Surojö ʼcuäʼopö rȩjȩ rö̧ȩnä̧ surojuoächomenä, Jeohua ötöʼcö jähuä jiʼähuätömä yotäcu jo̧mȩnö̧ ku̧nä̧tö̧jä̧ tö̧jä̧hua̧tö̧ ʼquiyome päteʼö ʼcuäʼopätörö ppätäda päʼö. Pi̧yȩmä̧ huäjunä i̧jȩpa̧ʼa̧ repeʼäcuäu ka̧cuä̧tö̧jä̧ päʼö (Juan 13:34, 35; 1 Juan 3:17, 18). ¿Däje jȩta̧ʼa̧ttö̧ ppätäda päʼömä?

Pärätä iyö. Antioquía ötahuiyättö Jesúsru esetätömä ttö̧jä̧hua̧tö̧ Judea rȩjȩnä̧ kä̧tö̧ rö̧ȩnä̧ ppäi ttuttaʼa päʼö ttä̧ju̧cuo̧mȩnä̧ ppättäda päʼö pärätä hueʼinätö (Hechos 11:27-30). Jahuätö jȩtti̧nö̧ taʼanö, jitä pä̧nä̧ʼi̧nä̧ koromettö tö̧jä̧hua̧tö̧ rö̧ȩnä̧ surojö huȩnȩ ʼcuättopaʼa tä̧ju̧cuo̧mȩnä̧ congregación tö̧ja̧cuo̧mȩttö̧ pärätä iyö hueʼätöjä jahuätörö ppätäda päʼö (2 Corintios 8:13-15).

Recuä rö̧jö̧ iyö. Surojö ʼcuäopäjome oicuä ttö̧ja̧ pȩnȩ kä̧tö̧mä̧ congregaciónnä kä̧tö̧rö̧ ya̧cu̧ pö̧nä̧rö̧ tti̧mi̧nä̧ usätö ttu̧huo̧jua̧ päʼö adiunä ttö̧ja̧cua̧ʼa̧ ja̧ päʼö. Pi̧yȩ ʼcuäopomenä ppättäda päʼö jȩpö̧ ku̧nä̧huotömä aditö oʼipätö recuä rö̧jä̧u̧ru̧ cuäcuähuäʼinä, ajiyaʼinä, ttö̧ʼca̧tä̧huä̧ti̧yu̧ʼi̧nä̧, ttäʼäcuomeʼinä jo̧mȩnö̧ jȩpö̧ ku̧nu̧ ttiya päʼö. Ja̧ʼhua̧ta̧nö̧ jahuapö ruhuäʼinä tti̧ʼcha̧ päʼö jȩpä̧tö̧. Jeohua ötöʼcö jähuä jiʼähuätömä pi̧yȩ ʼcuäopomenä recuä rö̧jo̧mȩ ppättäda päʼö adicuä huo̧juä̧tö̧mä̧ ttamönä amöcuädö ʼchä̧tö̧ odehuiyä surojuoächö odeʼinä, Dios Uruhuo Huo̧jui̧cuä̧ ode surojuoächö odeʼinä aditö ppättäda päʼö. Täcö ji̧nä̧ yo̧mȩtȩ äʼcoji rö̧ȩnä̧ ttaditäʼijaʼattö jurunä recuä rö̧jo̧mȩ ppäʼädö ʼchä̧tö̧. Ujutu Jeohua umöhuäyotömä “tö̧jä̧hua̧tö̧rö̧ Diosrö esetätörö adiu” ppäʼädö jȩtö̧ taʼanö, korotöröʼinä i̧mi̧cu̧nä̧ ttesetaʼanä, ppätädöʼa̧nö̧ jo̧mȩ jubö ppäʼädätöjä (Gálatas 6:10).

Dios I̧huȩnȩttö̧ ȩmö̧ tta̧ʼcua̧ ttȩmö̧nä̧ jȩpö̧ ppäʼädätöjä. Surojö ʼcuäʼopö rȩjȩ rö̧ȩnä̧ surojuoächomenä, ttö̧ja̧ rö̧ȩnä̧ usurä ȩmä̧huä̧tö̧mä̧ tta̧ʼcua̧ ttȩmö̧nä̧ ppättädatö päʼö recuä rö̧jä̧u̧. Jeohuamä, ja̧u̧ ʼcuäopomenä tta̧ʼcua̧ ttȩmö̧nä̧ ppäʼädö, ttujuruʼinä iyä̧u̧ (2 Corintios 1:3, 4). Ja̧ʼhua̧nö̧ ja̧ʼa̧ttö̧ abora̧ʼa̧ tta̧ʼcua̧ roʼecuätörö Dios I̧huȩnȩ Isäʼtä baʼepö Chutä jȩä̧cuȩ i̧jȩpä̧tö̧jä̧, Uruhuo ichomenä pi̧jä̧ttö̧ surojö ʼcuäopö ubara ttuttunäʼinä, usurä ttȩmä̧u̧nä̧ʼi̧nä̧ jȩö̧ siʼepö icuäcuaʼa päʼö (Apocalipsis 21:4).

• Jeohua ötöʼcö jähuä jiʼähuätömä, surojö ʼcuäʼopö rȩjȩ rö̧ȩnä̧ surojuoächaʼa tä̧ju̧cuo̧mȩnä̧, yotäcu, ¿tocu päʼö jurunä recuä rö̧jo̧mȩ ppäʼädö ti̧ʼcha̧ʼa̧ttö̧?

• Surojö ʼcuäopäji oʼcaʼa a̧ʼcua̧ri̧ʼä̧tö̧rö̧, ¿tocu jö̧nä̧ tta̧ʼcua̧ ttȩmö̧nä̧ ppätädaʼattö?