Dios I̧huȩnȩ Isäʼtänä yaʼate versículocö̧, mo täbocö ya̧tȩ Diosrö esetörö ʼcuäopinö huȩnȩcö̧, däje ʼcuäopinaʼattö, torö ʼcuäopinaʼattö, pi̧yȩ jähuä cu̧huo̧juo̧mȩttö̧ʼi̧nä̧ abonänö, ¿juhuaʼa yabocu cu̧huo̧jua̧ päcuhuaʼa? Koronömä jäecuäʼijä a̧ʼcua̧ra̧ʼa̧, ¿Dios I̧huȩnȩ Isäʼtä huȩnȩ ʼcuädopomenä ppädöʼa̧nö̧ ja̧ʼa̧di̧? Pi̧yȩ jäcuhuecu iso päiʼönä jö̧ttö̧mä̧, Dios Uruhuo Huo̧jui̧cuode jacuättö cuyäru oʼtä ku̧nä̧huo̧mȩ ädätäcuähuä cusuʼa̧nö̧ ja̧ʼa̧.

Cuyäru oʼtä ku̧nä̧huo̧mȩ rö̧ȩnä̧ ka̧ʼa̧ huo̧jui̧pö̧ cusa päʼö. Jeohua ötöʼcö jähuä jiʼähuätö röji ja̧ʼa̧cu̧ rätepinö, Dios Uruhuo Huo̧jui̧cuode jacuättö cuyäru oʼtä ku̧nä̧huo̧mȩ ka̧ʼa̧, ja̧ʼhua̧ta̧nö̧ korotö Dios I̧huȩnȩ oʼtä rättepäʼijöʼinä, diccionarioʼinä, koro oʼtäʼinä ka̧ʼa̧. Pi̧yȩ oʼca juiyö säbäräri tti̧huȩnȩnä̧ ka̧ʼa̧nä̧, porö cu̧huo̧jui̧ʼa̧ päcu usu cu̧huo̧jui̧ʼö̧ʼa̧nö̧ ja̧ʼa̧ ca̧ca̧cuä̧rö̧ tö̧jä̧mä̧dä̧cua̧ʼa̧ äʼcanäʼinä, cätädomenäʼinä. Pȩnȩ computadora kö̧ttö̧mä̧ programa Watchtower Library pättö huaʼadö ku̧nä̧hua̧ʼa̧ ka̧ʼa̧ a̧ʼcua̧ra̧ʼa̧. Pi̧yȩ programanä rätepäʼijö oʼca juiyö ko̧ca̧ʼa̧nä̧, rätepäʼijö rö̧ȩnä̧ iʼcächaʼa, cu̧huo̧jua̧ päcuʼinä jeruʼu juiyönä cusa päʼö iʼcächaʼa. Ja̧ʼhua̧ta̧nö̧, Internetnä Cuyäru oʼtä Ku̧nä̧huo̧mȩ huo̧ttö̧ja̧ cui̧huȩnȩnä̧ ka̧ʼa̧, cusa päcu cu̧ʼo̧cui̧ʼa̧ päʼö.

Tö̧ca̧ca̧cuä̧ro̧mȩttö̧ Tö̧jö̧ jähuäʼinä, Taditähuä jähuäʼinä cu̧huo̧jui̧ʼa̧ päʼö ppädaʼa. Korotö ttäʼca jo̧mȩttö̧ jicuhuähuä̧cuȩ jo̧mȩnö̧ jȩpö̧ cu̧ju̧na̧ päʼö cuyäru oʼtä ku̧nä̧huo̧mȩ ka̧cu̧ ppädöʼa̧nö̧ ja̧ʼa̧. Tö̧jö̧ jähuäʼinä, Taditähuä jähuäʼinä huo̧jui̧cuä̧ to̧ä̧rä̧cuä̧huä̧ i̧sa̧ ja̧ʼa̧ pȩnȩ tta̧ʼä̧rö̧mä̧, pidemä röjinä rätepö jo̧mȩnö̧ kö̧nä̧ʼi̧nä̧, aditö ttu̧ju̧na̧ päʼöʼinä to̧pä̧rö̧. Pide to̧ä̧rä̧cuä̧huä̧ i̧sa̧cö̧, ucurutä huo̧juȩtö̧cö̧ ppädöʼa̧nö̧ ja̧ʼa̧ tocu jö̧nä̧ cusuʼa̧nö̧ ja̧ʼa̧ttö̧ cu̧ʼo̧cui̧ʼa̧ päcu. Po̧ca̧ jacuä ka̧cu̧mä̧ cuojusodera̧ʼa̧ cuȩpa̧ päʼömä hueʼähuocaʼa. Ja̧ʼhua̧ta̧nö̧, pi̧yȩ oʼtämä ttu̧ȩcuä̧nä̧ tta̧cu̧huä̧ra̧ päʼö ja̧ʼa̧, cusara päʼöʼinä jo̧ca̧ʼa̧.

Dios I̧huȩnȩ Isäʼtä päaʼa “rö̧ȩnä̧ micuäu juäi däjö icuähuä” juruhuächiʼönö ttusu taʼanö, “Diosttö huo̧juä̧huä̧” juruhuächiʼönö tusa päʼö ja̧ʼa̧ tö̧ʼo̧cui̧ʼa̧ päʼömä (Proverbios 2:1-5). Cusa päcu pode jacuättö usu cu̧jä̧mä̧dö̧ʼa̧nö̧ ja̧ʼa̧.

• Dios Uruhuo Huo̧jui̧cuode jacuättö cuyäru oʼtä ku̧nä̧huo̧mȩ, ¿däje ka̧ʼa̧ttö̧ usu cu̧huo̧jui̧ʼa̧ päʼömä?

• Cuyäru oʼtä ku̧nä̧huo̧mȩ cusu adiunä cu̧ʼo̧cui̧ʼa̧ päʼö, ¿di ppädöʼa̧nö̧ ja̧ʼa̧ttö̧ ucurumä?