Jesús hueʼähuotö ttö̧ji̧nö̧ pä̧nä̧, Jesúsru esetätömä ttö̧ca̧ca̧cuä̧ro̧mȩnä̧ Diosrö ra̧ʼä̧ʼi̧nä̧tö̧, Diosrö ucuocuäʼinätö, Huȩyu̧cuä̧ Huȩnȩʼi̧nä̧ ucuocu huo̧jui̧pä̧ʼi̧nä̧tö̧ (1 Corintios 14:26). Tö̧ca̧ca̧cuä̧ro̧mȩra̧ʼa̧ cuichomenä jahuätö jȩtti̧nö̧ taʼanö jȩta̧ʼa̧ to̧cu̧ʼä̧cua̧jä̧.

Dios I̧huȩnȩ Isäʼtä päö taʼanö jȩta̧ päʼö huo̧jui̧pä̧tö̧jä̧. Sábado mo̧ro̧cö̧, domingo mo̧ro̧cö̧, congregación pö̧nä̧ ca̧ca̧cuä̧rä̧tö̧jä̧ 30 minutos jo̧mȩnä̧ Dios I̧huȩnȩ Isäʼtättö ȩmö̧ jiäcuähuä tä̧ju̧cua̧ päʼö, mo̧ro̧ji̧nö̧ a̧ʼu̧cuä̧ jȩta̧ päʼö jö̧ huȩnȩʼi̧nä̧, jitä pä̧nä̧ tocu päʼö surojö ʼcuäopaʼattö päʼö huȩnȩʼi̧nä̧ tu̧huo̧juä̧cha̧ päʼö. Ichäjätörö ya̧tȩ jiʼäu ä̧tȩpö̧ ttamönä ttöäreʼtänä Dios I̧huȩnȩ Isäʼtä bäʼepö totta päʼö. Ja̧u̧nu̧ oʼcomenä, “To̧pä̧rö̧ Jiähuäʼtä” micuäʼtättö huo̧jui̧cuä̧ pättö yaʼate hora huo̧jui̧pä̧tö̧jä̧, huo̧jui̧cuä̧ oʼipömä ä̧tȩpö̧ oʼca toiʼönä ichäjätörö ttu̧mö̧ cäʼepö ttädäta päʼö. Pi̧yȩmä̧ ppädaʼa Dios I̧huȩnȩ Isäʼtä oipaʼanä jarotäcuähua päʼö. Pi̧jä̧ pa̧ja̧cu̧nä̧ 119.000 congregación jo̧mȩnä̧ abonänö ca̧ca̧cuä̧rä̧tö̧jä̧ yoräteunä Dios I̧huȩnȩ jähuä tu̧huo̧jui̧ʼa̧ päʼö.

Korotörö adiunä tu̧huo̧juȩta̧ päʼö huo̧jui̧pä̧tö̧jä̧. Semana käʼcottö yaʼute mo̧ro̧ ca̧ca̧cuä̧rä̧tö̧jä̧ huäbodäcuä jähuä tu̧huo̧jui̧ʼa̧ päʼö. Pi̧yȩmä̧ Jesúsru esetätö Tö̧jö̧ jähuäʼinä, Taditähuä jähuäʼinä päʼö oʼätöjä. Tu̧huo̧jui̧ʼä̧cuȩ Jesúsru esetätö Tö̧jö̧ jähuäʼinä, Taditähuä jähuäʼinä Tu̧huo̧jui̧ʼö̧ jähuänä Oipöjänä räopaʼa, pojämä kä̧hua̧ jö̧ taʼanö räʼepätö. Äcuomenä jähuä “Dios I̧huȩnȩ Isäʼtättö rö̧ȩnä̧ micuäu” päʼö oähuämä jȩpä̧tö̧jä̧ ji̧yȩcu̧nä̧ capítulo adiunä tu̧huo̧juä̧chi̧ʼa̧ päʼö, äʼcoji tojusodettö katä pö̧nä̧ ja̧u̧ capítulo pö̧nä̧ ucuocuätöjä. Todärenä päiʼönä, “Adihuä Huo̧juȩcuä̧ Ttö̧ja̧ Tätucua” päomettö yotöcunä jȩpö̧ tti̧jȩpa̧ʼa̧ topätöjä tocu jö̧nä̧ tucuocuʼa̧nö̧ ja̧ʼa̧ttö̧ korotöcu Dios I̧huȩnȩ Isäʼtä ötöʼcö jähuämä. Ya̧tȩ oʼipö, pitö jȩttö̧ topö ji̧ä̧huä̧cua̧ jȩta̧ päʼö jö̧, adiunä huȩyu̧cuä̧ tucuocua päʼöʼinä, korotörö jitähua päʼöʼinä (1 Timoteo 4:13). Huäbodäcuänä päiʼönä “Jesúsru esetätö Tö̧jö̧ jähuä” päomettö topätöjä tocu jö̧nä̧ Dios I̧huȩnȩ Isäʼtä päö taʼanö jȩtö̧ʼa̧nö̧ ja̧ʼa̧ttö̧ päʼö. Pi̧yȩ huo̧jui̧cuä̧nä̧ ya̧tȩ jäepaʼanä korotö ttu̧mö̧ cäʼepö ttädätomenä ppädaʼa Dios I̧huȩnȩ Isäʼtä päö täcunä tu̧huo̧juä̧chi̧ʼö̧nä̧.

Tö̧ca̧ca̧cuä̧ro̧mȩra̧ʼa̧ cuichomenä iso päiʼönä Dios I̧huȩnȩ Isäʼtä päö taʼanö ttu̧huo̧juȩta̧ʼa̧ huo̧juä̧chi̧ʼö̧ cuȩsȩhuä̧cua̧jä̧ (Juan 6:45).

• Jeohua ötöʼcö jähuä jiʼähuätö tö̧ca̧ca̧cuä̧ro̧mȩra̧ʼa̧ cuichomenä, ¿däje cu̧huo̧jui̧ʼä̧cua̧ʼa̧ttö̧?

• Tö̧ca̧ca̧cuä̧rö̧ mo̧ro̧ttö̧, ¿ti̧yȩ mo̧ro̧ cuicha päcuhuaʼattö?