Long Saturday, March 1, 2014, long Assembly Hall long Benin, 823 Jehovah’s Witness hipap for wanfala spesol meeting. Start kam long 1999, taem arrangement for wakem olketa Kingdom Hall long olketa poor kantri start, olketa Jehovah’s Witness wakem 3,000 Kingdom Hall long Nigeria.

Long disfala hipap olketa storyim olketa difren ples wea olketa kongregeson long Nigeria savve hipap for olketa meeting bilong olketa start kam long 1920. Firstaem olketa savve rentim nomoa olketa haos or olketa hall. Long samting olsem 1935, wanfala hall long Ilesa, wea Olketa Jehovah’s Witness nomoa savve iusim for meeting bilong olketa. Midolwan long 1938 and 1990, namba bilong olketa kongregeson kamap staka, from 14 go kasem 2,681, so hem hard lelebet for olketa faendem ples for hipap. Samfala Kingdom Hall sixfala kongregeson nao savve iusim. Long olketa nara ples staka tumas savve hipap so samfala sidaon aotsaed nomoa and lisin long meeting. Long datfala taem staka kongregeson iusim olketa haos bilong olketa brata and sista or olketa skul.

Long 1990 branch office bilong olketa Jehovah’s Witness givim loan wea olketa kolem Kingdom Hall Fund mekem olketa kongregeson savve wakem olketa Kingdom Hall bilong olketa seleva. Kasem 1997, Regional Building Komiti wea luk aftarem olketa kongregeson helpem 105 kongregeson for wakem or fixim olketa Kingdom Hall bilong olketa. Long 1997 go kasem 1999 olketa wakem 13-fala Kingdom Hall insaed 7 go kasem 15-fala day nomoa.

Nomata olketa savve Kingdom Hall insaed tu-thri day nomoa need hem stap for wakem staka moa Kingdom Hall, bikos namba bilong Olketa Jehovah’s Witness long Nigeria gohed for kamap staka. Long April 1998 branch office luksavve Nigeria needim winim 1,114 Kingdom Hall for fitim namba bilong olketa Jehovah’s Witness

Long datfala spesol meeting long March 1, 2014, wanfala member bilong Nigeria Branch Komiti Don Trost, talem evriwan: “Datwan hem barava bigfala waka for duim! Mifala tingim, ‘Hao nao bae iumi finisim?’” Start long1999, olketa kasem ansa taem olketa grup for wakem olketa Kingdom Hall wea garem six or eitfala brata savve helpem olketa kongregeson for wakem olketa Kingdom Hall raonem kantri. Taem olketa iusim olketa simpol design, samting olsem 17-fala Kingdom Hall nao olketa wakem evri month insaed long 14 year wea go pas finis.

Brata Trost praisem evriwan for samting wea olketa duim bat sei staka waka stap yet for duim. Long 2013 namba bilong olketa Jehovah’s Witness long Nigeria hem go ap winim 8,000. Brata Trost sei: “For fitim need long future 100-fala Kingdom Hall nao iumi needim evri year.” Long 2013, winim 351,000 Jehovah’s Witness nao stap long Nigeria long winim 5,700 kongregeson.