä̧tö̧ttö̧’i̧nä̧ Jesúsmä i̧mi̧cu̧nä̧ huinödo, pidemä pi̧jä̧ rȩjȩttö̧ uhuäpächäcua’a ä’canämä, mo̧ro̧jä̧ra̧’a̧ttö̧mä̧ espíritu huinödo (Juan 17:5). Jeohua o’ca juiyö aditäcua’a ä’canä, äcuomenäji aditinäcumä Jesústä ji̧na̧’a̧, pidetä ji̧na̧’a̧ Jeohuarö ppä’ädinömä o’ca juiyö adita pä’ö. Dios piderö katätä aditinödo, ja̧’hua̧nö̧ ja̧’a̧ttö̧ Dios I̧huȩnȩ Isä’tänä Dios I̧tti̧ “Chu ä̧cua̧” pättäcu (Juan 1:14). Ja̧’hua̧ta̧nö̧ ttu̧huo̧juä̧cu̧ “Dios I̧huȩnȩ” pä’ö, Jä’o i̧mi̧nä̧ ucuocuina’attö. Juan 1:2, 3; Hebreos 1:2 ucuocui.

Dios I̧tti̧rö̧ pi̧jä̧ rȩjȩra̧’a̧ hue’inödo. Pi̧yȩ ’cuäopa pä’ömä, Diosmä yajute judío isaju uborö jerupäjuttu, María pä’ö micuajuru ku̧cuä̧ba̧ jacuä, Jesús a̧’cua̧rö̧ ȩnö̧ ku̧ni̧nö̧do. Ja̧’hua̧nö̧ ja̧’a̧ttö̧ pide Jesús Jä’omä ttö̧ja̧ i̧sa̧ jo̧ca̧’a̧ ji̧na̧’a̧do (Lucas 1:30-35). Jesúsmä pi̧jä̧ rȩjȩra̧’a̧ ichinö huäbodäcuä jähuä jȩa̧ pä’ö: 1) Dios ötö’cö jähuä iso päi’önä huȩnȩ u̧huo̧juȩta̧ pä’ö, 2) churutä surojö huȩnȩ ’cuäopa’anä, Jä’o Diosrö pä̧huä̧ rö̧jö̧ jȩi̧nö̧ ta’anö jȩta̧ pä’ö, huo̧juȩtö̧ ichinö 3) recuätö suronä jȩttö̧ttö̧ ejädö icu ucuojanä “mitäu” ichinödo. Mateo 20:28 ucuocui.

Ya̧tȩ cärenä ö̧’o̧mȩnä̧mä̧, porö pide räopa päöttömä, ahuaruhuä ttimita pä’ö ja̧’a̧ (Éxodo 21:29, 30). Dios ttö̧ja̧rö̧ aditomenämä yoröiso ji̧’qui̧cha̧nö̧’i̧nä̧ amöcuädocö pi̧nö̧ ’corupäi’äcuähuä’inä, böäcuächäcuähuä’inä. Pi̧yȩmä̧ huo̧juä̧tö̧jä̧ Dios Adánrö jiähuina’attö suronä jȩcu̧’u̧ttu̧mä̧, ttö huedö ta’anö  jȩcu̧’o̧ca̧’a̧ jö̧ttö̧mä̧ ’co̧ru̧juo̧cu̧huä̧chä̧cua̧jä̧, pä’inödo. Ja̧’hua̧nö̧ ja̧’a̧ttö̧, Adán suronä jȩo̧ca̧’a̧ ji̧nö̧ttö̧mä̧ ji̧nä̧ a̧’cua̧rä̧ji̧ (Génesis 2:16, 17; 5:5). Dios I̧huȩnȩ Isä’tä päa’a Adánttö hua’are rȩbȩhui̧na̧’a̧ pi̧jä̧nä̧. Ja̧’hua̧nö̧ ja̧’a̧ttö̧ o’ca toi’önä ahuaruhuä o’cotörö surojö’inä, hua’are’inä iyipinödo. Pide cärenä pö̧ jö̧ ta’anötä, ujutu’inä recuä rö̧jä̧u̧jä̧ ya̧tȩ ujutunä imitähua pä’ö. Romanos 5:12; 6:23 ucuocui.

