HUO̧JUI̧CUÄ̧ 5
Pi̧jä̧ rȩjȩmä̧, ¿däje jȩä̧cua̧’a̧ttö̧ Diosmä?
1. Diosmä, ¿tta̧’a̧nö̧ pä’ö pi̧jä̧ rȩjȩ aditina’attö?
Jeohuamä pi̧jä̧ rȩjȩ aditinö ttö̧ja̧ ttö̧ja̧cua̧ pä’ö. Adánrö’inä, Evarö’inä mo̧ro̧jä̧ra̧’a̧ ttö̧ja̧cua̧ pä’ömä aditocö pi̧nö̧. Diosmä täcö ä’coji aditinö mo̧ro̧jä̧ra̧’a̧ ttö̧ja̧cuä̧cuo̧tö̧ ángeles huotörö (Job 38:4, 7). Äcuomenä uborö pätta adihuome, Edén pä’ö micuome ku̧ni̧nö̧do Jeohuamä (Génesis 2:15-17). Ja̧’hua̧ta̧nö̧, iyinäcu ahuaruhuäcu eseunu ’cuäopönätä ö̧ja̧ pä’ö pi̧jä̧ rȩjȩnä̧. 1 Juan 2:17; Salmo 115:16 ucuocui.
Edén pättamä pi̧jä̧ rȩjȩ o’ca juiyönämä jo̧ca̧’a̧ ji̧na̧’a̧. Ja̧’hua̧nö̧ ja̧’a̧ttö̧, Adán’inä, Eva’inä tti̧tti̧mö̧rö̧ ttu̧ju̧nä̧ra̧ pä’ö ji̧na̧’a̧ pi̧jä̧ pa̧ja̧cu̧nä̧ recuätö juottächa pä’ö. Ja̧’hua̧ta̧nö̧, pitömä a̧’cuo̧po̧nä̧ pitta pätta rö̧ä̧chö̧nä̧ jȩtta̧ pä’ö ji̧na̧’a̧ (Génesis 1:28). Pi̧jä̧ rȩjȩmä̧ ttö̧ja̧ ’cuäopönätä ttö̧ja̧cua̧ pä’ö jȩä̧cuä̧huä̧jä̧ ji̧na̧’a̧. Mateo 5:5 ucuocui.
2. Jitä pä̧nä̧ pi̧jä̧ rȩjȩmä̧, ¿tta̧’a̧nö̧ pä’ö adihuoca’attö?
Diosrö ttesetoca’attö, Adánrö’inä, Evarö’inä rä’epö icuinä̧u̧do Edén pättattö. Ja̧’hua̧nö̧ ja̧’a̧ttö̧ pitta pättamä toei’ächina’ado, ya̧tȩ’i̧nä̧ pitta ji̧nö̧’a̧nö̧ jȩpö̧mä̧ toa’a. Dios I̧huȩnȩ Isä’tä päa’a pi̧jä̧ rȩjȩmä̧ ttö̧ja̧ suropätörö i̧yä̧hui̧nä̧jä̧do (2 Timoteo 3:13). Romanos 5:18 ucuocui.
Jeohua ttö̧ja̧rö̧ jȩa̧ pä’ö amöcuädinömä, ¿unichi’ina’a ja̧’a̧di̧? Ji̧’qui̧cha̧nö̧’i̧nä̧ unichi’ocödo. Pidemä o’ca juiyö ju̧ru̧hua̧, yoröiso Chutä päömä jȩpö̧ (Isaías 45:18). Dios ä’coji ttö̧ja̧ pi̧jä̧ rȩjȩnä̧ ttö̧ja̧cua̧ päinö ta’anö jȩä̧cua̧ yodojimä. Romanos 8:21 ucuocui.
