Dios I̧huȩnȩ Isäʼtä jiähuinaʼa Jesucristo ʼcorupäiʼinö oʼcaʼa Jesúsru esetätö ttö̧ʼquȩtȩttö̧ yapare huo̧juȩcuä̧ ttö̧ja̧ ttichäcuotö päʼö, iso päiʼönä huȩnȩ piʼtänä ka̧cu̧ jerutu tticua päʼö (Hechos 20:29, 30). Ja̧ʼhua̧nö̧tä̧ ʼcuäopinaʼa: ttamönä ttesetö jähuä Jesús u̧huo̧juȩtö̧cu̧ huihuatö icuinätö. Amönä yapare Jesúsru esetäcuähuä kä̧mä̧di̧na̧ʼa̧ (2 Timoteo 4:3, 4). Ja̧ʼhua̧nö̧ ja̧ʼa̧ttö̧ jitä mo̧ro̧, ¿tocu jö̧nä̧ tu̧huo̧ju̧ʼa̧nö̧ ja̧ʼa̧ttö̧ Dios I̧huȩnȩ Isäʼtänä ka̧cu̧ jueönä huo̧juä̧chä̧tö̧jä̧ päʼömä?

Jeohua iso päiʼönä huȩnȩ i̧jȩpä̧cuȩ mo̧ro̧ rȩbȩhui̧na̧ʼa̧. Jeohuamä jiʼähuinödo röji pä̧nä̧ päiʼomenä “iso päiʼönä huo̧juä̧huä̧ rö̧ä̧chä̧cua̧ʼa̧” päʼö (Daniel 12:4). 1870 a̧ʼȩnä̧, a̧ʼu̧cu̧nä̧tä̧ huotö u̧mä̧tö̧ iso päiʼönä huȩnȩ usätömä topinätö iglesiattö ttu̧huo̧juȩtö̧mä̧ Dios I̧huȩnȩ Isäʼtänä räopocaʼa päʼö. Pi̧yȩ jȩi̧na̧ʼa̧ äcuomenäji Dios I̧huȩnȩ Isäʼtänä räopinö täcunä usu ttu̧huo̧jui̧ʼa̧ päʼö. Pi̧yȩ jȩtta̧ʼa̧ topö Jeohuamä ttu̧huo̧juä̧chi̧ʼö̧nä̧ ppädinä̧u̧do.

U̧mä̧tö̧ adihuä isotö ttu̧ȩcuä̧nä̧ Dios I̧huȩnȩ Isäʼtä huo̧jui̧pi̧nä̧tö̧. Pitö Dios I̧huȩnȩ Isäʼtä Huo̧jui̧cuä̧ Ttö̧ja̧ päʼö micuinätömä, ujutu täʼcanä aditinätömä, huo̧jui̧cuä̧ pö̧nä̧ ʼquȩʼȩpö̧ ku̧nu̧ Dios I̧huȩnȩ Isäʼtä huo̧jui̧pi̧nä̧tö̧, jitä pä̧nä̧ ujutuʼinä ja̧ʼhua̧nö̧tä̧ huo̧jui̧pä̧tö̧jä̧. Jahuätö ttu̧huo̧jui̧ʼo̧mȩnä̧ jeruhuome tti̧rȩbȩhuo̧mȩnä̧ koro versículo ja̧u̧cu̧ todeunä jö̧ usinätö huäjunä ttu̧huo̧juä̧chi̧ʼa̧ päʼö. Pi̧yȩ Dios I̧huȩnȩ Isäʼtä oʼca juiyönä ka̧cu̧cu̧ toʼojicu jiähuocaʼa päʼö tottomenä huȩyu̧tu̧ rötinätödo. Ja̧ʼhua̧nö̧ jȩtto̧mȩnä̧ Dios I̧huȩnȩ Isäʼtä jahuätörö oipaʼanä jaropäcuähuinätö, ttamönä ttamöcuädömä̧cö̧. Iso päiʼönä huȩnȩ päʼäji taʼanö po̧cui̧pi̧nä̧tö̧, Dios i̧mi̧ʼi̧nä̧, Uruhuo huȩnȩʼi̧nä̧, äcuomenä Dios ttö̧ja̧ pi̧jä̧nä̧ jȩtta̧ päʼö amöcuädinö huȩnȩʼi̧nä̧, ttö̧ja̧ ʼcorujuottächö oʼcaʼa ʼcuäopö huȩnȩʼi̧nä̧, ja̧ʼhua̧ta̧nö̧ ttottächä̧cuȩ huȩnȩʼi̧nä̧ po̧cui̧pi̧nä̧tö̧do. Ttu̧huo̧juä̧chi̧ʼi̧nö̧mä̧ Dios jähuättö yapare esetäcuähuättöʼinä, i̧mi̧cu̧nä̧ jȩä̧ʼchä̧cuä̧huä̧ttö̧ʼi̧nä̧ ejächiʼinätödo (Juan 8:31, 32).

1879 a̧ʼȩnä̧ pitömä ttu̧ʼȩpä̧rä̧chi̧ʼi̧nä̧tö̧do täcö iso päiʼönä huȩnȩ korotö ttu̧huo̧jua̧ päʼö jo̧mȩ päiʼaʼa päʼö. Ja̧ʼhua̧nö̧ ja̧ʼa̧ttö̧ ja̧u̧tä̧ a̧ʼȩnä̧ räʼepö kä̧mä̧di̧nä̧tö̧ cuyäruʼtä To̧pä̧rö̧ Jiähuäʼtä Jeohua Uruhuo jähuä päʼö micuäʼtämä. Jitä pä̧nä̧ jubö piʼtä räʼepätöjä. Jitä mo̧ro̧ 240 tti̧rȩjä̧ pö̧nä̧ʼi̧nä̧, 1.000nö jo̧mȩ abonänö tti̧huȩnȩ pö̧nä̧ʼi̧nä̧ iso päiʼönä huȩnȩ jiʼähuätöjä. ¡Jitä pä̧nä̧ äʼcoji ji̧nö̧ttö̧ʼi̧nä̧ abonänö rö̧ä̧cha̧ʼa̧ iso päiʼönä huȩnȩmä̧!

• Jesús ʼcorupäiʼinö oʼcaʼa iso päiʼönä huȩnȩ Dios I̧huȩnȩ Isäʼtänä ka̧cu̧mä̧, ¿däje ʼcuäopinaʼattö?

• Iso päiʼönä huȩnȩ, ¿tocu jö̧nä̧ päʼäji taʼanö tö̧ʼo̧cui̧ʼi̧na̧ʼa̧ttö̧?