Jeohua ujutu Tä’o, ujuturu Aditinömä, ujututtu’inä abonänö rö̧ȩnä̧ huo̧jua̧do. Ja̧u̧mä̧ ujuturu repe’ö, ujuturu a̧mö̧cuä̧rö̧. Ujuturumä aditinö Chutä oipatö pä’ötä (Jeremías 10:23). Ppo̧’ä̧tö̧rö̧ recuä rö̧ja̧’a̧ ttä̧’o̧tö̧ ottipatö pä’ö. Jahuätörö jö̧ ta’anö, ujuturu’inä recuä rö̧jä̧u̧jä̧ Dios oipatö pä’ö (Isaías 48:17, 18). Iso päi’önä huȩnȩ Dios I̧huȩnȩ Isä’tänä ka̧cu̧mä̧ ujuturu adiunä oipa’a, pi̧yȩnä̧ Diosmä i̧jȩpö̧ ujuturu repe’ö pä’ö. 2 Timoteo 3:16 ucuocui.

Dios I̧huȩnȩ Isä’tänä hueähuä huȩnȩ ka̧cu̧’i̧nä̧, tä̧bo̧cuä̧ huȩnȩ ka̧cu̧’i̧nä̧ ppädä̧u̧jä̧ eseu tö̧ja̧ pä’ö. Ja̧’hua̧ta̧nö̧ jiähua’a jȩta̧ pä’ö jö̧, yodojinänö adihuä juäi tu̧ju̧nä̧ra̧ pä’ö. Dios ujuturu aditina’attö, Chutä Dios o’ipö hueö ta’anö eseu jȩta̧ pä’ö ja̧’a̧. Romanos 15:4; Apocalipsis 4:11 ucuocui.

Dios I̧huȩnȩ Isä’tänä iso päi’önä huȩnȩ rö̧ȩnä̧ micuäu räopa’a. Pi̧yȩ iso päi’önä huȩnȩ räopömä i̧jȩpä̧u̧jä̧ jȩta̧ pä’ö jö̧, koronö surojö huȩnȩ ’cuäopö juiyäcua’a̧nö̧. Ja̧’hua̧ta̧nö̧, koro Dios hueähuä huȩnȩ’i̧nä̧ i̧jȩpä̧u̧jä̧ Diosrö pä̧huä̧ rö̧jö̧ mo̧ro̧ jö̧ ta’anö jȩta̧ pä’ö (Hechos 15:29). Iso päi’önä huȩnȩ Dios I̧huȩnȩ Isä’tänä räopömä tu̧huo̧juä̧chi̧’a̧ pä’ö ja̧’a̧. Jȩtä̧cua̧’a̧ ä’canä tamöcuäda pä’ö ja̧’a̧ jȩtä̧cuȩ, pi̧yȩ iso päi’önä huȩnȩ päö ta’anö jȩta̧ pä’ö (Efesios 5:15). Huȩnȩtö̧ pähuä, Dios I̧huȩnȩ Isä’tä huo̧juȩta̧’a̧ Diosmä ta̧’cua̧rö̧ iyinö pä’ö. Pi̧yȩ iso päi’önä huȩnȩ tamöcuädomenä ujuturu adiu oipäcua’a taditähuänä’inä, tojusodenä’inä, kara’a ti̧’cho̧mȩnä̧’i̧nä̧, ta̧’cua̧rö̧ tta̧tä̧ra̧ pä’ö’inä, korotö tta̧’cua̧rö̧ tta̧tä̧ra̧ pä’ö’inä. Hechos 17:28 ucuocui.

Todäre hueähuä huȩnȩ ucuocuinödo Jesúsmä. Äcuomenä  hueähuä huȩnȩmä̧ i̧jȩpa̧’a̧ Dios ttö̧ja̧rö̧ aditinö huȩnȩ: Churutä aditinörö ttu̧huo̧juä̧cua̧’a̧nö̧, repettäcua’a̧nö̧, ttucuotäcua’a̧nö̧. Pi̧yȩ hueähuä huȩnȩnä̧ tamöcuäda pä’ö ja̧’a̧ o’ca juiyö jȩtä̧cua̧’a̧ ä’canä (Colosenses 3:17). Pi̧yȩ hueähuä huȩnȩ hueö ta’anö jȩto̧mȩnä̧mä̧, Dios ahuaruhuä päti’äcuotöjä, ja̧’hua̧ta̧nö̧ ’cuäopönätä eseu tö̧ja̧cuä̧cuo̧tö̧jä̧. Mateo 22:36-38 ucuocui.

