Tö̧ca̧ca̧cuä̧ro̧mȩmä̧, Dios Uruhuo huȩnȩcu̧ todeunä jö̧nä̧ tu̧huo̧juä̧cha̧ʼa̧ttö̧, Dios Uruhuo Huo̧jui̧cuode päʼö oʼätöjä. Jesúsʼinä pi̧yȩ huȩnȩ korottöʼinä abonänö juiyo jiʼähuinö (Lucas 8:1).

Aditätö ttidepiyu pö̧nä̧ Diosrö iso päiʼönä ucuo tettäu ode ka̧ päʼö. Porö adihuä huȩnȩ jiʼäu cueächäcuähuä adiu räopa päʼö oʼipätö (Mateo 24:14). Pi̧yȩ odemä, koronömä rö̧odeʼinä, a̧ʼu̧cuodeʼinä aditätö, ja̧ʼhua̧ta̧nö̧ abo cuäoiʼönä ja̧ʼa̧tä̧ a̧ʼcua̧cuo̧cö̧ ode. Pi̧yȩ ji̧yȩcu̧nä̧ odettömä, rö̧ȩnä̧ congregación ca̧ca̧cuä̧rä̧tö̧. Jitä pä̧nä̧mä̧ pi̧jä̧ pa̧ja̧cu̧nä̧ 28.000nö ode abonänö aditäʼijätöjä (mo̧ro̧ jö̧ taʼanö 5nö ode abonänöcö̧, pabonänöcö̧ aditä̧rä̧tö̧jä̧), rö̧ȩnä̧ tirecuächaʼattö. Pi̧yȩmä̧, ¿tocu jö̧nä̧ iso juotepaʼattö? (Mateo 19:26).

Ttö̧ja̧ ttamönä amöcuädö ttiyöttö ȩmö̧ pi̧yȩ odemä aditätö. Pi̧yȩ pärätä ttiyömä isode juȩttȩpä̧rode pättodera̧ʼa̧ hueʼätö, ttö̧ca̧ca̧cuä̧ra̧ päʼö recuä rö̧jo̧mȩ ttiya päʼö. Pi̧yȩnä̧ ppäʼädätö Dios Uruhuo Huo̧jui̧cuode jareode ttadita päʼöʼinä, koronömä pärou aditö tticua päʼöʼinä.

Pi̧yȩ odemä tö̧jä̧hua̧tö̧ micuä juiyönä ttaditö ode ja̧ʼa̧. Yotöcunä tö̧jä̧hua̧tö̧mä̧ tti̧rȩjä̧ttö̧tä̧ oto ʼchä̧tö̧, korotö tö̧jä̧hua̧tö̧ ttö̧ca̧ca̧cuä̧rode ttadita päʼö, Dios Uruhuo huo̧jui̧cuä̧ odehuiyä ttadita päʼö hueʼähuotö päiʼönä ʼcuäopönä ttadita päʼö. Pi̧yȩ aditätöttö yotöcunämä ttadita päʼö pätecuächome jubötä aditätö. Ja̧ʼhua̧ta̧nö̧ aditö tti̧ʼcho̧mȩ, ju̧huȩnȩ kä̧tö̧ tö̧jä̧hua̧tö̧ʼi̧nä̧ aditö ppäʼädätö. Ko̧ro̧jä̧ rȩjȩra̧ʼa̧ttö̧mä̧ Jeohua ötöʼcö jähuä jiʼähuätö tö̧ca̧ca̧cuä̧rö̧ ode ttadita päʼöʼinä, surojuoächode aditö tticua päʼöʼinä oʼipö juȩttȩpä̧ra̧ päʼö yotöcunä tö̧jä̧hua̧tö̧ pi̧yȩ adicuä huo̧juä̧tö̧rö̧ oʼö ku̧nä̧tö̧. Pi̧yȩ oʼca juiyö aditäʼijätö Jeohua umöhuäyotömä, Chutä ujuru aditä̧ra̧ʼa̧nä̧ juhuaʼa yabocu aditö ttujuruhuächaʼattö (Salmo 127:1; Colosenses 3:23, TNM).

• Tö̧ca̧ca̧cuä̧ro̧mȩmä̧, ¿tocu päʼö Dios Uruhuo Huo̧jui̧cuode päʼö otaʼattö?

• Pi̧jä̧ pa̧ja̧cu̧nä̧ Dios Uruhuo Huo̧jui̧cuä̧ odemä, ¿tocu jö̧nä̧ iso juotepäʼijaʼattö?