HUO̧JUI̧CUÄ̧ 15
¿Tta̧’a̧nö̧ pä’ö Dios I̧huȩnȩ Isä’tä cu̧huo̧jui̧’a̧ pä’ö ja̧’a̧ttö̧?
1. ¿Tta̧’a̧nö̧ ppäda’attö juhua’a yabocu Dios I̧huȩnȩ Isä’tä cu̧huo̧jui̧’ö̧ttö̧mä̧?
Dios I̧huȩnȩ Isä’tättö pi̧yȩ o’ca juiyö huo̧jui̧pö̧ tocu’ä’ijömä, Jeohuarö repecunä jȩa̧’a̧. Recuä rö̧ja̧’a̧ pi̧yȩ repeäcuähuä juhua’a yabocu böo juoa pä’ö (1 Pedro 2:2). Kä̧cuä̧huä̧ i’co cu̧ju̧nä̧ra̧ päcuttumä, Dios I̧huȩnȩ Isä’tä cu̧huo̧jui̧’a̧ pä’ö ja̧’a̧ Jeohuacu tö’cö cu̧jä̧cua̧’a̧nö̧. Juan 17:3; Judas 21 ucuocui.
Dios ötö’cö jähuä juhua’a yabocu cu̧huo̧juä̧cho̧mȩnä̧mä̧, cua̧’cua̧ cu̧huȩnä̧rö̧ böo juoäcua’a. Pi̧yȩmä̧ ppädäcua’a Dios eseunä jȩcu̧’a̧ pä’ö (Hebreos 11:1, 6). Ja̧’hua̧ta̧nö̧ ppädäcua’a ä’coji suronä jȩcu̧’ä̧’i̧jö̧mä̧, jȩcu̧’i̧ya̧ pä’ö, adiunätä cu̧ja̧ pä’ö. Hechos 3:19 ucuocui.
2. ¿Tta̧’a̧nö̧ ppäcuhuädö’a̧nö̧ ja̧’a̧ttö̧ korotörömä?
Jeohuarö cutö’cöhuächöttömä eseu cu̧jä̧cua̧jä̧
Ujuturu adihuä juäi ’cuäopomenä korotörö jitähua pä’ätöjä. Ucu’inä cu̧’o̧cui̧’ä̧’i̧jö̧mä̧ korotörö jicuhuähua pä’öjä a̧’cua̧ra̧’a̧. Ja̧’hua̧nö̧ ja̧’a̧ttö̧ juhua’a yabocu Dios I̧huȩnȩ Isä’tä huo̧jui̧pi̧, Jeohua ötö’cö jähuä’inä, ttö̧ja̧rö̧ adihuä juäi iyä̧cuȩ huȩnȩ ötö’cö jähuä’inä, pi’tänä ba’epö korotörö cu̧huo̧juȩta̧ pä’ö. Romanos 10:13-15 ucuocui.
Cuahuaruhuärö adihuä huȩnȩ huo̧juȩtö̧ kä̧mä̧di̧. Ucuotönö ucuocui. Jahuätö ttesetö, ttä’ca jo̧mȩttö̧ suronämä cucuocuä’, adihuä huȩnȩ Dios iya päinö ötö’cö jähuätä ucuocui. Ttö̧ja̧mä̧ jitäuttu’inä abonänö adiu jȩtö̧ topö esetätö. 2 Timoteo 2:24, 25 ucuocui.
3. Dios a̧hua̧ru̧hua̧, ¿päcuhui’ö’a̧nö̧ ja̧’a̧di̧?
Dios I̧huȩnȩ Isä’tä cu̧huo̧jui̧’ö̧ttö̧mä̧ cua̧’cua̧ jähuänä böo juo̧cu̧huä̧chä̧cua̧jä̧, ja̧’hua̧ta̧nö̧ Jeohuarö cua̧hua̧ru̧hua̧ päi’önä to̧cu̧’ä̧cua̧jä̧. Ucumä päcuhui’ö’a̧nö̧ ja̧’a̧ Dios i̧tti̧ jä̧’i̧nö̧’a̧nö̧. 2 Corintios 6:18 ucuocui.
4. Ucurumä, ¿däje ppädäcua’attö cua̧’cua̧ cu̧huȩnä̧rö̧ böo juoächa pä’ömä?
Dios I̧huȩnȩ Isä’tänä cu̧huo̧jui̧’ö̧mä̧ cäcuhuädi’ä’. (Hebreos 5:13, 14). Testigo Jeohua huotörö jä’epi Dios I̧huȩnȩ ttu̧huo̧juȩta̧cu̧ pä’ö, cuyäru’tä ¿Qué enseña realmente la Biblia? pä’ö micuä’tänä. Juhua’a yabocu cu̧huo̧jui̧’o̧mȩnä̧ eseu cu̧jä̧cua̧jä̧. 1 Timoteo 4:15, 16; Romanos 12:2 ucuocui.
Jeohua, “Dios eseumä, adihuä huȩnȩ” iyömä, I̧huȩnȩ Isä’tänä iyö (1 Timoteo 1:11, TNM). Diosrö cu̧tö̧’cö̧huä̧chä̧cua̧jä̧ Chutä umöhuäyotöcu cu̧ca̧cuä̧rä̧cuä̧u̧ttu̧tä̧ (Hebreos 10:24, 25). Jeohuarö pä̧huä̧ rö̧jö̧tä̧ jȩpö̧ cujuruhuächöttömä iso päi’önä kä̧cuä̧huä̧ i’co cu̧ju̧nä̧rä̧cua̧jä̧. Jeohuarö tö’cöhuächi. ¡Pi̧yȩtä̧ iso päi’önä adiumä! 1 Timoteo 6:19 ucuocui.
Puede que también le interese
CA̧CA̧CUÄ̧RÖ̧ JȨTTÖ̧ JÄHUÄ
¿Däje ’cuäopa’attö Dios Uruhuo Huo̧jui̧cuodettömä?
Do’ächö ucutä topi iso päi’önä ja̧’a̧ pä’ö.
UJUTU TÖTÖʼCÖ
¿Tta̧’a̧nö̧ pä’ö tu̧huo̧jui̧’a̧ pä’ö ja̧’a̧ttö̧ Dios I̧huȩnȩ Isä’tämä?
Dios I̧huȩnȩ Isä’tämä pi̧jä̧ pa̧ja̧cu̧nä̧ rö̧ȩnä̧ recuätö ttö̧ja̧rö̧ ppäda’a. Pi̧jä̧nä̧ kä̧nö̧ juiyo jättecu, ädätäcuähuä ttö̧’o̧cui̧’a̧ pä’ö ppäda’a. ¿Ucu’inä cu̧’o̧cui̧’a̧ päcuhua?
