Jeohua ötöʼcö jähuä jiʼähuätömä deʼa ʼcuäopö otottö tichaʼa ja̧ʼa̧nä̧ʼi̧nä̧, ajiya rö̧ȩnä̧ ichomenäʼinä, rö̧ȩnä̧ duhuaʼa ja̧ʼa̧nä̧ʼi̧nä̧, cäʼädiʼocotöjä tö̧ca̧ca̧cuä̧ro̧mȩra̧ʼa̧ ticha päʼömä. Surojö huȩnȩ ʼcuätopaʼa ja̧ʼa̧nä̧ʼi̧nä̧, mo̧ro̧ ʼcuäoiʼönä aditö ʼcuätächiʼaʼa ja̧ʼa̧nä̧ʼi̧nä̧, ¿tocu päʼö tujuruhuächaʼattö tö̧jä̧hua̧tö̧cu̧ tö̧ca̧ca̧cuä̧ra̧ päʼömä?

Huȩnȩ tu̧ju̧nä̧ra̧ʼa̧nä̧ adiu tö̧ja̧ päʼö ppädaʼa. “Korotö, korotönörö adiu repeʼö” ttö̧ja̧ päʼö huȩyu̧ti̧nö̧do Pablomä congregaciónnä ka̧cuä̧tö̧rö̧ (Hebreos 10:24). Pi̧yȩ päʼömä pähuächaʼa congregaciónnä korotö korotönörö tu̧huo̧juä̧cuä̧hua̧ päʼö ja̧ʼa̧, a̧mö̧cuä̧rö̧ ppätädäcuähua päʼö ja̧ʼa̧. Korotö tö̧jä̧hua̧tö̧cu̧ tucuocuomenä huo̧juä̧chä̧tö̧jä̧ ujutu surojö huȩnȩ ʼcuätopö jahuätöʼinä ja̧u̧ huȩnȩ ʼcuäʼopö juruhuinätö päʼö, ja̧ʼhua̧ta̧nö̧ ujutuʼinä tujuruhua päʼö ppättädöʼa̧nö̧ ja̧ʼa̧.

Iso päiʼönä tahuaruhuärö tö̧ʼo̧cui̧ʼa̧ päʼö ppädaʼa. Tö̧ca̧ca̧cuä̧ro̧mȩra̧ʼa̧ tieruhuä̧u̧cu̧tä̧mä̧ ko̧co̧tö̧jä̧, iso päiʼönä tahuaruhuä huotöcu kä̧tö̧jä̧. Ja̧ʼhua̧ta̧nö̧, koronö pö̧nä̧ jahuätöcu ca̧ca̧cui̧pä̧tö̧jä̧ surojö juiyönä töjöʼcö teseunä jȩö̧ jȩta̧ päʼö. Pi̧yȩmä̧, ¿tocu jö̧nä̧ ppädaʼattö ujuturumä? Korotö korotönörö ji̧nä̧ yo̧mȩtȩ ʼquiyönä repeʼäcuäunu tö̧ja̧ päʼö ppädaʼa. Ja̧ʼhua̧ta̧nö̧, jahuätö huȩnȩ ʼcuättopomenä yotäcu usätöjä ppätädatö päʼö, jahuätörö repetö ʼquiyönä ka̧ʼa̧ttö̧ (Juan 15:13). Oʼca toiʼönä tö̧jä̧hua̧tö̧ congregaciónnä ka̧cuä̧tö̧ ttahuaruhuä pätiʼomenä i̧jȩpä̧tö̧jä̧ korotö korotönörö a̧mö̧cuä̧rö̧ ppäʼädäcuähuätöjä päʼö (1 Corintios 12:25, 26).

Ucuru ä̧tȩpä̧tö̧jä̧ Jeohua ötöʼcö jähuä jiʼähuätörö cuahuaruhuä päiʼönä cuʼojopa päʼö. Ujutumä juruhuächätöjä Diosrö pä̧huä̧ rö̧jö̧ jȩpö̧ tö̧ja̧ päʼö. Korotö ttöjöʼcocaʼanä ujutucu ca̧ca̧cuä̧ri̧ yecuhuecuocaʼa.

• ¿Tocu päʼö recuä rö̧ja̧ʼa̧ttö̧ tö̧jä̧hua̧tö̧ Jesúsru esetätöcu ji̧nä̧ yo̧mȩtȩ tö̧ca̧ca̧cuä̧ra̧ päʼö?

• Tö̧ca̧ca̧cuä̧ro̧mȩ, ¿ti̧yȩnö̧ cuicha päcuhuaʼattö?