Jeohua ötöʼcö jähuä jiʼähuätömä recuo a̧ʼȩ jo̧mȩnä̧ korotö Dios I̧huȩnȩ oʼtä rättepö imprimi päʼö iyäʼchäʼinätöjä, korotö imprimi pättöʼinä iyäʼchäʼinätöjä. Ja̧ʼhua̧nö̧ ja̧ʼa̧nä̧, recuo ʼcuäopinö oʼcaʼa topinätöjä koroʼtä recuä rö̧ja̧ʼa̧ ttö̧ja̧ huäjunä “iso päiʼönä huȩnȩ” ttu̧huo̧juä̧chi̧ʼa̧ päʼö. Pi̧yȩmä̧ Diosrö pä̧huä̧ rö̧ja̧ʼa̧ (1 Timoteo 2:3, 4). Ja̧ʼhua̧nö̧ ja̧ʼa̧ttö̧ Dios I̧huȩnȩ Isäʼtä Traducción del Nuevo Mundo micuäʼtä yiʼtätetä ja̧ʼa̧nä̧, 1950 a̧ʼȩnä̧ ʼquȩʼȩpö̧ jiʼtäcunä räʼepö kä̧mä̧di̧nä̧tö̧jä̧ inglés tti̧huȩnȩnä̧. Piʼtämä äcuomenä tti̧huȩyu̧ti̧nö̧ taʼanötä räopönä räʼepö icuäʼijätöjä, jitä 180nö jo̧mȩ abonänö tti̧huȩnȩ pö̧nä̧ ka̧ʼa̧.

Piʼtämä huäjunä ttu̧huo̧juä̧chi̧ʼa̧ päʼö recuä rö̧ji̧na̧ʼa̧. Mo̧ro̧ ʼcuäopö taʼanö tti̧huȩnȩmä̧ pärohuächaʼa. Ja̧ʼhua̧nö̧ ja̧ʼa̧ttö̧ jiʼtäcunä Dios I̧huȩnȩ oʼtämä huȩyu̧cuä̧ huäjunä i̧jȩcuä̧cho̧ca̧ʼa̧, jeruhuaʼa adiunä ttu̧huo̧juä̧chi̧ʼa̧ päʼö. Ja̧ʼhua̧ta̧nö̧, mo täbocö tti̧huȩyu̧ti̧nö̧ ojiyä po̧cui̧pi̧nä̧tö̧, äcuomenä Dios I̧huȩnȩ tti̧huȩyu̧ti̧nö̧cu̧ töʼcöʼönä jö̧, pi̧yȩmä̧ ppädinaʼa hebreonä tti̧huȩyu̧ti̧nö̧ʼi̧nä̧, arameonä tti̧huȩyu̧ti̧nö̧ʼi̧nä̧, griegonä tti̧huȩyu̧ti̧nö̧ʼi̧nä̧, adiu huäjunä ttu̧huo̧juä̧chi̧ʼö̧nä̧.

Äcuomenä Dios I̧huȩnȩ Isäʼtä tti̧huȩyu̧ti̧nö̧ taʼanö jiähuäʼtä recuä rö̧ji̧na̧ʼa̧. Tti̧huȩnȩ pö̧nä̧ huȩyu̧tu̧ räʼepö icuätömä, ttamönä ttöjöʼcomenä tti̧huȩyu̧ta̧ päʼömä jo̧ca̧ʼa̧, Diosttö ichö ja̧ʼa̧ttö̧. Ja̧ʼhua̧nö̧ ja̧ʼa̧ttö̧ äcuomenä huȩyu̧cui̧nö̧ taʼanötä räʼepö tticua päʼö ja̧ʼa̧. Ja̧ʼhua̧nö̧ ja̧ʼa̧nä̧ rö̧ȩnä̧ Dios I̧huȩnȩ oʼtä räʼepätömä Tö̧ä̧nä̧hua̧ Jeohua i̧mi̧ pärou icu siʼepö icuinätö.

Dios I̧huȩnȩ Isäʼtä U̧ru̧hua̧rö̧ ucuotäcuähuä i̧jȩpä̧ʼtä recuä rö̧ji̧na̧ʼa̧ (2 Timoteo 3:16). Traducción del Nuevo Mundo päʼö micuäʼtänä Jeohua i̧mi̧ täbocö tti̧huȩyu̧ti̧nö̧nä̧ räopö taʼanö, 7.000nö jo̧mȩ pabonänö päʼäji taʼanö räopa päʼö huȩyu̧ti̧nä̧tö̧. Pi̧yȩttö̧ yaʼate dȩa̧ʼa̧nä̧ a̧ʼcua̧juä̧ räopaʼa (Salmo 83:18). Adiu piʼtä räopa päʼö recuo a̧ʼȩ jo̧mȩnä̧ a̧ʼcua̧ pö̧nö̧ huo̧jui̧pi̧nä̧tö̧, ja̧ʼhua̧nö̧ ja̧ʼa̧ttö̧ Dios amöcuädö huȩyu̧cuä̧ tucuocuomenä huäjunä tu̧huo̧juä̧chi̧ʼö̧nä̧ ppädaʼa, ta̧ʼcua̧ teseunä jȩa̧ʼa̧. Piʼtä Jeohua I̧huȩnȩ Isäʼtä ucu cui̧huȩnȩnä̧ räopocaʼanä juruhuächiʼi mo̧ro̧ jö̧ taʼanö cuihueye päiʼönä cucuocua päʼö (Hechos 17:11; Salmo 1:2, 3).

• ¿Tta̧ʼa̧nö̧ päʼö totinaʼattö koroʼtä Dios I̧huȩnȩ Isäʼtä recuä rö̧ja̧ʼa̧ päʼömä?

• Ya̧tȩ Diosrö pä̧huä̧ rö̧jö̧ u̧huo̧jui̧ʼa̧ päʼömä, ¿däje ihueye päiʼönä jȩa̧ päʼö ja̧ʼa̧ttö̧?