Ja̧’hua̧nö̧ ja̧’a̧ttö̧mä̧, ¿dijä̧ttö̧ pi̧yȩ hua’arettö ujutunä i̧mi̧tä̧huä̧cua̧mä̧? ’Corujuotächomenämä, suronä jȩtä̧’i̧jö̧ ujututä mitätöjä. Ja̧’hua̧nö̧ ja̧’a̧nä̧, korotö suronä jȩttö̧mä̧ timitö juiyö’a̧nö̧ huotöjä, surojö tu̧ju̧nä̧ra̧’a̧ttö̧. Mateo 16:26 ucuocui.

Jesúsmä ujututtu’inä i̧mi̧cu̧nä̧ huinödo. Yoröiso suronä jȩpo̧cö̧ pi̧nö̧. Ja̧’hua̧nö̧ ja̧’a̧ttö̧ chutä amönä jähuänämä ’corujuo’ächocö pi̧nö̧, korotö suronä jȩttö̧tä̧ imitähua pä’ö ’corujuo’ächinö. Diosmä I̧tti̧rö̧ hue’inö pi̧jä̧ rȩjȩra̧’a̧, pi̧yȩnä̧ juiyo ttö̧ja̧rö̧ repeäcuähuä i̧jȩpi̧nö̧do. Jesúsmä ja̧’hua̧ta̧nö̧ surojöttö’inä, hua’arettö’inä ujuturu ejädö icua pä’ö a̧’cua̧rö̧ iyähuinö, Jä’orö esetö ujuturu repeäcuähuä i̧jȩpi̧nö̧do. Juan 3:16; Romanos 5:18, 19 ucuocui.

Pi̧jä̧ rȩjȩnä̧ ö̧jo̧mȩnä̧, Jesúsmä na̧’ä̧chä̧tö̧rö̧ aditö icuinö, ’corujuo’ächinätörö’inä tto’ädinö, ubara ttu’ätörö’inä ppä’ädinö, hueäcua’a ä’canä pi̧yȩnä̧ i̧jȩpi̧nö̧ Dios Uruhuonä jȩä̧cuȩ o’ca toi’önä Diosrö esetätörö (Mateo 15:30, 31; Juan 5:28). Jesús ’corujuoächinö o’ca’a, Dios ttoädinäcu pä’äji ta’anö mo̧ro̧jä̧ra̧’a̧ ö̧ja̧ pä’ö (Efesios 1:20). Ja̧u̧nu̧ o’comenä chutä Jä’o u̧huo̧jua̧’a̧nä̧ pä̧mä̧di̧nö̧do. Ju̧huȩnȩ tta̧ʼä̧ri̧nö̧, pi̧jä̧ rȩjȩra̧’a̧ huea pä’ö chutä Jä’o hueome jubö (Hebreos 10:12, 13). Jitä pä̧nä̧mä̧, Jesúsmä mo̧ro̧jä̧ra̧’a̧ hue’ö, ja̧’hua̧ta̧nö̧ umöhuäyotömä pi̧jä̧ pa̧ja̧cu̧nä̧ pi̧yȩ adihuä huȩnȩ ji’ähuätö. Lucas 1:32, 33; Mateo 24:14 ucuocui.

Pide ru̧hua̧ ju̧ru̧hua̧mä̧, Dios huea pä’ö iyinäcu, ttö̧ja̧ suropätörö’inä, ubara ttuttunä jȩpä̧tö̧rö̧’i̧nä̧ yodojinänö si’epö i̧cuä̧cua̧. O’ca toi’önä Jesúsru tta̧’cua̧ huȩnä̧rä̧tö̧’i̧nä̧, hueö ta’anö jȩpä̧tö̧’i̧nä̧ pi̧jä̧nä̧ eseunu ttö̧ja̧cuä̧cuo̧tö̧, pi̧jä̧ rȩjȩ adihuächö o’ca’a. Mateo 5:5 ucuocui.