Pojänä a̧ʼcua̧juä̧ räopö Jeohua ötöʼcö jähuä jiʼähuätö adiu tta̧ʼcua̧cui̧ʼa̧ʼa̧ ttö̧ca̧ca̧cuä̧ro̧mȩra̧ʼa̧ tti̧ʼcha̧ päʼö, ¿tocuʼaʼa ja̧ʼa̧di̧? ¿Tta̧ʼa̧nö̧ päʼö adiu ʼca̧tä̧u̧ tadicuiʼaʼattö?

Diosrö tucuotaʼattö. Diosmä huämenä tu̧ju̧nä̧rö̧tä̧mä̧ topocö (1 Samuel 16:7). Ja̧ʼhua̧nö̧ ja̧ʼa̧nä̧ ucuo tetähuarö päʼö tö̧ca̧ca̧cuä̧ro̧mȩnä̧ pä̧huä̧ rö̧jä̧u̧jä̧ Ja̧u̧ru̧ʼi̧nä̧, tö̧jä̧hua̧tö̧rö̧ʼi̧nä̧ adiunä ʼca̧tä̧u̧ ucuotäcuähuä ti̧jȩpa̧ päʼö. Huȩnȩtö̧ pätöʼa̧nö̧ ja̧ʼa̧, ya̧tȩ ru̧hua̧ äʼca jo̧mȩ tucuocua päʼö jö̧ttö̧mä̧, pide ucuo i̧sa̧ ja̧ʼa̧ttö̧ ucuotäcuähuä ti̧jȩpa̧rö̧ päʼö teönä a̧ʼcua̧cui̧ʼö̧ ti̧ʼcha̧ päʼö juruhuächätöjä. Juhuaʼa jö̧ taʼanö, tö̧ca̧ca̧cuä̧ro̧mȩra̧ʼa̧ a̧ʼcua̧cui̧ʼö̧ ti̧ʼcho̧mȩnä̧, Jeohuarö “ʼcuäopönä Tu̧ru̧hua̧ päiʼönä kö̧rö̧”, ucuotäcuähuä i̧jȩpä̧tö̧jä̧, ja̧ʼhua̧ta̧nö̧ ucuo tetähuomeʼinä ucuotätöjä (1 Timoteo 1:17).

Dios I̧huȩnȩ Isäʼtä päö taʼanö jȩpö̧ tucuotaʼattö. Dios I̧huȩnȩ Isäʼtä päaʼa Jesúsru esetätömä “ucuotönö amöcuädöʼinä, ttu̧ʼȩpä̧rö̧nö̧ jueönä amöcuädöʼinä” jȩpö̧ tö̧ʼca̧tä̧hua̧ päʼö ja̧ʼa̧ (1 Timoteo 2:9, 10, TNM). “Ucuotönö amöcuädö” pähuächaʼa tö̧ʼca̧tä̧huo̧mȩnä̧ pö̧jä̧ta̧ rö̧ȩnä̧ micuähuä̧ta̧ʼi̧nä̧, ʼco̧ʼö̧nä̧ ʼca̧tä̧u̧ʼi̧nä̧, beönä rä̧ta̧ ʼca̧tä̧u̧ tidepä i̧jȩcuä̧chö̧nä̧ʼi̧nä̧ tö̧ʼca̧tä̧hua̧ päʼömä jo̧ca̧ʼa̧ päʼö. Ja̧ʼhua̧ta̧nö̧ “ttu̧ʼȩpä̧rö̧nö̧ jueönä amöcuädö” pähuächaʼa, sä̧ʼȩcuo̧co̧tö̧ʼi̧nä̧, ja̧ʼa̧tä̧ päteʼöra̧ʼa̧ ʼca̧tä̧huä̧tö̧ʼi̧nä̧, surojönä a̧ʼcua̧cui̧ʼä̧tö̧ʼi̧nä̧ jȩttö̧ taʼanö jȩpo̧co̧tö̧jä̧ päʼö. Pärocuaʼacu tö̧ʼca̧tä̧huo̧mȩnä̧ korotö pä̧huä̧ rö̧jö̧nä̧ tottönä ʼca̧tä̧huä̧tö̧jä̧. Dios I̧huȩnȩ Isäʼtä pi̧yȩ huo̧juȩta̧ʼa̧nä̧ ya̧tȩ pö̧nä̧ töʼojopöʼa̧nö̧ ja̧ʼa̧ tocu jö̧nä̧ tö̧ʼca̧tä̧hua̧ pätaʼattö. Dios päö taʼanö tö̧ʼca̧tä̧huo̧mȩnä̧ ppädaʼa “Tu̧ru̧hua̧ i̧huȩnȩ, iso päiʼönä huȩnȩ ja̧ʼa̧” päʼö ttesehua päʼö, ujutu pätocaʼanä (Tito 2:10; 1 Pedro 2:12). Tö̧ca̧ca̧cuä̧ro̧mȩra̧ʼa̧ adiu a̧ʼcua̧cui̧ʼö̧ ti̧ʼcho̧mȩnä̧ ppädaʼa korotö ttö̧ja̧ Jeohua umöhuäyotörö adiu amöcuädö ttucuotönä.

Dios Uruhuo Huo̧jui̧cuodera̧ʼa̧ cui̧ʼcha̧ päʼömä recuä rö̧jo̧ca̧ʼa̧ pö̧jä̧ta̧ ja̧rȩä̧ta̧ʼi̧nä̧, abo ʼcuäoiʼönä a̧di̧huä̧ta̧ʼi̧nä̧ cu̧ʼca̧tä̧hua̧ päʼömä. Cu̧ʼca̧tä̧huä̧ta̧ tä̧bo̧sä̧ta̧ ja̧ʼa̧nä̧ʼi̧nä̧ teönä cui̧ʼchö̧ʼa̧nö̧ ja̧ʼa̧.

• Diosrö ucuo tetähuomenä, ¿tta̧ʼa̧nö̧ päʼö rö̧ȩnä̧ micuähuaʼattö adiu tö̧ʼca̧tä̧hua̧ päʼömä?

• Adiunä tö̧ʼca̧tä̧hua̧ päʼömä, ¿tocu ppädöʼa̧nö̧ ja̧ʼa̧ttö̧ Dios I̧huȩnȩ Isäʼtä päömä?