Surojö huȩnȩ pi̧jä̧ rȩjȩnä̧ kä̧mä̧di̧na̧’a̧ Ähuettä yapare huȩnȩ jiähuomenä. Pide ángel i̧sa̧mä̧ äcuomenäji adihuä i̧sa̧ pi̧nö̧do, surojö jui’inödo, ja̧’hua̧nö̧ ja̧’a̧nä̧ iso päi’önä huȩnȩttö̧ ’quȩ’i̧pä̧chi̧nö̧do (Juan 8:44). Churutä katärötä ttucuotarö pä’ö amöcuädö kä̧mä̧di̧nö̧do, ja̧’hua̧nö̧ ja̧’a̧nä̧, o’ca juiyö Aditinörötä ttucuota pä’ö ja̧’a̧. Evarö yapare ji’ähuinödo Dios hueö jȩji̧ya̧ pä’ö, chutä hueötä keseta pä’ö. Ja̧u̧nu̧ o’comenä Adán’inä irecua jȩji̧nö̧ ta’anö jȩpi̧nö̧do. Pitö pi̧yȩ surojö jȩtto̧mȩnä̧mä̧ ubara ttuhuähuä’inä, hua’are’inä i’cächina’ado. Romanos 5:19; 2 Corintios 11:3 ucuocui.

Ähuettämä Evarö ji’ähuinödo Dios päö jȩji̧yö̧nä̧, pi̧yȩ jȩo̧mȩnä̧ Diosttö jarode’ö suronä jȩpö̧ kä̧mä̧di̧nö̧do. Ähuettämä ji̧’qui̧cha̧nö̧’i̧nä̧ kö’cocö pi̧nö̧do Ju’toju Ru̧hua̧ huea pä’ömä. Pi̧yȩ ruhuonä huea pä’ö hua̧mä̧ ya̧tȩtä̧ Diostä ja̧’a̧. Recuätö ttö̧ja̧ Ähuettäcu pätti’a’attö Dios hueähuä ya’ocuätö, ja̧’hua̧nö̧ ja̧’a̧ttö̧ Ähuettä ja̧’a̧ “pi̧jä̧nä̧ hue’ömä”. Juan 14:30; 1 Juan 5:19 ucuocui.

Jeohua aditähuämä surojö juiyönä aditö. Äcuomenä ttö̧ja̧’i̧nä̧, ángeles huotö’inä Dios hueömä o’ca juiyönä jȩttö̧’a̧nö̧ huinätödo (Apocalipsis 15:3; Filipenses 2:15). Diosmä iyinä̧u̧jä̧ ttu̧’ȩpä̧rö̧nö̧ ujuturu pä̧huä̧ rö̧jö̧ jȩta̧ pä’ö, adiu’inä, surojö’inä. Ja̧’hua̧nö̧ ja̧’a̧ttö̧, Dios päö ta’anö jȩto̧mȩnä̧, i̧jȩpä̧tö̧jä̧ Diosrö repe’ätöjä pä’ö. Santiago 1:13-15; 1 Juan 5:3 ucuocui.

Ttö̧ja̧ Diosrö Ttu̧ru̧hua̧ päi’önä ttöjö’coca’a ja̧’a̧nä̧’i̧nä̧, Diosmä ami ’qui’ächi’ö topö jitä pä̧nä̧ jubö. ¿Tta̧’a̧nö̧ pä’ö? I̧jȩpa̧ pä’ö, ya’ate ruhuo adiu ppäda päa’anä, pi̧yȩ ruhuo Dios ppädoca’a jö̧ttö̧mä̧, ttö̧ja̧rö̧mä̧ adihuä juäi yoröiso iyoca’ado (Eclesiastés 7:29; 8:9). Ttö̧ja̧ i̧sa̧  hue’ö ö̧jä̧mä̧di̧no̧mȩttö̧mä̧, täcö seis mil a̧’ȩ jo̧mȩnä̧ ’cuäopina’ado, yoröiso si’epö icuocotö korotörö suronä jȩä̧cuä̧huä̧’i̧nä̧, korotörö cuä’ö icuähuä’inä, curä’inä, na̧huä̧chä̧cuä̧huä̧’i̧nä̧. Jeremías Diosrö päinö ta’anö ’cuäopa’a, “ttö̧ja̧ i̧sa̧ amönä oipäcuähua pä’ömä ji̧’qui̧cha̧nö̧’i̧nä̧ jȩru̧pa̧, recuä rö̧jä̧cu̧ ucu ocuhuiparö pä’ö” (Jeremías 10:23). Romanos 9:17 ucuocui.

