Jesucristo u̧huo̧juȩtä̧u̧ru̧ päʼinödo “ucutuʼinä, lámpara adiu tȩa̧u̧ʼa̧nö̧, adiu ka̧cuä̧tu̧cui̧ oʼca toiʼönä ttäʼca jo̧mȩttö̧, ucutu adiu jȩcu̧ʼä̧tu̧cua̧ʼa̧ topö, Cuäʼo Diosrö, mo̧ro̧jä̧ra̧ʼa̧ kö̧rö̧ ttesetäcuaʼa̧nö̧” (Mateo 5:16). Ja̧ʼhua̧nö̧ ja̧ʼa̧ttö̧ ttö̧ja̧ jareö rättepö computadora jähuänä aditätöjä, internetnä pi̧yȩ iso juotepa päʼö. Iso päiʼönä töäre internet isojä jw.org päome ja̧ʼa̧ Jeohua ötöʼcö jähuä jiʼähuätö tesetöʼinä, taditähuäʼinä jiähuomemä. Pojänämä, ¿däje cu̧ʼo̧cui̧ʼö̧ʼa̧nö̧ ja̧ʼa̧ttö̧?

Ttö̧ja̧ jättecu Dios I̧huȩnȩ Isäʼtättö ȩmö̧ ädätäcuähuä ka̧ʼa̧. Pȩnȩmä̧ ji̧yȩcu̧nä̧ juiyo jättecu cu̧ʼo̧cui̧ʼö̧ʼa̧nö̧ ja̧ʼa̧. Huȩnȩtö̧ päʼö, beönä̧tä̧ huȩyu̧cuä̧ ojiyä: Ubara ttuhuähuocö mo̧ro̧mä̧, ¿kä̧cua̧ʼa̧ ja̧ʼa̧di̧?, ¿ʼCorujuoʼächinätömä päʼäji taʼanö iso päiʼönä ttö̧ja̧cuä̧cua̧ʼa̧ ja̧ʼa̧di̧? pi̧yȩ ädätäcuähuä pojättö cui̧mȩyȩdö̧ʼa̧nö̧ ja̧ʼa̧, pi̧yȩmä̧ 600nö tti̧huȩnȩ jo̧mȩ abonänö räopaʼa. Ja̧ʼhua̧ta̧nö̧, Dios I̧huȩnȩ Isäʼtä Traducción del Nuevo Mundo päʼö micuäʼtä 180nö tti̧huȩnȩ jo̧mȩ abonänö räopaʼa; ja̧ʼhua̧ta̧nö̧ Dios I̧huȩnȩ Isäʼtä cu̧huo̧jui̧ʼa̧ päʼö ppädöʼa̧nö̧ jö̧ʼi̧nä̧ ka̧ʼa̧, pi̧yȩ oʼtättö ADIHUÄ HUȨNȨ DIOSTTÖ ICHÖ JÄHUÄ päʼö micuäʼtä ka̧ʼa̧, ja̧ʼhua̧ta̧nö̧ revista röji räopäji oʼtä Dios I̧huȩnȩ Isäʼtättö ȩmö̧ räecuä oʼtä ka̧ʼa̧. Pi̧yȩ rätepömä internetnä cucuocuʼa̧nö̧ ja̧ʼa̧, cuä̧ju̧cu̧ʼa̧nö̧ ja̧ʼa̧, ja̧ʼhua̧ta̧nö̧ MP3näʼinä, PDFnäʼinä, EPUBnäʼinä cui̧mȩyȩdö̧ʼa̧nö̧ ja̧ʼa̧. Ucuru pä̧huä̧ rö̧jö̧ttö̧mä̧ imprimi päcuʼa̧nö̧ ja̧ʼa̧, ucutä cui̧huȩnȩnä̧ Dios Uruhuo huȩnȩ u̧huo̧jua̧ päʼörö cui̧jȩpa̧ päʼöʼinä. Ttu̧mö̧nä̧ jȩpö̧ ucuocuätö tti̧huȩnȩnä̧ʼi̧nä̧ videonä rätepö ka̧ʼa̧. Ja̧ʼhua̧ta̧nö̧, Dios I̧huȩnȩ Isäʼtänä ttucuocu ttä̧ju̧cua̧ päʼötä jö̧ʼi̧nä̧, película jö̧ taʼanötä rä̧mi̧pa̧ʼa̧nä̧ ttä̧ju̧cua̧ päʼötä jö̧ʼi̧nä̧, tesehuipönä ra̧ö̧ʼi̧nä̧ ka̧ʼa̧.

Jeohua ötöʼcö jähuä jiʼähuätö tötöʼcö jähuä iso päiʼönä huȩnȩ ka̧ʼa̧. Pi̧jä̧ pa̧ja̧cu̧nä̧ taditähuä jähuäʼinä, pi̧jä̧ ruhuotö ujuturu jȩttö̧ huȩnȩʼi̧nä̧, tö̧jä̧hua̧tö̧ huȩnȩ ʼcuättopomenä ppätädö huȩnȩʼi̧nä̧, jareönä huȩnȩ ʼcuätopäji huȩyu̧cuä̧nä̧ʼi̧nä̧, videonäʼinä pojänä räopaʼa. Ja̧ʼhua̧ta̧nö̧ asamblea jȩtä̧cuȩ jähuäʼinä, ti̧rȩjä̧ttö̧ isode Juȩttȩpä̧rodera̧ʼa̧ aditätöcu tocu jö̧nä̧ cucuocuʼa̧nö̧ ja̧ʼa̧ttö̧ päʼöʼinä jiähuaʼa.

Pojä tu̧ju̧nä̧ra̧ʼa̧ttö̧, iso päiʼönä huȩnȩ pi̧jä̧ pa̧ja̧cu̧nä̧ rȩbȩu̧nä̧ ppädaʼa ttö̧ja̧ ttö̧ja̧cuo̧mȩcu̧, rö̧ȩnä̧ diyahuome oto ttö̧ja̧ʼa̧ ja̧ʼa̧nä̧ʼi̧nä̧, Antártida micuome jö̧ taʼanö. Jeohuarö jäʼepätöjä Chutä I̧huȩnȩ “pi̧jä̧ pa̧ja̧cu̧nä̧ jurunänö rȩbȩhuä̧cua̧ʼa̧nö̧”, Ja̧u̧ru̧ ttesehuäcuaʼa̧nö̧ (2 Tesalonicenses 3:1).

• jw.org internet isojämä, ¿tocu ppädöʼa̧nö̧ ja̧ʼa̧ttö̧ korotö ttö̧ja̧ iso päiʼönä huȩnȩ ttu̧huo̧jui̧ʼa̧ päʼömä?

• Cu̧huo̧jua̧ päcu, pojänä, ¿däje cusa päcuhuaʼattö?