Ucu ya̧tȩ Jeohua ötöʼcö jähuä jiʼäucu Dios I̧huȩnȩ Isäʼtä cu̧huo̧jui̧ʼa̧ päʼömä äʼcoji huo̧juȩtö̧ ichäcuaʼa äʼcanä katä huo̧jui̧pö̧jä̧. Juhuaʼa jö̧ taʼanö, abonänö adiu cu̧huo̧juä̧chi̧ʼa̧ päʼömä tö̧ca̧ca̧cuä̧ro̧mȩra̧ʼa̧ cui̧ʼchä̧cua̧ʼa̧ äʼcanä juhuorö cu̧huo̧jui̧ʼä̧cuȩ äʼcoji jo̧mȩnö̧ jȩpö̧ cu̧ju̧na̧ päʼö ja̧ʼa̧. Semana jö̧ taʼanö pi̧yȩ cuihueye päiʼönä jȩcu̧ʼu̧ttu̧mä̧ abonänö ucuru ppädäcuaʼa.

Ti̧yȩnö̧, torö, adiunä cu̧huo̧jui̧ʼa̧ päʼö usi. ¿Ti̧yȩnö̧ adiu amöcuädönö cu̧huo̧jui̧ʼö̧ʼa̧nö̧ ja̧ʼa̧ttö̧, mo̧ro̧ päiʼaʼanäcö̧, aditö cui̧ʼchä̧cua̧ʼa̧ äʼcanäcö̧, ni̧pä̧ro̧mȩcö̧, yodocö̧, ppo̧ʼä̧tö̧ ttäecuächö oʼcaʼacö̧? Recuo cu̧huo̧jui̧ʼö̧ juiyönä ja̧ʼa̧nä̧ʼi̧nä̧, tiempo ʼquȩʼȩpö̧ ku̧ni̧ cu̧huo̧jui̧ʼä̧cuȩ jo̧mȩnö̧ cu̧ju̧na̧ päʼö, ja̧ʼhua̧ta̧nö̧ cu̧huo̧jui̧ʼa̧ʼa̧nä̧ cäcuhuädiʼa päʼö jȩö̧ ʼcuäopöttömä jarocuhuäcuähuäʼ. Usi ʼcoru jo̧mȩ pä̧nö̧ cu̧huo̧jui̧ʼa̧ päʼö, adiu cu̧huo̧jui̧ʼö̧ juiyönä jȩö̧, radioʼinä, televisorʼinä, teléfonoʼinä na̧ʼȩpö̧ icui. Huo̧jui̧pö̧ cu̧jä̧mä̧dä̧cua̧ʼa̧ äʼcanä Diosrö cucuocuomenä huȩnȩ cu̧ju̧nä̧rö̧ cuamöcuädö juiyönä ppädäcuaʼa Dios I̧huȩnȩ Isäʼtä adiu amöcuädönö cu̧huo̧jui̧ʼa̧ päʼö (Filipenses 4:6, 7).

Abonänö micuäunä jö̧ saropi, jo̧mȩnö̧ jȩpö̧ ku̧ni̧ cuädäta päʼö. Äcuomenä cu̧huo̧jui̧ʼä̧cuȩ jähuä huämenä topi. Cu̧huo̧jui̧ʼä̧cuȩttö̧ huäme huȩyu̧cuä̧ topi, pi̧yȩ tta̧ʼa̧nö̧ dȩa̧ʼa̧nä̧ räopöcu todehuaʼa ja̧ päʼö topi, a̧ʼcua̧juä̧ʼi̧nä̧, ca̧ca̧ti̧pö̧ totta päʼö jäecuäʼinä ttu̧ʼȩpä̧rö̧nö̧ topi, pi̧yȩmä̧ ppädäcuaʼa abonänö micuäunä jö̧ cuamöcuädiʼönä. Ja̧u̧nu̧ oʼcomenä, isäbä jö̧ taʼanö ucuocui, isäbä pö̧nä̧ttö̧ jäecuä räopö topö ädäti, isäbänä versículo räopö usi, pi̧yȩ cu̧huo̧jui̧ʼö̧cu̧ tta̧ʼa̧nö̧ todeunä ja̧ päʼö topi (Hechos 17:11). Ädätäcuähuä cu̧ʼo̧cui̧ʼo̧mȩnä̧ saropi cuamöcuädönä jȩä̧cuȩ. Ja̧ʼhua̧nö̧ jȩcu̧ʼu̧ttu̧mä̧ ppädäcuaʼa tö̧ca̧ca̧cuä̧ro̧mȩra̧ʼa̧ cui̧ʼcho̧mȩnä̧ ucuru pä̧huä̧ rö̧jö̧ttö̧mä̧ cu̧mö̧ cäʼepö cuädäta päʼö cu̧huo̧juä̧chi̧ʼä̧ji̧ taʼanö.

Semana jö̧ taʼanö tö̧ca̧ca̧cuä̧ro̧mȩra̧ʼa̧ttö̧ cu̧huo̧jui̧ʼö̧mä̧ ppädäcuaʼa Dios I̧huȩnȩ Isäʼtä juhuaʼa yabocu täcunä cu̧huo̧juä̧cha̧ päʼö (Mateo 13:51, 52).

• Tö̧ca̧ca̧cuä̧ro̧mȩra̧ʼa̧ttö̧ tu̧huo̧jui̧ʼä̧cuȩ jähuä, ¿tocu jö̧nä̧ jȩcu̧ʼa̧nö̧ ja̧ʼa̧ttö̧ cuihueye päiʼönä jo̧mȩnö̧ cu̧ju̧na̧ päʼömä?

• ¿Tocu jö̧nä̧ jo̧mȩnö̧ jȩpö̧ cu̧ju̧nu̧ʼa̧nö̧ ja̧ʼa̧ttö̧ tö̧ca̧ca̧cuä̧ro̧mȩnä̧ cu̧mö̧ cäʼepö cuädäta päʼömä?