Dios huea’anä jarotäcuäuttumä, adiunä tö̧jö̧’a̧nö̧ ja̧’a̧ (Lucas 11:28). Yodojinänö, Jeohuamä pi̧jä̧nä̧ ruhuo ka̧cu̧ si’epö i̧cuä̧cua̧. Dios Uruhuo esetätötä pi̧jä̧ rȩjȩnä̧ ttö̧ji̧pä̧cuo̧tö̧mä̧ (Isaías 11:9). Apocalipsis 11:15 ucuocui.

Ähuettä pä’inödo, o’ca toi’önä ttö̧ja̧mä̧ Dios päö ta’anö jȩpä̧tö̧ Dios ppäda’attötä. Jeohua tta̧huä̧ra̧’a̧ttö̧, ’cuäopönä Dios hueö ta’anö jȩpö̧ ti̧jȩpö̧’a̧nö̧ ja̧’a̧ Ähuettämä yaparehua̧ pä’ö. Ja̧’hua̧ta̧nö̧, pi̧jä̧nä̧ ruhuo ka̧cu̧nä̧ ta̧’cua̧ huȩnä̧ro̧co̧tö̧jä̧, Dios Uruhuonätä ta̧’cua̧ huȩnä̧rä̧tö̧jä̧ pä’ö ti̧jȩpö̧’a̧nö̧ ja̧’a̧. Apocalipsis 12:10; 2 Pedro 3:9 ucuocui.

Dios I̧huȩnȩ Isä’tänä huo̧jui̧pö̧ Diosrö pä̧huä̧ rö̧jö̧ jȩta̧ pä’ö ja̧’a̧, ja̧’hua̧ta̧nö̧ Diosrö iso päi’önä tta̧’cua̧ huȩnä̧rä̧tö̧ jȩttö̧’a̧nö̧tä̧, ujutu’inä jȩta̧ pä’ö ja̧’a̧ (Juan 4:23). Jesúsmä política jähuänä yoröiso do’ächocö pi̧nö̧do, curä urohuähua pä’ö’inä jȩpo̧cö̧ pi̧nö̧do. Jesús jȩi̧nö̧ ta’anö jȩtö̧ttö̧mä̧ ti̧jȩpä̧cuo̧tö̧jä̧ Ähuettä uruhuo ya’ocuätöjä pä’ö. Juan 17:14 ucuocui.

Ähuettämä aditö ttö̧ja̧ ttidepä surojuoächa pä’ö jȩttö̧nä̧’i̧nä̧, jȩpö̧ nä̧tö̧rö̧, u̧mä̧tö̧rö̧ usu suronä jȩttä̧’chö̧nä̧’i̧nä̧. Pi̧yȩ surojö jȩto̧co̧mȩnä̧, recuätö tahuaruhuämä ujuturu ya̧’ä̧huä̧’chä̧tö̧, adiu tö̧jö̧ juiyönä jȩpä̧tö̧ (1 Pedro 4:3, 4). Pi̧yȩ ’cuäopöttömä, Diosrö repe’ätörötä tusa pä’ö ja̧’a̧. Dios I̧huȩnȩ Isä’tä päa’a, “ttö̧ja̧ suronä jȩpö̧ ka̧cuä̧tö̧cu̧ tö̧jö̧ttö̧mä̧, adiu jȩtö̧ surojuo’epätö” (1 Corintios 15:33, TNM). Ähuettämä pä’inödo ya̧tȩ’i̧nä̧ Dios päö ta’anö jȩpo̧cö̧ surojö ’cuäopomenä. Ja̧’hua̧nö̧ ja̧’a̧nä̧, pi̧yȩ ’cuäopa’anä Dios päö ta’anö jȩpö̧ tami ’quitächi’öttömä, Ähuettämä yaparehua̧ pä’ö ti̧jȩpä̧cuo̧tö̧jä̧. 1 Corintios 6:9, 10 ucuocui.

Dios ujuturu repea’attö, iso päi’önä huo̧juä̧tö̧jä̧ ubara ttuhuähuä’inä, korotörö suronä jȩä̧cuä̧huä̧’i̧nä̧ si’epö i̧cuä̧cua̧ pä’ö. Diosrö tta̧’cua̧ huȩnä̧rö̧ ahuaruhuä pä’i’ätötä pi̧jä̧ rȩjȩnä̧ ’cuäopönä ttö̧ja̧cuä̧cuo̧tö̧mä̧. Juan 3:16 ucuocui.