Todäre hueähuä huȩnȩmä̧ ppäda’a korotöcu huȩnȩ juiyönä ttö̧ja̧cua̧ pä’ö (1 Corintios 13:4-7). Pine hueö ta’anö ’cuäopönä jȩtö̧ttö̧mä̧, Dios ttö̧ja̧rö̧ jȩö̧’a̧nö̧ jȩtä̧cuo̧tö̧jä̧ ujutu’inä. Mateo 7:12; 22:39, 40 ucuocui.

Pi̧yȩ Hueähuä huȩnȩmä̧ ppäda’a ttahuaruhuäcu ji̧nä̧ yo̧mȩtȩ eseu repeäcuäu ttö̧ja̧ pä’ö (Colosenses 3:12-14). Huo̧juȩta̧’a̧ ö’cähuätömä ji̧nä̧ yo̧mȩtȩ ’cuäopönätä ttö̧ja̧cua̧ pä’ö. Marcos 10:7-9 ucuocui.

Diosttö hueähuä huȩnȩ päö ta’anö jȩto̧mȩnä̧mä̧, adihuä juäi po̧cui̧pä̧tö̧jä̧. Huȩnȩtö̧ pähuä, recuätö ttö̧ja̧ korotörö ttaditähuä ttiya pä’ätömä pä̧huä̧ rö̧jä̧u̧ Dios I̧huȩnȩ Isä’tä päö ta’anö jȩpä̧tö̧rö̧ ttiya pä’ö, nä̧u̧cuä̧ro̧co̧tö̧rö̧, iso päi’önä jähuätä ji’ähuätörö, ttu̧ru̧hua̧ päö ta’anö aditätörötä (Efesios 4:28; Tito 2:9, 10). Ja̧’hua̧ta̧nö̧, Dios I̧huȩnȩ Isä’tämä huo̧juȩtä̧u̧jä̧ koro rö̧ȩnä̧ juita’anä, ujutu tu̧cuȩ’i̧nä̧, tö̧’ca̧tä̧huä̧ti̧yu̧’i̧nä̧ tu̧ju̧nä̧ro̧mȩnä̧mä̧, eseu tö̧jö̧’a̧nö̧ ja̧’a̧ pä’ö. Pi̧jä̧nä̧ kä̧nö̧ tu̧ju̧nä̧ra̧ pä’ö tamöcuädöttö’inä ä’canä Dios ahuaruhuä päti’a pä’ötä tusa pä’ö ja̧’a̧. Mateo 6:24, 25, 33; 1 Timoteo 6:8-10 ucuocui.

Diosttö hueähuä huȩnȩ päö ta’anö jȩto̧mȩnä̧mä̧, ppädä̧u̧jä̧ tidepänä adiu tö̧ja̧ pä’ö. Huȩnȩtö̧ pähuä, rö̧ȩnä̧ tä̧tä̧mä̧’cho̧mȩnä̧ icha’a na̧huä̧chä̧cuä̧huä̧’i̧nä̧, ’corujuoächäcuähuä’inä. Ja̧’hua̧nö̧ ja̧’a̧ttö̧, Dios hueö ta’anö jȩpö̧ tö̧ja̧ pä’ö ja̧’a̧ (Proverbios 14:30; Efesios 4:31, 32; Romanos 13:13). Ni̧yö̧ ajiya tahua pätöttömä ji̧’qui̧cha̧nö̧tä̧ tahua pä’ö ja̧’a̧. Pabonätä tauttumä Jeohuamä ja̧’a̧tä̧ toä̧u̧jä̧ (Salmo 104:15; 1 Corintios 6:10). Iso päi’önä Diosttö hueähuä huȩnȩmä̧ ppädä̧u̧jä̧ ttu̧’ȩpä̧rö̧nö̧ tö̧ja̧cua̧ pä’ö, tamöcuädönä’inä, mo̧ro̧ jö̧ ta’anö jȩtö̧nä̧’i̧nä̧ (Salmo 119:97-100). Iso päi’önä Cristo umöhuäyotömä adiunä tö̧ja̧cua̧ pä’ötämä jȩpo̧co̧tö̧jä̧, ujutu Tä’o mo̧ro̧jä̧ra̧’a̧ kö̧rö̧, Jeohuarö, tesehua pä’ö jȩpä̧tö̧jä̧. Mateo 5:14-16 ucuocui.