¿Tta̧ʼa̧nö̧ recuätö Jeohua ötöʼcö jähuä jiʼähuätörö cu̧huo̧jua̧ʼa̧ttö̧? Ujututtu yotöcunä cuojusode ppeyä kä̧tö̧jä̧cö̧, cuaditome ucucu aditätöjäcö̧, ji̧nä̧ yo̧mȩtȩ cuyäru ucucu huo̧jui̧pä̧tö̧jä̧cö̧; Dios I̧huȩnȩ Isäʼtä jähuä ucucu ucuocuäʼijätöjä a̧ʼcua̧ra̧ʼa̧. Iso päiʼönä ujutumä, ¿titö taʼattö? ¿Tocu päʼö tesetö ötöʼcö jähuä korotöcu tucuocuaʼattö?

Ucu taʼanö huotöjä. Ujututtu yotöcunä karaʼattö ichäcuähuotöjä, yotöcunä ruhuotöjä, yotöcunä usurä isotöjä. Äcuomenä, yotöcunä tesetö ku̧nä̧ri̧nä̧tö̧jä̧, yotöcunämä Diosrö esetocotö pi̧nä̧tö̧jä̧; ja̧ʼhua̧nö̧ ja̧ʼa̧nä̧ oʼca toiʼönä Jeohua ötöʼcö jähuä jiʼähuätö huotö pätiʼäcuaʼa äʼcanä, ʼquȩʼȩpö̧ ku̧ni̧nä̧tö̧jä̧ Dios I̧huȩnȩ Isäʼtä täcunä tu̧huo̧jui̧ʼa̧ päʼö (Hechos 17:11). Tu̧huo̧juä̧chi̧ʼi̧nö̧ oʼcaʼa iso päiʼönä ja̧ʼa̧ päʼö huo̧juä̧chi̧ʼö̧, katä pö̧nä̧ Jeohuarö ucuo tetähua päʼö pojopinätöjä.

Dios I̧huȩnȩ Isäʼtä tu̧huo̧jui̧ʼo̧mȩnä̧ ppädä̧u̧jä̧. Ucu taʼanö surojö huȩnȩ ʼcuäʼopätöjä, tami ʼcuätö ku̧nä̧rä̧tö̧jä̧. Ja̧ʼhua̧nö̧ ja̧ʼa̧nä̧ mo̧ro̧ jö̧ taʼanö Dios I̧huȩnȩ Isäʼtä päö taʼanö jȩpö̧ tujuruhuächaʼattö, jitä äʼcoji tö̧ji̧nö̧ttö̧ʼi̧nä̧ abonänö eseu kä̧tö̧jä̧ (Apocalipsis 1:3). Pi̧yȩ huȩnȩ Dios I̧huȩnȩ Isäʼtänä tu̧huo̧jui̧ʼi̧nö̧ ujuturu ppädinö taʼanö oʼca toiʼönärö ppäda päʼätöjä, ja̧ʼhua̧nö̧ ja̧ʼa̧ttö̧ jahuätörö adihuä huȩnȩ jiʼähuätöjä.

Iso päiʼönä huȩnȩ Diosttö ichö ujuturu oipaʼa. Pi̧yȩ huȩnȩ Dios I̧huȩnȩ Isäʼtänä ka̧cu̧mä̧ tidepä jacuänä teseunä jȩa̧ʼa̧, korotörö tucuotönäʼinä, re rö̧jö̧nä̧ totönäʼinä ppädaʼa, ja̧ʼhua̧ta̧nö̧ nä̧u̧cuä̧rö̧ʼi̧nä̧ nä̧u̧cuä̧ro̧co̧tö̧jä̧, katä pö̧nä̧ ujuturu recuä rö̧jö̧ tȩma̧ päʼö aditätöjä. Ja̧ʼhua̧ta̧nö̧ ja̧u̧ huȩnȩ tamönä tahuaruhuäcu ji̧nä̧ yo̧mȩtȩ eseu tö̧ja̧ päʼöʼinä, suronä jȩtä̧ʼchö̧ juiya päʼöʼinä ppädaʼa. Ujutu huo̧juä̧tö̧jä̧ “Diosmä yoräteunä topö” oʼca toiʼönärö. Ja̧ʼhua̧nö̧ ja̧ʼa̧ttö̧ ti̧rȩjä̧ pö̧nä̧ tu̧ju̧nä̧ra̧ʼa̧ ja̧ʼa̧nä̧ʼi̧nä̧, ji̧nä̧ yo̧mȩtȩ amöcuädätöjä, políticaʼinä, ti̧huȩnȩ pö̧nä̧ i̧mi̧cu̧nä̧ tucuocuaʼanäʼinä ujuturu ʼquȩʼȩpö̧ icuocaʼa. Ucu taʼanötä taʼanä, ji̧nä̧ yo̧mȩtȩ kä̧nö̧ pi̧yȩ jȩpö̧ korotöttöʼinä i̧mi̧cu̧nä̧ huotöjä (Hechos 4:13; 10:34, 35).

• Jeohua ötöʼcö jähuä jiʼähuätömä, ¿däjenä yoräteunä taʼattö korotö ttö̧ja̧cu̧mä̧?

• Dios I̧huȩnȩ Isäʼtänä jiäumä, ¿tta̧ʼa̧nö̧ ppädaʼattö ujuturumä?