3. Pi̧jä̧ rȩjȩmä̧, ¿pä’äji ta’anö adihuome jä̧cua̧’a̧ ja̧’a̧di̧?
Jesús Dios Uruhuonä hueomenämä, pi̧jä̧ rȩjȩ adihuächönä pärotö i̧cuä̧cua̧. O’ca toi’önä Dios aboiyotörö, Jesúsmä ángeles huotöcu curä Armagedón pä’ö micunä si’epö i̧cuä̧cua̧. Ja̧u̧nu̧ pä̧nä̧mä̧, Ähuettärö mil a̧’ȩ jo̧mȩnä̧ mö̧’ȩpö̧ ö̧tä̧cua̧, pide ángel su̧ro̧pa̧mä̧ Adánrö, Evarö Dios päö ttesetiyönä jȩpi̧nö̧do. Pi̧yȩ curä ’cuäopomenämä, Dios umöhuäyotömä ttö̧ji̧pä̧cuo̧tö̧, Jesús pitörö o’ipö tta̧huä̧rä̧cua̧. Pi̧yȩ ’cuäopö o’ca’a, pitömä pi̧jä̧ rȩjȩ adihuome ’cuäopönä eseu ttö̧ja̧cuä̧cuo̧tö̧. Apocalipsis 20:1-3; 21:3, 4 ucuocui.
4. Ubara ttuhuähuämä, ¿ti̧yȩnö̧ siähuächäcua’attö?
Ttö̧ja̧ suronä jȩttö̧mä̧, ¿ti̧yȩnö̧ si’epö icuäcua’attö Diosmä? Jesús ji’ähuinödo pi̧yȩ tö’cöhuächomenä ’cuäopä̧cuȩ. Jitä pä̧nä̧ surojö huȩnȩ ’cuäopö juhua’a yabocu ’chö̧ttö̧mä̧, o’ca toiʼönä ttö̧ja̧ tottei’ö’a̧nö̧ ja̧’a̧. Pi̧yȩnä̧ i̧jȩpa̧’a̧ täcö “röji mo̧ro̧” ka̧cuä̧tö̧jä̧ pä’ö. Mateo 24:3, 7-14, 21, 22 ucuocui.
Ya’ute mil a̧’ȩ jo̧mȩnä̧ Jesúsmä mo̧ro̧jä̧ra̧’a̧ttö̧ pi̧jä̧ rȩjȩra̧’a̧ huȩä̧cua̧, ubara ttuhuähuä a̧’cuo̧po̧nä̧ si’epö i̧cuä̧cua̧ (Lucas 1:32, 33; Romanos 12:19). Ja̧’hua̧ta̧nö̧, Ja̧u̧mä̧ Diosrö repe’ätö suronä jȩttö̧ jȩpö̧ i̧cuä̧cua̧. Diosmä Jesúsnä na̧huä̧chä̧cuä̧huä̧’i̧nä̧, böäcuächäcuähuä’inä, ’corujuoächäcuähuä’inä si’epö i̧cuä̧cua̧. 1 Corintios 15:26; Isaías 33:24 ucuocui.
5. Pi̧jä̧ adihuächö o’ca’a, ¿titöttö̧ ttö̧ja̧cuä̧cuo̧tö̧mä̧?
Dios Uruhuo Huo̧jui̧cuodenä Diosrö repe’ätörö’inä, Diosrö pä̧huä̧ rö̧jö̧ jȩpä̧tö̧rö̧’i̧nä̧ tocu’äcuotöjä
Dios päö ta’anö jȩpä̧tö̧tä̧, pi̧jä̧ rȩjȩ adihuome ttö̧ja̧cuä̧cuo̧tö̧mä̧ (Hebreos 10:36). Jesúsmä umöhuäyotörö hue’inö Diosrö repe’ätörö usu ttu̧huo̧juȩta̧ pä’ö, jahuätö Diosrö pä̧huä̧ rö̧jö̧ jȩtta̧ pä’ö. Jitä pä̧nä̧ Jeohuamä huo̧juȩtö̧ recuätö ttö̧ja̧rö̧ pi̧jä̧ rȩjȩ adihuome ttö̧ja̧cua̧ pä’ö (Juan 6:45). Testigo Jeohua Dios Uruhuo Ttu̧huo̧jui̧’odenä, tti̧tti̧mö̧rö̧ ku̧nä̧rä̧tö̧’i̧nä̧, ttirecuarö ku̧nä̧rä̧tö̧’i̧nä̧, ttirecuorö ku̧nä̧rä̧tö̧’i̧nä̧ ca̧ca̧cuä̧rö̧ huo̧jui̧pä̧tö̧ adiunä jȩtta̧ pä’ö. Porö, ttä̧’o̧tö̧ tti̧tti̧mö̧cu̧ ji̧nä̧ yo̧mȩtȩ Diosrö esehuätö, Dios I̧huȩnȩ Isä’tänä adihuä huȩnȩ huo̧jui̧pä̧tö̧. Apocalipsis 15:4 ucuocui.
