Jesús umöhuäyotöcu iso päi’önä Diosrö esetäcuähuä esetö jȩpi̧nä̧tö̧. Pi̧yȩ pätetö Jesúsmä ji’ähuinödo ya’ate mä̧nä̧, kä̧cuä̧huä̧ i’co rȩbȩä̧cuä̧huä̧mä̧, pi̧mä̧ mä̧nä̧ a̧’u̧cu̧nä̧tä̧ ja̧’a̧do po̧cui̧pä̧tö̧mä̧ (Mateo 7:14). Dios I̧huȩnȩ Isä’tänä iso päi’önä huȩnȩ ka̧cu̧ttu̧ ȩmö̧ räecuätä esetäcuähuämä Dios ä’ca jo̧mȩttö̧ micuäumä. Pitö iso päi’önä huȩnȩ esetö jȩpä̧tö̧mä̧ ji̧yȩtȩ jähuätä amöcuädö esetätö. Juan 4:23, 24; 14:6; Efesios 4:4, 5 ucuocui.

Jesús ä’coji ji’ähuinödo, Dios I̧huȩnȩ ji’ähuätöjä pätta’anä yapare ji’ähuätömä ttichäcuotö, iso päi’önä esetäcuähuä Jesús iyipinö surojuottepa pä’ö. Pitö ttö̧ja̧mä̧ Jesucristorö esetätöjä pä’ätö. Iso päi’önä huȩnȩ huo̧juȩtä̧tö̧jä̧ pätta’anä, yapare jähuätä korotörö huo̧juȩtä̧tö̧. Ja̧’hua̧nö̧ ja̧’a̧nä̧ ucumä iso päi’önä Jesucristorö esetätö jȩttö̧nä̧ topö cu̧huo̧ju̧’a̧nö̧ ja̧’a̧. Mateo 7:13-23 ucuocui.

Ji̧mö̧tȩ jähuä totätucua Dios päö jȩpä̧tö̧ jȩttö̧:

• Dios I̧huȩnȩ Isä’tä ucuotätö. Pi̧jä̧ ttö̧ja̧ huo̧juȩcuä̧ päö ta’anö jȩpo̧co̧tö̧, juruhuächi’ätö Dios I̧huȩnȩ Isä’tä päö ta’anö adiunä jȩtta̧ pä’ötä (Mateo 15:7-9). Korotörö ttu̧huo̧juȩtö̧mä̧ jitötä’inä Dios I̧huȩnȩ Isä’tä päö ta’anö jȩpä̧tö̧. Juan 17:17; 2 Timoteo 3:16, 17 ucuocui.

•   Umöhuäyotömä ucuotätödo Dios i̧mi̧, Jeohua. Jesús korotörö Dios i̧mi̧ ötö’cö jähuä ji’äu ucuotinödo. Ttö̧ja̧rö̧ ppä’ädinödo Jeohua ötö’cö jähuä ttu̧huo̧jua̧ pä’ö. Huo̧juȩti̧nö̧do Diosrö ttucuocuomenä jättepa pä’ö Dios i̧mi̧ korotö ttucuotäcua’a̧nö̧ (Mateo 6:9). ¿Titö ja̧’a̧ttö̧ Dios i̧mi̧ o’ö ji’ähuätömä ucu cu̧jo̧mȩttö̧? Juan 12:28; Salmo 83:18 ucuocui.

• True Dios Uruhuo ji’ähuätö. Jesúsmä pi̧jä̧ rȩjȩra̧’a̧ ichinödo adihuä huȩnȩ Dios Uruhuo ötö’cö jähuä jiähua pä’ö. Pi̧yȩ ruhuotä ja̧’a̧ ttö̧ja̧rö̧ adiunä ppädö’a̧nö̧ jö̧mä̧. Ja̧’hua̧nö̧ ja̧’a̧ttö̧ Jesús ’corujuoächome jubö pi̧yȩ ruhuo ji’ähuinödo (Lucas 4:43; 8:1; 23:42, 43). Ja̧’hua̧ta̧nö̧ pä’inödo umöhuäyotö huotömä pi̧yȩ ruhuo jittähuäcuotö. Ya̧tȩ cu̧jo̧mȩ ichi’ö Dios Uruhuo jähuä jiäuttumä ¿Dijä̧ttö̧ pi̧yȩ jähuä ji’äumä? Mateo 24:14 ucuocui.

• Pi̧jä̧ ttö̧ja̧ huocotö Jesús umöhuäyotömä. Iso päi’önä Jesús umöhuäyotömä política jähuänä do’ächocotö, ru̧hua̧ adiunä jȩo̧co̧mȩnä̧ rä’opö huopö jȩpä̧tö̧ jȩttö̧’a̧nö̧mä̧ jȩpo̧co̧tö̧ (Juan 17:16; 18:36). Pi̧jä̧ ttö̧ja̧ ttamöcuädö ta’anö amöcuädocotö, ttidepä surojuoächa pä’ö jȩttö̧ ta’anö’inä jȩpo̧co̧tö̧. Santiago 4:4 ucuocui.

• Repettäcuäumä huäjunätä i̧jȩpä̧tö̧. Dios I̧huȩnȩ Isä’tämä iso päi’önä Jesús umöhuäyotörö huo̧juȩta̧’a̧ o’ca toi’önä ttö̧ja̧rö̧ ucuotönö yoräteunä totta pä’ö. Diosrö esetätöjä pätta’anä yapare huo̧juȩtä̧tö̧mä̧ curä ko̧mȩnä̧ korotö ttö̧ja̧rö̧ hue’ätö curära̧’a̧ tti̧’cha̧ pä’ö. Ja̧’hua̧nö̧ ja̧’a̧nä̧, iso päi’önä Jesúsru esetätömä curära̧’a̧ ’cho̧co̧tö̧, korotörö’inä hue’ocotö tti̧’cha̧ pä’ömä (Miqueas 4:1-3). Pärocua’acutä, repe’önö micuä juiyönä korotörö ppä’ädätö, tta̧’cua̧ jähuänä korotörö recuä rö̧jö̧’i̧nä̧ ppä’ädätö micuä tta̧ttä̧ro̧ca̧’a̧. Juan 13:34, 35; 1 Juan 4:20 ucuocui.

¿Titö ja̧’a̧ttö̧ Dios I̧huȩnȩ Isä’tättötä ȩmö̧ huo̧juȩtä̧tö̧mä̧? ¿Titö ja̧’a̧ttö̧ Dios i̧mi̧ ucuotätömä? ¿Titö ja̧’a̧ttö̧ Dios Uruhuo ttö̧ja̧rö̧ adiunä ppädö’a̧nö̧ jö̧ ji’ähuätömä? ¿Titö ja̧’a̧ttö̧ korotö korotöcu repeäcuäu ka̧cuä̧tö̧mä̧? ¿Titö ja̧’a̧ttö̧ curära̧’a̧ ’cho̧co̧tö̧mä̧? Pi̧yȩ ötö’cö jähuä, ¿däje cuamöcuäda’attö? 1 Juan 3:10-12 ucuocui.