HUO̧JUI̧CUÄ̧ 02
Dios I̧huȩnȩ Isäʼtä esetö tta̧tä̧ra̧ päʼö ppädaʼa
Pi̧jä̧ pa̧ja̧cu̧nä̧ recuätö ttö̧ja̧ rö̧ȩnä̧ tta̧ʼcua̧ tta̧ʼȩcuä̧tö̧, ubara ttuʼätö, huȩnȩ ka̧ʼa̧ttö̧. Ucuruʼinä, ¿ja̧ʼhua̧nö̧ ʼcuäopäʼijaʼa ja̧ʼa̧di̧? Cumärichei cu̧ju̧nä̧ra̧ʼa̧ttö̧cö̧, ya̧tȩ repecuhuäcu ʼcorujuoächäjaʼattöcö̧ ubara ttuʼujä a̧ʼcua̧ra̧ʼa̧. Ja̧ʼhua̧nö̧ ja̧ʼa̧ttö̧ jäcuhuecuʼa̧nö̧ ja̧ʼa̧: yodojinänö, ¿adiu tö̧jä̧cua̧ʼa̧ ja̧ʼa̧di̧? Dios I̧huȩnȩ Isäʼtä päömä ta̧ʼcua̧ tȩmö̧nä̧ ppädaʼa.
1. Dios I̧huȩnȩ Isäʼtä esetö tta̧tä̧ra̧ päʼömä, ¿däje jiähuaʼattö?
Dios I̧huȩnȩ Isäʼtä jiähuaʼa pi̧jä̧ pa̧ja̧cu̧nä̧ tocu päʼö rö̧ȩnä̧ huȩnȩ ka̧ʼa̧ttö̧ päʼö. Ja̧ʼhua̧ta̧nö̧ʼi̧nä̧ piʼtä adihuä huȩnȩ jiähuaʼa yodojinänö Diosmä pi̧yȩ surojö huȩnȩ siʼepö i̧cuä̧cua̧ päʼö. Dios I̧huȩnȩ Isäʼtä päömä ucuru “adiu kä̧cuä̧huä̧ esetö” tta̧cu̧huä̧ra̧ päʼö ppädöʼa̧nö̧ ja̧ʼa̧ (Jeremías 29:11, 12 ucuocui). Piʼtänä päömä ppädaʼa huȩnȩ ka̧ʼa̧nä̧ʼi̧nä̧ eseu tö̧ja̧ päʼö. Ja̧ʼhua̧ta̧nö̧ʼi̧nä̧ iso päiʼönä yodojinänö ʼcuäopönä eseu tö̧ja̧cuä̧cuo̧tö̧jä̧ päʼö huäjunä tu̧huo̧jua̧ päʼö ppädaʼa.
2. Dios I̧huȩnȩ Isäʼtämä yodojinänö tö̧jä̧cuȩ, ¿tocu jiähuaʼattö?
Piʼtänä jiähuaʼa “täcö ʼcorupäiʼäcuähuäʼinä, ajuäcuähuäʼinä, tta̧ʼcua̧ tta̧huȩcuä̧cuä̧huä̧ʼi̧nä̧, ubara ttuhuähuäʼinä juiyäcuaʼa” päʼö (Apocalipsis 21:4 ucuocui). Jueönä jȩä̧cuä̧huo̧cö̧ʼi̧nä̧, märicheiʼinä, ʼcorupäiʼäcuähuäʼinä, ujuturu recuä rö̧jö̧ juitöʼinä, pi̧yȩ ubara ttutunä jȩö̧ siähuächäcuaʼa. Dios I̧huȩnȩ Isäʼtä jiähuaʼa pi̧jä̧ rȩjȩ a̧ʼcua̧cuä̧chö̧ oʼcaʼa ttö̧ja̧ ʼcuäopönä eseu ttö̧ja̧cuä̧cuo̧tö̧ päʼö.
