“Ko̧ro̧jä̧ tti̧rȩjä̧nä̧ ka̧cuä̧tö̧rö̧ʼi̧nä̧, pi̧jä̧ pa̧ja̧cu̧nä̧ ttö̧ja̧rö̧ʼi̧nä̧, tti̧huȩnȩ pö̧nä̧ ucuocuätöröʼinä, oʼca juiyönä ötahuiyä ttö̧ja̧rö̧ʼi̧nä̧” adihuä huȩnȩ jitähua päʼömä, 1.000nö jo̧mȩ abonänö tti̧huȩnȩ pö̧nä̧ cuyäru oʼtä räʼepätöjä (Apocalipsis 14:6). Pi̧yȩ oʼca juiyö, ¿tocu jö̧nä̧ taditaʼattö? Yotöcunä tö̧jä̧hua̧tö̧ äcuomenäji huȩyu̧tä̧tö̧, ja̧u̧nu̧ oʼcomenä korotö tti̧huȩnȩ pö̧nä̧ eseunu toppo rö̧jö̧nä̧ räʼepö icuätö. Pitö oʼca toiʼönämä Jeohua ötöʼcö jähuä jiʼähuätö ja̧ʼa̧.

Äcuomenä huȩyu̧cuä̧mä̧ inglés tti̧huȩnȩnä̧ huȩyu̧tä̧tö̧. Huȩyu̧cuä̧ Ttaditomemä Jueipä kadaʼca isodenä ka̧ʼa̧, porö adicuämä ujuturu Oʼipö Juȩʼȩpä̧rä̧tö̧mä̧ to̧pä̧rö̧ oʼipätö. Huȩyu̧cuä̧ Ttaditome aditätömä oʼipätö cuyäru oʼtä rätepö huȩyu̧tä̧tö̧rö̧, pi̧yȩ aditätömä Jueipä kadaʼca isodenäʼinä, tti̧rȩjä̧ pö̧nä̧ Isode Juȩttȩpä̧rodenäʼinä aditä̧rä̧tö̧. Pitö huȩyu̧tä̧tö̧mä̧ tti̧huȩnȩʼi̧nä̧, ttihueyeʼinä i̧mi̧cu̧nä̧ ttu̧ju̧nä̧ra̧ʼa̧nä̧, pi̧yȩ rättepö oʼca toiʼönä tti̧rȩjä̧ pö̧nä̧ kä̧tö̧ köʼcönö totta päʼö ppädaʼa.

Huȩyu̧tu̧ cättädö oʼcaʼa tti̧huȩnȩ pö̧nä̧ räʼepö tticua päʼö hueʼätö. Tti̧huȩyu̧tä̧ji̧ jo̧mȩnö̧ jȩpö̧ ku̧nu̧ adiu ki̧o̧mȩ jubö jȩpä̧jä̧ʼcotö, correonä hueʼätö pi̧jä̧ pa̧ja̧cu̧nä̧ tti̧huȩnȩ pö̧nä̧ huȩyu̧tu̧ räʼepö icuätörö. Pitömä inglés tti̧huȩnȩnä̧ jiäu taʼanötä huäjunä ttamönä tti̧huȩnȩnä̧ ttucuocu taʼanö räʼepö tticua päʼö juruhuächätö (Eclesiastés 12:10). Pi̧yȩ jȩpö̧ cäʼädiʼcotö, tti̧huȩyu̧tä̧ji̧ ppa̧ʼä̧dä̧rö̧ ucuocuätö jäyä räopö juiyäcuaʼa̧nö̧. Ja̧u̧nu̧ oʼcaʼa imprimi pätta päʼö hueʼätö.

Computadoramä ppädaʼa pi̧yȩ jurunä ttadita päʼö. Ya̧tȩ huȩyu̧tu̧ jȩö̧ʼi̧nä̧, tti̧huȩnȩ pö̧nä̧ huȩyu̧tu̧ räʼepö icu jȩä̧cuä̧huä̧ʼi̧nä̧ computadoramä a̧ʼcua̧ ko̧mȩnä̧ jȩo̧ca̧ʼa̧. Ja̧ʼhua̧nö̧ ja̧ʼa̧nä̧ computadoramä rö̧ȩnä̧ ppädöʼa̧nö̧ ja̧ʼa̧ usu diccionarionäʼinä, koro programaʼinä, juhuaʼa yabocu jurunänö ttadita päʼö. Jeohua ötöʼcö jähuä jiʼähuätömä Programa Electrónico Tti̧huȩnȩ pö̧nä̧ Räopa päʼö Ppädö päʼö micu ujututä räʼepinätöjä (MEPS, inglés tti̧huȩnȩttö̧ ichaʼa). Pi̧yȩ programamä ppädaʼa computadoranä recuätö tti̧huȩnȩnä̧ tti̧huȩyu̧ta̧ päʼöʼinä, ja̧ʼhua̧ta̧nö̧ huȩyu̧cuä̧ a̧ʼcua̧juä̧cu̧ aditö ttu̧ju̧na̧ päʼöʼinä, imprimi pättomenä adiu räopa päʼö.

Yotöcunä tti̧huȩnȩ pi̧jä̧ pa̧ja̧cu̧nä̧ a̧ʼu̧cu̧nä̧tä̧ ttucuocu ja̧ʼa̧nä̧, pitö tti̧huȩnȩnä̧ʼi̧nä̧ huȩyu̧tu̧ räʼepö icuätöjä. ¿Tocu päʼö pi̧yȩ jȩpö̧ tujuruhuächaʼattö? Jeohuamä “pä̧huä̧ rö̧jä̧cu̧ oʼca toiʼönä ttö̧ja̧ ttesetarö päʼö. Ja̧ʼhua̧ta̧nö̧ pä̧huä̧ rö̧jä̧cu̧ iso päiʼönä huȩnȩ ttu̧huo̧jua̧ päʼö” (1 Timoteo 2:3, 4).

• Rätepö adiunä räopa päʼömä, ¿däje jȩta̧ʼa̧ttö̧?

• Tti̧huȩnȩ pö̧nä̧, ¿tocu päʼö rö̧ȩnä̧ rätepaʼattö?