Mo täbocö päiʼönä Jeohuamä pä̧huä̧ rö̧jä̧cu̧ ttamönä ttahuaruhuäcu ji̧nä̧ yo̧mȩtȩ korotö korotönöcu eseunu todeunä ttö̧ja̧ päʼöʼinä, Churutä tta̧ʼcua̧ ttu̧huȩnä̧rö̧ jähuänä ʼquiyönä ttö̧ja̧cua̧ päʼöʼinä (Deuteronomio 6:6, 7). Ja̧ʼhua̧nö̧ ja̧ʼa̧ttö̧ ujutumä, Jeohua ötöʼcö jähuä jiʼähuätömä semana jö̧ taʼanö tiempo ʼquȩʼȩpö̧ ku̧nä̧tö̧jä̧ tamönä tahuaruhuäcu Jeohua ötöʼcö jähuä tu̧huo̧jui̧ʼa̧ päʼö, ja̧ʼhua̧ta̧nö̧ koronö pö̧nä̧ tojusodenä kä̧tö̧ttö̧ katä pö̧nä̧rö̧ tta̧ʼcua̧ ttu̧huȩnä̧rö̧ jähuänä recuä rö̧jö̧ topö huo̧jui̧pä̧tö̧jä̧, pi̧yȩ pä̧mä̧dö̧ töjöʼcomettö jȩpä̧tö̧jä̧. Ja̧ʼhua̧ta̧nö̧ katä kä̧tö̧ʼi̧nä̧ tiempo ʼquȩʼȩpö̧ ku̧nä̧tö̧ Dios I̧huȩnȩ Isäʼtä jähuä pojopö ttu̧huo̧jui̧ʼa̧ päʼö.

Jeohuarö tötöʼcöhuächa päʼö ppädaʼa. “Diosrö töʼcöpächätucui. [...] ja̧u̧ʼi̧nä̧ ucuturu ö̧tö̧ʼcö̧huä̧chä̧cua̧” (Santiago 4:8). Jeohuarö huo̧juä̧chä̧tö̧jä̧ Chutä I̧huȩnȩ Isäʼtänä öadihuä ötöʼcö jähuäʼinä, jȩö̧ jähuäʼinä tu̧huo̧jui̧ʼo̧mȩnä̧. Semana jö̧ taʼanö cuamönä cuahuaruhuäcu ji̧nä̧ yo̧mȩtȩ huo̧jui̧pö̧ cu̧jä̧mä̧da̧ päʼömä Dios I̧huȩnȩ Isäʼtä cucuocuʼa̧nö̧ ja̧ʼa̧ cuahuaruhuä ttä̧ju̧cua̧ päʼö, pi̧yȩ jȩcu̧ʼa̧ päʼömä Tö̧jö̧ jähuäʼinä, Taditähuä jähuäʼinä oipojänä räopö tocuʼa̧nö̧ ja̧ʼa̧. Ji̧yȩcu̧nä̧ versículo ttucuocu oʼcaʼa ttu̧huo̧juä̧chi̧ʼä̧ji̧ jittäuʼa̧nö̧ ja̧ʼa̧, oʼca toiʼönä ttu̧huo̧juä̧chi̧ʼa̧ päʼö.

Tamönä tahuaruhuäcu ji̧nä̧ yo̧mȩtȩ tö̧ja̧cua̧ päʼö ppädaʼa. Ttirecuo huotöʼinä, ttirecua huotöʼinä, ttä̧ʼo̧tö̧ huotöʼinä, tti̧tti̧mö̧ huotöʼinä, Dios I̧huȩnȩ Isäʼtä ttu̧huo̧jui̧ʼo̧mȩnä̧ juhuaʼa yabocu eseunu todeunä ttö̧ja̧cua̧ päʼö ppädaʼa. Pi̧yȩ jȩcu̧ʼo̧mȩnä̧ ttu̧ȩcuä̧nä̧ ttö̧ja̧cu̧nä̧ʼi̧nä̧, tteseunäʼinä jȩcu̧ʼa̧ päʼö ja̧ʼa̧, ja̧u̧ mo̧ro̧ pätecuächomenä eseunu tta̧ttä̧rö̧nä̧ jȩcu̧ʼa̧ päʼö ja̧ʼa̧. Ttä̧ʼo̧tö̧ huotömä ttöʼojopa päʼö ja̧ʼa̧ tti̧tti̧mö̧rö̧ ya̧cu̧ pö̧nä̧rö̧ ttö̧jö̧ jähuänä recuä rö̧jö̧ topö ttu̧huo̧juȩta̧ päʼö Jeohua ötöʼcö jähuä Jiʼähuätö rättepöttö ȩmö̧, ja̧ʼhua̧ta̧nö̧ isojä jw.org päomeʼinä doʼächö ttö̧ʼo̧cui̧ʼö̧ʼa̧nö̧ ja̧ʼa̧. Koronömä cuyäru huo̧jui̧cuodera̧ʼa̧ttö̧ tti̧tti̧mö̧ huȩnȩ ttu̧ju̧nä̧ro̧mȩnä̧ʼi̧nä̧ ʼquiyönä ttö̧ja̧ päʼö ppättäda päʼöʼinä ttu̧huo̧juȩtö̧ʼa̧nö̧ ja̧ʼa̧. ¿Tocu päʼö cuahuaruhuäcu ji̧nä̧ yo̧mȩtȩ pä̧mä̧dö̧ JW Broadcasting (tv.pr418.com) tocuʼocaʼattö? Ja̧u̧nu̧ oʼcomenä, tocuʼäji cuahuaruhuäcu cucuocuʼa̧nö̧ ja̧ʼa̧. Ja̧ʼhua̧ta̧nö̧ tö̧ca̧ca̧cuä̧ro̧mȩttö̧ ra̧tä̧cuȩ, äʼcanä cuahuaruhuäcu ra̧cu̧ʼa̧nö̧ ja̧ʼa̧. Röjinä cu̧cuȩ cucuätucua päcuhuätucuttumä cucuätucuʼa̧nö̧ ja̧ʼa̧.

Semana jö̧ taʼanö tahuaruhuäcu ji̧nä̧ yo̧mȩtȩ Jeohuarö ucuo tetäumä I̧huȩnȩ Isäʼtä tu̧huo̧juä̧cho̧mȩnä̧ teseunä ppädaʼa, Jeohuamä pi̧yȩ jȩpö̧ tujuruhuächomenä adihuä juäi i̧yä̧cua̧ (Lucas 11:28; 2 Timoteo 3:16, 17).

• Tamönä tahuaruhuäcu Jeohuarö ucuo tetähua päʼömä, ¿tocu päʼö tiempo ʼquȩʼȩpö̧ tu̧ju̧na̧ päʼö ja̧ʼa̧ttö̧?

• Ttä̧ʼo̧tö̧ huotömä, ¿däje jȩttö̧ʼa̧nö̧ ja̧ʼa̧ttö̧ ttahuaruhuäcu ttu̧huo̧jui̧ʼö̧ mo̧ro̧ eseunu ttu̧huo̧jui̧ʼa̧ päʼömä?