Diosmä pä̧huä̧ rö̧jä̧cu̧ o’ca toi’önä ttö̧ja̧ Churutä ucuocu ttötö’cöhuächarö pä’ö (Salmo 65:2). Ja̧’hua̧nö̧ ja̧’a̧nä̧, o’ca juiyö ttucuocumä ä̧ju̧cuo̧cö̧. Dios I̧huȩnȩ Isä’tänä päa’a ya̧tȩ irecuarö ubara ttujunä jȩpö̧mä̧ Diosrö ucuocuomenämä, Diosmä ä̧ju̧cuo̧cö̧ (1 Pedro 3:7). Israel ttö̧ja̧ ppa̧’ä̧dä̧rö̧ suronä jȩtto̧mȩnä̧mä̧, Diosmä jahuätörö ä̧ju̧cua̧ pä’ocö pi̧nö̧do. Ja̧’hua̧nö̧ ja̧’a̧nä̧, Diosmä ä̧ju̧cu̧ suronä jȩttä̧’i̧jö̧ unichi’ö ttamöcuädö pärotö tticuomenätä. Churutä tucuocua’anä jaroa’attö, pi̧yȩnä̧ Diosmä i̧jȩpö̧ ujuturu repe’ö pä’ö. Juan 9:31; Hechos 3:19 ucuocui.

Jeohuarötä tucuocua pä’ö ja̧’a̧, Ja̧u̧tä̧ ja̧’a̧ ujuturu Aditinömä. Jeohuatä ja̧’a̧ iso päi’önä Tö̧ä̧nä̧hua̧mä̧ (Mateo 4:10; 6:9). Ja̧’hua̧ta̧nö̧, suronä jȩä̧cuä̧huä̧ tu̧ju̧nä̧ra̧’a̧ttö̧, Diosrö tucuocua pä’ö ja̧’a̧ Jesús i̧mi̧nä̧, pide ujutu suronä jȩtö̧ jȩpö̧ icua pä’ö ’corujuoächina’attö (Juan 14:6). Korotö amöcuädö Diosrö ttucuocua pä’ö tti̧huȩyu̧tu̧ttu̧mä̧, pi̧yȩ huȩyu̧cuä̧ ppa̧’ä̧dä̧rö̧ tucuocua pä’ömä jo̧ca̧’a̧, Jeohuamä pi̧yȩmä̧ yoröiso kö’cocö, pärocua’acutä, pä̧huä̧ rö̧jä̧cu̧ tami iso’quittö räopötä tucuocuarö pä’ö. Mateo 6:7; Filipenses 4:6, 7 ucuocui.

Ujuturu Aditinörömä ta̧’cua̧ jacuänätä amöcuädö Churutä tucuocuomenämä ä̧ju̧cu̧ (1 Samuel 1:12, 13). Ja̧u̧mä̧ pä̧huä̧ rö̧jä̧cu̧ tucuocuarö pä’ö taditähuä aditö tö̧jä̧mä̧dä̧cua̧’a̧ ä’canä’inä, tä’äcua’a ä’canä’inä, tu̧cuȩ tucuäcua’a ä’canä’inä, surojö huȩnȩ tu̧ju̧nä̧ro̧mȩnä̧’inä, ’cuäopönätä tucuocuarö pä’ö. 1 Pedro 5:7; Mateo 15:36 ucuocui.

Diosrö tötö’cöhuächa päta’anä ’quiya’a, recuätö ttö̧ja̧ Diosrö esetocotö ttö̧’quȩtȩnä̧ tö̧ja̧cua̧’a̧ttö̧. Ja̧’hua̧ta̧nö̧ pitö Dios iya päö pi̧jä̧ rȩjȩnä̧ huȩnȩ juiyönä kä̧cuä̧huä̧ ttesetoca’a ya̧’ä̧huä̧’chä̧tö̧ (2 Timoteo 3:1, 4; 2 Pedro 3:3, 13). Ja̧’hua̧nö̧ ja̧’a̧ttö̧, recuä rö̧ja̧’a̧ tu̧ca̧ca̧cuä̧ra̧ pä’ö korotö Cristo umöhuäyotö huotöcu, ujuturu ppättäda pä’ö, ja̧’hua̧ta̧nö̧ jahuätörö’inä ujutu ppätäda pä’ö. Hebreos 10:24, 25 ucuocui.

 Diosrö repe’ätöcu ji̧nä̧ yo̧mȩtȩ tu̧ca̧ca̧cuä̧ro̧mȩnä̧mä̧, Churutä Diosrö tö’cöpächätöjä. Testigo Jeohua huotö ji̧nä̧ yo̧mȩtȩ ttu̧ca̧ca̧cuä̧ro̧mȩ ti̧’cho̧mȩnä̧mä̧, korotö tta̧’cua̧ ttu̧huȩnä̧rö̧ totomenä ujuturu’inä ppäda’a jahuätö jȩttö̧ ta’anö jȩta̧ pä’ö. Romanos 1:11, 12 ucuocui.

Dios I̧huȩnȩ Isä’tättö cu̧huo̧jui̧’ä̧’i̧jö̧ adiu cuamöcuädöttömä Jeohuarö cu̧tö̧’cö̧huä̧chä̧cua̧jä̧. Amöcuädi Ja̧u̧ mo täbocö ttö̧ja̧rö̧ jȩi̧nö̧ huȩnȩ’i̧nä̧, iya päinö huȩnȩ’i̧nä̧, ö̧tä̧bo̧tö̧ huȩnȩ’i̧nä̧. Pi̧yȩ cu̧huo̧jui̧’ä̧’i̧jö̧ adiu cuamöcuädöttömä, ’cuäopönä Churutä cucuocuttumä, pi̧yȩ ucuru ppädäcua’a, Dios ttö̧ja̧rö̧ rö̧ȩnä̧ repe’ö huȩnȩ’i̧nä̧, rö̧ȩnä̧ u̧huo̧ju̧ huȩnȩ’i̧nä̧ adiu cu̧huo̧juä̧chi̧’ä̧cua̧jä̧. 1 Timoteo 4:15, 16 ucuocui.

Ucu Diosrö cua̧’cua̧ cu̧huȩnä̧rö̧ttö̧tä̧ Dioscu tö’cö cu̧ju̧’a̧nö̧ ja̧’a̧. Yite dau adiunä a̧’cua̧ra̧ pä’ömä ajiya recuä rö̧ja̧’a̧. Pi dau jö̧ ta’anö, ujutumä recuä rö̧jä̧u̧jä̧ iso päi’onä huȩnȩnä̧ amöcuädö, adiunä ta̧’cua̧ tu̧huȩnä̧ra̧ pä’ö. Mateo 4:4; Hebreos 11:1, 6 ucuocui.

Jeohuamä Churutä repe’ätörö a̧mö̧cuä̧rö̧. Pitö tta̧’cua̧ ttu̧huȩnä̧rö̧ jähuä’inä, kä̧cuä̧huä̧ i’co ttu̧ju̧nä̧rä̧cuȩ jähuä’inä ra̧huȩpi̧jo̧mȩnä̧, Diosmä pitörö ppä’ädö (1 Pedro 3:12). Diosmä u̧huo̧juȩtä̧u̧jä̧ tidepä surojuo’epönä jȩtö̧ttö̧ ’quȩti̧pä̧cha̧ pä’ö, ja̧’hua̧nö̧ jȩto̧mȩnä̧ ppädä̧u̧jä̧ adiu eseu tö̧ja̧cua̧ pä’ö. Santiago 1:25; 4:4, 8 ucuocui.