Long October 7, 2013, Olketa Jehovah’s Witness releasem wanfala mobile device app wea man savve iusim for readim and studyim Bible. Nem bilong datwan hem JW Library. Insaed disfala free Bible app hem sixfala English Bible. Wanfala hem King James Version and narawan hem 2013 revision bilong Niu World Bible. *

Staka million pipol iusim olketa smartphone, tablet, or kaen samting olsem for duim waka and for story witim narawan. Pipol wea iusim olketa samting hia savve kasem olketa pablikeson for readim and studyim Bible long jw.org, so why nao olketa wakem JW Library?

First samting, bihaen man kasem finis disfala app, hem no need for connect moa long Internet for iusim datwan. Hem savve iusim off-line. Mek-tu samting, olketa wakem diswan for mekem hem isi for faendem olketa scripture and for barava studyim gud Bible. Hao nao olsem?

Firstaem wea iu openem JW Library bae iu lukim nem bilong olketa buk insaed Bible. Taem iu chusim wanfala buk, screen bae showim iu list bilong olketa chapter. Diswan minim insaed tu-thri second nomoa iu faendem wanfala scripture wea iu lukaotem. Disfala app garem olketa nara samting tu wea man savve iusim for studyim Bible:

• Olketa footnote wea talem nara wei for transleitim datfala verse, or samfala nara information

• Cross reference for olketa nara verse wea join witim datwan

• Iu savve iusim search for lukaotem wanfala word or toktok

• Long start bilong each Bible buk hem lelebet storyim wanem nao insaed datfala buk

• Chart wea talem nem bilong olketa man wea raetem olketa buk insaed Bible, ples and taem wea man raetem buk, and olketa year wea datfala buk kavarem

• Wanfala sekson wea garem olketa map, chart, taem laen, and olketa nara piksa wea kala

Olsem evri buk bilong Olketa Jehovah’s Witness, JW Library hem no garem cost. Olketa contribution nao sapotim disfala waka, and kam kasem distaem winim wan million pipol daonlodim disfala app. (2 Corinth 9:7) Mifala invaetem iu for traem diswan and kasem gud samting from disfala spesol mobile library.