3. Dios I̧huȩnȩ Isäʼtä jiäu ʼcuäopäcuaʼa päʼö cua̧ʼcua̧ cu̧huȩnä̧ra̧ päʼö, ¿däje ppädäcuaʼattö?
Recuätö ttö̧ja̧ adihuächäcuaʼa päʼö ttamöcuädaʼanä ja̧u̧ iso päiʼönä ʼcuäopäcuaʼacö̧ päʼö ttieruʼunä jä̧u̧. Ja̧ʼhua̧nö̧ ja̧ʼa̧nä̧, Dios I̧huȩnȩ Isäʼtänä iso päiʼönä huȩnȩ ka̧ʼa̧, piʼtänä päömä ta̧ʼcua̧ tu̧huȩnä̧rö̧ʼa̧nö̧ ja̧ʼa̧ “Huȩyu̧cuä̧ Huȩnȩ adiu” tu̧huo̧jui̧ʼo̧mȩnä̧ (Hechos 17:11). Pi̧yȩ jȩcu̧ʼo̧mȩnä̧ ppädäcuaʼa yodojinänö tö̧jä̧cuȩ jähuä päömä ucutä cuamönä ʼquiyönä cueseta päʼö.
TÄCUNÄ TU̧HUO̧JUÄ̧CHÄ̧TU̧CUA̧
Dios I̧huȩnȩ Isäʼtänä Dios jȩä̧cuȩ päinöttö ji̧yȩcu̧nä̧ huo̧juä̧chi̧. Pi̧yȩ huȩnȩ korotörö tocu ppädaʼa ja̧ päʼöʼinä topi.
4. Dios I̧huȩnȩ Isäʼtä päaʼa surojö juiyönä ʼcuäopönä tö̧ja̧cuä̧cuo̧tö̧jä̧ päʼö esetö tta̧tä̧rö̧ʼa̧nö̧ ja̧ʼa̧
Dios jȩä̧cuȩ päinö dȩa̧ʼa̧nä̧ räopö topi. ¿Ti̧yȩ cujöʼcönä ja̧ʼa̧ttö̧? ¿Tocu päʼö?
Dios jȩä̧cuȩ päinö versículos ppeyänä räopö cucuocuätucu oʼcaʼa pi̧yȩ jähuäʼinä ucuocuäcuähuätucui:
-
Pi̧yȩ versículos, ¿esetö tta̧cu̧huä̧ra̧ päʼö ppädaʼa ja̧ʼa̧di̧? Cuahuaruhuärö cuamöcuädomenä, ¿jahuätöröʼinä ppädöʼa̧nö̧ ja̧ʼa̧di̧?
Ja̧ʼhua̧nö̧ jo̧mȩ cu̧ja̧ʼa̧ amöcuädi
|
YA̧TȨʼI̧NÄ̧... |
OʼCA TOIʼÖNÄ... |
|---|---|
|
|
|
|
|
|
|
|
|
|
5. Esetö tta̧tä̧rö̧ Dios I̧huȩnȩ Isäʼtänä räopö adiu tö̧ja̧ päʼö ppädöʼa̧nö̧ ja̧ʼa̧
Recuätö ttö̧ja̧ pi̧jä̧ rȩjȩnä̧ rö̧ȩnä̧ huȩnȩ ka̧ʼa̧ttö̧ ttami surunä ja̧ʼa̧. Yotöcunämä oʼca juiyö adihuächa päʼö jȩpö̧ juruhuächätö. Dios I̧huȩnȩ Isäʼtä päö oʼca juiyönä adihuächäcuaʼa päʼömä recuätörö tocu jö̧nä̧ ppädaʼa ja̧ päʼö topi. VIDEO topätucui, ja̧u̧nu̧ oʼcaʼa pi̧yȩ jähuäʼinä ucuocuäcuähuätucui:
-
Video tocuʼäji taʼanö, Rafikarö, ¿däje jueönä jȩä̧cuä̧huo̧cö̧ ka̧ʼcua̧ rojecunä jȩi̧na̧ʼa̧ttö̧?
