Jeohua ötöʼcö jähuä jiʼähuätömä Dios I̧huȩnȩ adiunä ttu̧huo̧juä̧chi̧ʼa̧ päʼö juruhuächätö. Ja̧ʼhua̧nö̧ ja̧ʼa̧ttö̧ huo̧jui̧cuo̧mȩ ka̧ʼa̧ Dios aditähuänä ʼcuäopönä aditätö adiunä ttadita päʼö ttu̧huo̧juä̧cho̧mȩ (2 Timoteo 4:5).

Jiʼäu mä̧nä̧ baʼepätö Huo̧jui̧cuä̧. Pitömä, aditö ttö̧jä̧mä̧di̧no̧mȩttö̧ yaʼute a̧ʼȩ päiʼomenä ttu̧huo̧jui̧ʼa̧ päʼö ttä̧tȩpä̧u̧ 6nö mo̧ro̧ jo̧mȩnä̧, pi̧yȩ huo̧jui̧pä̧tö̧ Dios Uruhuo Huo̧jui̧cuode jacuättö. Ja̧u̧ huo̧jui̧cuä̧ Jeohuarö ttötöʼcöhuächa päʼöʼinä, Dios I̧huȩnȩ jähuänä juhuaʼa yabocu adiunä ttadita päʼöʼinä cättädiʼö juiyönä ppädaʼa.

Dios Uruhuo adicuä ttö̧ja̧ Huo̧jui̧cuä̧. Pi̧yȩ huo̧jui̧cuä̧nä̧ todäre kä̧hua̧ päiʼönä huo̧jui̧pä̧tö̧, pȩnȩ tti̧ʼchö̧ʼa̧nö̧ ja̧ʼa̧ ttirecuo ku̧nä̧rä̧tö̧ʼi̧nä̧, ttirecuo toʼätö nä̧tö̧ʼi̧nä̧, u̧mä̧tö̧ʼi̧nä̧. Tti̧ʼchä̧cua̧ʼa̧ äʼcanä recuo a̧ʼȩ jiʼäu mä̧nä̧ baecuä ttö̧ja̧ päiʼönä ttadita päʼö ja̧ʼa̧. Ttöäre a̧ʼȩ ttu̧ju̧nä̧ra̧ päʼö ja̧ʼa̧ 23ttö kä̧mä̧dö̧ 65 a̧ʼȩ jubö cäʼädö. Jittähua päʼö abonänö recuä rö̧jo̧mȩ jahuätörö huettöttömä eseunu tti̧ʼcha̧ päʼö ja̧ʼa̧. Jesucristo jȩi̧nö̧ taʼanö jȩtta̧ päʼö, päʼätö “Ttötä ja̧ʼa̧, hueʼittö” (Isaías 6:8; Juan 7:29). Huettome, äʼcoji ttö̧ji̧nö̧ttö̧ʼi̧nä̧ i̧mi̧cu̧nä̧ ja̧ʼa̧nä̧, pȩnȩ ttö̧ja̧ ttihueye ttö̧jö̧ʼa̧nö̧ʼi̧nä̧, tti̧huȩnȩ ttucuocuʼa̧nö̧ʼi̧nä̧ huo̧jui̧pö̧ jȩtta̧ päʼö ja̧ʼa̧. Ja̧ʼhua̧nö̧ ja̧ʼa̧ttö̧ pi̧yȩ huo̧jui̧cuo̧mȩttö̧ Dios öadihuä ttu̧huo̧juä̧chä̧cuo̧tö̧, huettome kä̧nö̧ tta̧ʼcua̧ ttu̧huȩnä̧rö̧ jähuänä korotöröʼinä, ttö̧jä̧hua̧tö̧rö̧ʼi̧nä̧, Jeohua aditähuänäʼinä ppättäda päʼö.

Watchtower Galaad Dios I̧huȩnȩ Huo̧jui̧cuä̧. 1943 a̧ʼȩttö̧ kä̧mä̧dö̧ jitä pä̧nä̧ jubö 8.000 abonänö tö̧jä̧hua̧tö̧, ko̧ro̧jä̧ rȩjȩra̧ʼa̧ jittähua päʼö hueʼähuotö päiʼönä, pi̧yȩ huo̧jui̧cuä̧ttö̧ räʼopäʼijätö pi̧jä̧ pa̧ja̧cu̧nä̧ Dios I̧huȩnȩ jittähua päʼö, Dios umöhuäyotö ttirecuächönä rö̧ȩnä̧ ppäʼädäʼijätö (Hechos 13:47). Pitömä 5nö kä̧hua̧ jo̧mȩnä̧ Dios I̧huȩnȩ Isäʼtä jähuä täcunä huo̧jui̧pä̧tö̧ jo̧mȩnö̧ pättiʼa päʼö, Jeohua Chutä aditähuänä pi̧jä̧ pa̧ja̧cu̧nä̧ aditö Churutä esetäcuähuä ʼquiyönä ka̧ päʼö. Ja̧u̧ huo̧jui̧cuo̧mȩ ä̧tȩpä̧tö̧ recuä rö̧jo̧mȩ jittähua päʼö hueʼähuotöröʼinä, ko̧ro̧jä̧ rȩjȩra̧ʼa̧ jittähua päʼö hueʼähuotöröʼinä, circuito to̧pä̧rä̧tö̧rö̧ʼi̧nä̧, tti̧rȩjä̧ pö̧nä̧ Isode Juȩttȩpä̧rode pättodenä kä̧tö̧rö̧ʼi̧nä̧. Pitöttö yotöcunä Perúra̧ʼa̧ äcuomenä tti̧rȩbȩhuo̧mȩnä̧, yaʼate congregaciónʼinä juiyinaʼa, jitä pä̧nä̧ 1.000 abonänö ka̧ʼa̧. Ja̧ʼhua̧ta̧nö̧, Japónra̧ʼa̧ʼi̧nä̧ äcuomenä tti̧rȩbȩhuo̧mȩnä̧, Jeohua ötöʼcö jähuä jiʼähuätömä 10nö huotö dȩa̧ʼa̧nä̧tä̧ huinätödo, jitä pä̧nä̧ 200.000 abonänö ka̧cuä̧tö̧.

• Jiʼäu mä̧nä̧ baʼepätö Huo̧jui̧cuä̧mä̧, ¿tocu jö̧nä̧ ppädaʼattö?

• Dios Uruhuo adicuä ttö̧ja̧ Huo̧jui̧cuä̧ jȩtto̧mȩ, ¿titö ttu̧huo̧jui̧ʼö̧ʼa̧nö̧ ja̧ʼa̧ttö̧?