Recuätö ttö̧ja̧mä̧ amöcuädätö Jeohua ötöʼcö jähuä jiʼähuätömä jarepätö päʼö. Ja̧ʼhua̧nö̧ ja̧ʼa̧nä̧ ya̧tȩtä̧ iso päiʼönä Ttö̧ä̧nä̧hua̧ jö̧nä̧ hua̧ Chutä umöhuäyotörö äcuomenä “ttö chötöʼcö jähuä ji̧ʼä̧huä̧rä̧tö̧” päʼö oinomettö kä̧mä̧dö̧ dos mil setecientos a̧ʼȩ jo̧mȩ abonänö ʼcuäopinaʼa (Isaías 43:10-12). Ujuturu a̧ʼȩ 1931 jubö ttu̧huo̧jui̧nä̧u̧jä̧ Dios I̧huȩnȩ Isäʼtä Huo̧jui̧cuä̧ Ttö̧ja̧ päʼö. Ja̧ʼhua̧nö̧ ja̧ʼa̧nä̧, ¿tta̧ʼa̧nö̧ päʼö Jeohua ötöʼcö jähuä jiʼähuätö päʼö otäcuähuinaʼattö?

Tö̧ä̧nä̧hua̧ i̧mi̧ ttu̧huo̧jua̧ päʼö. Dios I̧huȩnȩ Isäʼtänä siete milnö jo̧mȩnä̧ abonänö räopaʼa Tö̧ä̧nä̧hua̧ i̧mi̧, Jeohua päʼö mi̧cua̧, pi̧yȩmä̧ mo täbocö tti̧huȩyu̧ti̧nö̧nä̧ i̧jȩcuä̧cha̧ʼa̧. Korotömä, Dios I̧huȩnȩ Isäʼtä tti̧huȩnȩ pö̧nä̧ huȩyu̧tu̧ rättepomenä pärotö icuätö Tö̧ä̧nä̧hua̧, Tu̧ru̧hua̧ päʼö Dios i̧mi̧mä̧. Ja̧ʼhua̧nö̧ ja̧ʼa̧nä̧, Chutä i̧jȩcuä̧chi̧nö̧ Moisésrö amönä i̧mi̧ Jeohua päʼö oʼäu, “ʼcuäopönätä chi̧mi̧mä̧ pi̧yȩtä̧ ja̧ʼa̧”, päinäcudo (Éxodo 3:15). Pi̧yȩnä̧ i̧jȩpi̧nö̧ korotö yapare ttö̧ä̧nä̧hua̧tö̧ttö̧ i̧mi̧cu̧nä̧ hua̧ päʼö. Ujutumä ucuotönö esehuätöjä Chutä i̧mi̧nä̧ ujuturu ottomenä.

Ujutu taditähuä ttu̧huo̧jua̧ päʼö. Mo täbocö recuätö Jeohuarö esetätö ka̧cui̧nä̧tö̧, pitöttö äcuomenä adihuä i̧sa̧mä̧ Abel ji̧na̧ʼa̧. Pitömä Jeohuarö tta̧ʼcua̧ ttu̧huȩnä̧rö̧ huȩnȩ jiʼähuinätödo. Recuo ʼcuäopinö oʼcaʼa Noéʼinä, Abrahánʼinä, Saraʼinä, Moisésʼinä, Davidʼinä pitömä äʼcoji ka̧cui̧nä̧tö̧ jȩtti̧nö̧ taʼanö jȩpi̧nä̧tö̧ (Hebreos 11:4, 7–40; 12:1). Pi̧jä̧ ruhuotö ttäʼca jo̧mȩ ya̧tȩ ka̧ra̧ suronä jȩpo̧cö̧rö̧ cärenä ttötö juiya päʼö jiʼäu i̧ʼcha̧ʼa̧ jö̧ taʼanö, ujutuʼinä Tö̧ä̧nä̧hua̧ ötöʼcö jähuä iso päiʼönä huȩnȩ yetecuocaʼa jiʼähuätöjä.

Jesús jȩi̧nö̧ taʼanö jȩta̧ʼa̧ttö̧. Dios I̧huȩnȩ Isäʼtä Jesúsru “iso päiʼönä huȩnȩ jiʼäumä” päʼö oaʼa (Apocalipsis 3:14). Chutä päʼinödo Chäʼo i̧mi̧ ttu̧huo̧jua̧ päʼö jiʼähuinösä, ja̧ʼhua̧ta̧nö̧ päʼinödo Tö̧ä̧nä̧hua̧ ötöʼcö jähuä “iso päiʼönä huȩnȩ jidähua päʼö” ichinösä (Juan 12:28; 18:37). Ja̧ʼhua̧nö̧ ja̧ʼa̧ttö̧ iso päiʼönä Jesús umöhuäyotö huotömä Jeohua i̧mi̧ otäcuähua päʼöʼinä, korotörö jitähua päʼöʼinä ja̧ʼa̧. Ujutu Jeohua ötöʼcö jähuä jiʼähuätömä pi̧yȩ jȩta̧ päʼö juruhuächätöjä.

• Äʼcoji Dios I̧huȩnȩ Isäʼtä Huo̧jui̧cuä̧ Ttö̧ja̧jä̧ päʼö otäcuähuinaʼanä, ¿tta̧ʼa̧nö̧ päʼö Jeohua ötöʼcö jähuä jiʼähuätö päʼö pärotö ticuähuinaʼattö?

• Jeohua ötöʼcö jähuä jiʼähuätömä, ¿ti̧yȩnö̧ kä̧mä̧dö̧ ttö̧ji̧na̧ʼa̧ttö̧ pi̧jä̧ rȩjȩnä̧mä̧?

• Oʼca toiʼönä pi̧jä̧nä̧ ka̧cuä̧ʼi̧jä̧tö̧ttö̧, ¿tide ja̧ʼa̧ttö̧ Jeohua ötöʼcö jähuä abonänö jiʼähuinömä?