O’ca toi’önä Diosrö esetätöjä pähuä isotöttö, yotöcunämä iso päi’önä Diosrö pä̧huä̧ rö̧jö̧ jȩtta̧ pä’ätö. Diosmä pitörö a̧mö̧cuä̧rö̧, ja̧’hua̧ta̧nö̧ Chutä ä’ca jo̧mȩttö̧ pitömä rö̧ȩnä̧ micuähuätö. Pi̧yȩmä̧ adihuä huȩnȩ ja̧’a̧. Ja̧’hua̧nö̧ ja̧’a̧nä̧, recuätö Diosrö esetätöjä pätta’anä Dios i̧mi̧nä̧ rö̧ȩnä̧ huȩnȩcuä̧chö̧nä̧ surojö jȩpä̧tö̧ (2 Corintios 11:13-15). Koronömä ä̧ju̧cuä̧tö̧jä̧ pitömä suronä jȩpä̧’i̧jä̧tö̧ korotö totte’a pä’ö’inä, korotörö cuä’ö tticua pä’ö’inä, korotörö curära̧’a̧ tti̧’cha̧ pä’ö hue’ätö, ya̧tȩ irecuarö jȩö̧’a̧nö̧ ppo̧’ä̧tö̧rö̧ suronä jȩpä̧tö̧. Pi̧yȩ ttä̧ju̧cuo̧mȩnä̧ Diosrö adiu esetätömä tta̧’cua̧ tta̧’ȩcuä̧tö̧. Mateo 24:3-5, 11, 12 ucuocui.

Dios iso päi’önä umöhuäyotömä Jeohuarö adiu jȩpö̧ ttesehua’anä, korotö Diosrö esetätöjä pätta’anä Dios ötö’cö jähuä’inä, ’corujuo’ächinätö ttötö’cö jähuä’inä yapare ji’ähuätö. Dios I̧huȩnȩ Isä’tänä huo̧juȩto̧cö̧’i̧nä̧ huo̧juȩtä̧tö̧. Ja̧’hua̧nö̧ ja̧’a̧nä̧, Jeohuamä pä̧huä̧ rö̧jä̧cu̧ o’ca toi’önä ttö̧ja̧ Chutä ötö’cö jähuä iso päi’önä huȩnȩ ttu̧huo̧jua̧ pä’ö. Romanos 6:23; 1 Timoteo 2:3-5 ucuocui.

Ttö̧ja̧ Diosrö repe’ätöjä pätta’anä pi̧jä̧ jähuätä rö̧ȩnä̧ repe’ätö, Diosmä pitörömä yoröiso esetocö (Santiago 4:4). Iglesia ’chu̧huä̧rä̧cuä̧huä̧ ttö̧ja̧ pi̧jä̧ pa̧ja̧cu̧nä̧ yapare huȩnȩ huo̧juȩtä̧tö̧rö̧mä̧, Dios I̧huȩnȩ Isä’tämä pä’ö oa’a “Babilonia ötahuiyä rö̧ome” pä’ö. Pi̧yȩ ötahuiyämä Noé ö̧ji̧nö̧ pä̧nä̧ aje suhuädi’inö o’ca’a aditinätö, pi̧yȩ ötahuiyättö äcuomenäji yapare esetäcuähuä kä̧mä̧di̧na̧’a̧. Yodojinänö, yapare huȩnȩ huo̧juȩtä̧tö̧rö̧, ttö̧ja̧rö̧ yapare huȩnȩ ji’äu ye’epä’chätörö, ttieruhua’anä si’epö i̧cuä̧cua̧ Diosmä. Apocalipsis 17:1, 2, 5, 16, 17; 18:8 ucuocui.

Ja̧’hua̧nö̧ ja̧’a̧ttö̧, Diosrö esetätöjä pätta’anä yapare huo̧juȩtä̧tö̧cu̧ ka̧cuä̧tö̧rö̧, iso päi’önä Diosrö pä̧huä̧ rö̧jö̧ jȩtta̧ pä’ätörömä, unichi’ocö Jeohuamä. Pitörö, Diosmä ca̧ca̧tö̧ iso päi’önä huȩnȩ u̧huo̧juȩta̧ pä’ö. Juan 6:45 ucuocui.

Iso päi’önä huȩnȩ repe’ätörö, adiu jȩtta̧ pä’ätörö, pitörömä Jeohuamä a̧mö̧cuä̧rö̧. Ja̧’hua̧nö̧ ja̧’a̧ttö̧, pitörö Diosmä jä’epö yapare huȩnȩ esetäcuähuättö ’quȩtti̧pä̧cha̧ pä’ö. Ttö̧ja̧ Diosrö iso päi’önä repe’ätömä, Chutä hueö ta’anö jȩtta̧ pä’ö pärohuächätö, Dios esehua pä’ö. Apocalipsis 18:4 ucuocui.

Jesús ’corujuoächinö o’ca’a, recuätö ttö̧ja̧ adihuä isotömä eseunu ä̧ju̧cui̧nä̧tö̧ apóstoles huotö jittähuinömä. Pitörö Jeohuamä huo̧juȩti̧nö̧do jareö jȩtta̧ pä’ö jö̧ eseunu ttö̧ja̧cua̧ pä’ö’inä, ttä’ca ja̧’a̧cu̧ jähuä eseunu tta̧ttä̧ra̧ pä’ö’inä. Pitö jȩtti̧nö̧ ta’anö, ttu̧huo̧jui̧’i̧nö̧ ta’anö, ujutu’inä Dios I̧huȩnȩ Isä’tättö tu̧huo̧jui̧’a̧ pä’ö ja̧’a̧, Jeohuarö’inä äcuomenä tusa pä’ö ja̧’a̧. 1 Tesalonicenses 1:8, 9; 2:13 ucuocui.

Yapare huo̧juȩcuä̧ttö̧ ’quȩ’i̧pä̧chä̧tö̧rö̧mä̧, iso päi’önä huȩnȩ huo̧jui̧pö̧ jȩtto̧mȩnä̧, Diosmä pitörö umöhuäyotöcu ttö̧ja̧cua̧ pä’ö pä̧huä̧ rö̧jä̧cu̧. Pitömä, o’ca toi’önä Dios ahuaruhuä pä’i’ätö, po̧cui̧pä̧tö̧ jarepätö ttahuaruhuärö korotö korotöcu repeäcuähuätörö, kä̧cuä̧huä̧ i’co ttu̧ju̧nä̧ra̧ pä’ö eseunu tta̧’ä̧rä̧tö̧rö̧. ¿Pitöcu ji̧nä̧ yo̧mȩtȩ cu̧ja̧ päcuhua’a? Marcos 10:29, 30; 2 Corintios 6:17, 18 ucuocui.

Ttö̧ja̧ yapare huȩnȩ huo̧juȩtä̧tö̧rö̧ Jeohua si’epö icuomenämä, täcö ttö̧ja̧rö̧ yapare jittähuiyäcuotö, ttö̧ja̧rö̧ ’quȩ’ȩpö̧ tticuiyäcuotö. Ja̧u̧nu̧ pä̧nä̧, pi̧jä̧ o’ca juiyönä ka̧cuä̧tö̧mä̧ ya̧tȩrö̧tä̧ iso päi’önä Diosrötä esetö ttucuotäcuotö. Pi̧yȩ huȩnȩmä̧ ¿adihuä huȩnȩ ja̧’a̧di̧? Apocalipsis 18:20, 21; 21:3, 4 ucuocui.