“Gud Winim Olketa Nara Movie”
Evri year, Olketa Jehovah’s Witness wakem samfala video for showim long convention bilong olketa. Klosap evri video hia hem long English. So waswe long olketa convention long olketa nara languis? Hao nao olketa wea attend savve minim olketa video hia? Plande taem olketa changem English toktok witim languis bilong pipol wea attend. Hao nao olketa wea attend ting long olketa video hia wea olketa savve herem long languis bilong olketa?
Tingting Bilong Audience Abaotem Olketa Video Long Languis
Tingim koment bilong samfala pipol wea no Jehovah’s Witness wea kam long olketa convention long Mexico and Central America:
Man wea attendim convention long Veracruz, Mexico, long Popoluca languis, hem sei: “Mi no just minim datfala video nomoa, bat hem olsem mi tu insaed long datwan. Hem barava kasem heart bilong mi.”
Man wea attendim convention long Nuevo León, Mexico, long Nahuatl languis, hem sei: “Mi feel olsem mi stap long hom and mi story witim gudfala fren. Hem gud winim olketa nara movie bikos mi barava minim gud.”
Woman wea attendim convention long Tabasco, Mexico, long Chol languis, hem sei: “Taem mi lukim olketa video long languis bilong mi, mi feel olsem olketa man insaed story for mi nomoa.”
Man wea attendim convention long Sololá, Guatemala, long Cakchiquel languis, hem sei: “Disfala organization barava interest for helpem pipol lanem olketa samting long languis bilong olketa seleva. No eni nara organization hem olsem!”
Olketa Jehovah’s Witness no iusim professional technician or voice actor for duim disfala waka and staka taem olketa duim olketa recording hia long olketa farawe ples long bush. So hao nao olketa fit for duim olketa recording wea barava gud tumas?
“Waka wea Mekem Man Satisfae”
Long 2016, Central America branch office bilong Olketa Jehovah’s Witness organizem waka for recordim olketa convention video long Spanish languis and nara 38 lokol languis. Samting olsem 2,500 volunteer nao duim disfala waka. Olketa Witness wea garem savve saed long recording and olketa transleison team duim recording long branch office, long olketa remote transleison office, and long olketa nara ples wea olketa wakem temporary recording studio. Olketa team hia duim recording long 20 difren ples long Belize, Guatemala, Honduras, Mexico, and Panama.
Recording studio long Central America branch office
Hem big waka for buildim olketa temporary studio hia and olketa iusim enikaen samting olsem blanket and matres for satem noise aotsaed mekem recording hem here gud.
Staka wea kam for duim recording long languis bilong olketa stap farawe and no garem staka samting, so hem big sakrifaes for olketa travel kam. Samfala wakabaot for wan and haf hour, then weitim transport and travel nara twelv and haf hour! Wanfala dadi wakabaot witim boy bilong hem for samting olsem eitfala hour for kasem ples for duim recording.
Start kam long taem Naomi smol, famili bilong hem help for buildim olketa temporary recording studio. Hem sei: “Mifala barava luk forward long week wea olketa bae duim recording. Dadi bilong mi barava waka hard for mek sure evri samting hem redi. Samfala taem mami bilong mi savve kuki for 30-fala volunteer wea kam waka.” Distaem Naomi hem wanfala volunteer long transleison office long Mexico. Hem sei: “Mi barava hapi for iusim taem bilong mi for helpem pipol herem message from Bible long languis bilong olketa. Mi no tingim eni waka wea bae mekem mi satisfae olsem diswan.”
Olketa convention bilong Olketa Jehovah’s Witness kamap evri year long staka ples raonem world and eniwan savve attendim. For kasem moa information, lukim datfala page, OLKETA CONVENTION.