-
Jueönä jȩä̧cuä̧huo̧cö̧ siähuächocaʼa tojocaʼanä, Dios I̧huȩnȩ Isäʼtä yajuru, ¿tocu ppädinaʼattö?
Dios I̧huȩnȩ Isäʼtä päömä huȩnȩ ka̧ʼa̧nä̧ ta̧ʼcua̧ rotecu juiya päʼöʼinä, eseu tö̧ja̧ päʼöʼinä ppädaʼa. Proverbios 17:22, Romanos 12:12 cucuocuätucu oʼcaʼa pi̧yȩ jähuäʼinä ucuocuäcuähuätucui:
-
Ucu päcumä, ¿esetö tta̧tä̧rö̧ Dios I̧huȩnȩ Isäʼtänä räopö, jitä pä̧nä̧ adiu cu̧ja̧ päʼö ppädöʼa̧nö̧ ja̧ʼa̧di̧? ¿Tocu päʼö?
YOTÖCUNÄ PÄʼÄTÖ: “Dios I̧huȩnȩ Isäʼtä päömä adiu jiähuaʼanä, yaparetä ja̧ʼa̧”.
-
Dios I̧huȩnȩ Isäʼtä ʼcuäopä̧cuȩ jähuä jiäu ucutä cu̧huo̧juä̧cha̧ päʼö, ¿tocu päʼö rö̧ȩnä̧ micuähuaʼattö?
CA̧CA̧TI̧PÖ̧ UCUOCUÄCUÄHUÄ
Dios I̧huȩnȩ Isäʼtä jiähuaʼa yodojinänö eseutä tö̧ja̧cuä̧cuo̧tö̧jä̧ päʼö. Pi̧yȩ esetö tta̧tä̧ra̧ʼa̧ttö̧ jitä pä̧nä̧ ʼquiyome päteʼö ʼcuätopaʼanä adiu tö̧ja̧ päʼö ppädaʼa.
Cu̧huo̧juä̧chä̧ji̧ jiʼähui
-
Dios jȩä̧cuȩ päinö, ¿tocu päʼö oʼca toiʼönä ttu̧huo̧jua̧ päʼö recuä rö̧ja̧ʼa̧ttö̧?
-
Yodojinänö ttö̧jä̧cuȩ jähuä Dios I̧huȩnȩ Isäʼtä, ¿däje jiähuaʼattö?
-
Jitä esetö tta̧cu̧huä̧ro̧mȩnä̧, ¿tta̧ʼa̧nö̧ ppädöʼa̧nö̧ ja̧ʼa̧ttö̧?
KOROʼINÄ KA̧ʼA̧
Esetö tta̧tä̧rö̧ rö̧ȩnä̧ ppädaʼa päʼö juhuaʼa yabocu huo̧juä̧chi̧.
“Esetö tta̧huä̧rä̧cuä̧huä̧: ¿torö tö̧ʼo̧cui̧ʼö̧ʼa̧nö̧ ja̧ʼa̧ttö̧?” (¡Despertad!, abril 22, 2004)
Ttumärichei juruʼucu kä̧tö̧rö̧ esetö tta̧ttä̧rö̧ tocu ppädäʼijaʼa päʼö huo̧juä̧chi̧.
Videonä ra̧huä̧huä̧ i̧jȩcuä̧ tocuʼaʼanä, pi̧jä̧ a̧ʼcua̧cuä̧chö̧ oʼcaʼa cuahuaruhuäcu cu̧ja̧ʼa̧ päʼö amöcuädi.
Ya̧tȩ jueönä jȩä̧cuä̧huo̧cö̧ pärou icua päʼö juruhuächönö aditinömä, Dios I̧huȩnȩ Isäʼtä päö tocu ö̧jö̧ pärohuächinaʼa ja̧ päʼö ucuocui.
“Pi̧jä̧nä̧ ʼcuäopö täcö pärou chicua päʼö amöcuädocösä” (To̧pä̧rö̧ Jiähuäʼtä, Julio 1, 2013)
