¿Pitö ttöʼä eseunu i̧jȩcua̧ʼa̧ tocuʼaʼa? Asamblea jȩto̧mȩnä̧ ichö esehuätö. Mo täbocö hueähuiʼinaʼa Dios umöhuäyotörö a̧ʼȩ jö̧ taʼanö huäbodäcuänä jo̧mȩnä̧ ttö̧ca̧ca̧cuä̧ra̧ päʼö. Ja̧ʼhua̧nö̧ jȩpö̧ jahuätö ttesehuinö taʼanö, ujutuʼinä juiyo esehuätöjä tö̧jä̧hua̧tö̧ recuätöcu tö̧ca̧ca̧cuä̧ro̧mȩnä̧ (Deuteronomio 16:16). A̧ʼȩ jö̧ taʼanö huäbodäcuä jo̧mȩnä̧ ca̧ca̧cui̧pä̧tö̧jä̧: todäre asamblea circuito pätö jȩpä̧tö̧jä̧, pi̧yȩmä̧ yaʼatetä mo̧ro̧ jȩpä̧tö̧jä̧. Ja̧ʼhua̧ta̧nö̧ yaʼate asamblea regional pätö huäbodäcuä mo̧ro̧ jo̧mȩnä̧ jȩpä̧tö̧jä̧. ¿Tocu jö̧nä̧ ppädaʼattö pi̧yȩmä̧?

Tö̧jä̧hua̧tö̧cu̧ ji̧nä̧ yo̧mȩtȩ tö̧ja̧cu̧nä̧ ppädaʼattö. Israel ttö̧ja̧mä̧ Jeohuarö ttesehua päʼö “recuätö ji̧nä̧ yo̧mȩtȩ ttö̧ca̧ca̧cui̧ʼo̧mȩnä̧” tteseunä ji̧nä̧u̧. Ujuturuʼinä ja̧ʼhua̧nö̧tä̧ ja̧ʼa̧ tö̧jä̧hua̧tö̧cu̧ Jeohuarö ucuo tetähua päʼö tö̧ca̧ca̧cui̧ʼo̧mȩnä̧ (Salmo 26:12; 111:1). Pi̧yȩmä̧ ppädaʼa ujutucu, korotö Jeohua ötöʼcö jähuä jiʼähuätöcu ji̧nä̧ yo̧mȩtȩ tesehuäcuähua päʼö, pitömä koro congregaciónra̧ʼa̧ttö̧ʼi̧nä̧, ko̧ro̧jä̧ rȩjȩttö̧ʼi̧nä̧ ichätö. Ya̧cu̧ pö̧nä̧ tu̧cuȩ iʼcächätöjä kä̧hua̧ jueö päiʼomenä ji̧nä̧ yo̧mȩtȩ tucua päʼö, pi̧yȩmä̧ ppädaʼa repetäcuäu juhuaʼa yabocu rö̧ä̧chö̧nä̧, ja̧ʼhua̧ta̧nö̧ ta̧ʼcua̧ tu̧huȩnä̧rö̧ jähuänä böo juotächönäʼinä (Hechos 2:42). Porömä repeäcuähuä i̧jȩpä̧cuä̧huä̧tö̧jä̧, oʼca toiʼönä tö̧jä̧hua̧tö̧ pi̧jä̧ pa̧ja̧cu̧nä̧ ka̧cuä̧tö̧ tti̧jȩpä̧cuä̧u̧ taʼanö (1 Pedro 2:17).

Ta̧ʼcua̧ tu̧huȩnä̧rö̧ jähuänä böo juotächönä ppädaʼattö. Israel ttö̧ja̧rö̧ huo̧juȩcuä̧ ttö̧ja̧ Huȩyu̧cuä̧ Huȩnȩ jiʼäu ttu̧huo̧juȩto̧mȩnä̧ täcunä ttu̧huo̧juä̧chi̧ʼö̧nä̧ ppädinaʼa (Nehemías 8:8, 12). Ujuturuʼinä asambleara̧ʼa̧ ti̧ʼcho̧mȩnä̧ täcunä tu̧huo̧juä̧chi̧ʼö̧nä̧ ppädaʼa. Porö jittäumä Dios I̧huȩnȩ Isäʼtättö ȩmö̧ räecuä, jittäunäʼinä, Diosrö pä̧huä̧ rö̧jö̧ tö̧jö̧nä̧ jȩta̧ päʼö jö̧ʼi̧nä̧ i̧jȩpä̧tö̧. Ja̧ʼhua̧ta̧nö̧, korotö tö̧jä̧hua̧tö̧ Cristo päö taʼanö kä̧nö̧ ʼquiyome päteʼö ʼcuättopaʼanä ttami ʼquittächiʼaʼa päʼö tä̧ju̧cuo̧mȩnä̧ teseunä ppädaʼa. Asamblea regional jȩto̧mȩnä̧, Dios I̧huȩnȩ Isäʼtänä mo täbocö Diosrö esetinätö ʼcuättopinö huȩnȩ huȩnȩtö̧ i̧jȩpä̧tö̧, ttö̧ʼca̧tä̧hui̧nö̧ʼa̧nö̧ ʼca̧tä̧u̧ jȩpä̧tö̧. Pi̧yȩttö̧mä̧ pitö jȩtti̧nö̧ taʼanö jȩtö̧nä̧ huo̧jui̧pä̧tö̧jä̧. Ja̧ʼhua̧ta̧nö̧, asambleanä Diosrö tta̧ʼcua̧rö̧ täcö iyäjätö ajiyanä pötächiʼö tti̧jȩcua̧ päʼätömä tti̧jȩcu̧ʼa̧nö̧ ja̧ʼa̧.

• Asamblea jȩto̧mȩnä̧, ¿tocu päʼö rö̧ȩnä̧ tesehuaʼattö?

• Asamblea jȩto̧mȩnä̧ cuichöttömä, ¿tocu jö̧nä̧ ppädöʼa̧nö̧ ja̧ʼa̧ttö̧ ucurumä?