Yes. Olketa Jehovah’s Witness biliv full Bible hem ‘kam from God, and hem savve teachim iumi.’ (2 Timothy 3:​16) Full Bible hem Old Testament and Niu Testament. Olketa Jehovah’s Witness savve kolem tufala sekson bilong Bible hia, olketa Hebrew Scripture and olketa Christian Greek Scripture. Mifala duim datwan bikos mifala no laekem pipol for tingse iumi no needim samfala part bilong Bible distaem bikos hem for olketa Jew bifor nomoa.

Holy spirit leadim aposol Paul for raetem wanfala toktok wea sei: “Evri samting wea olketa raetem bifor hem for teachim iumi.” (Rome 15:4) So staka important information for helpem iumi stap long olketa Hebrew Scripture, olsem olketa samting wea happen long history wea savve helpem iumi distaem, witim staka gudfala advaes tu.

• Samting long history wea helpem iumi distaem. Olketa Hebrew Scripture garem staka information abaotem taem wea God wakem evri samting, witim tu taem wea firstfala man and woman sin. Sapos iumi no savve abaotem datwan, bae iumi no savve long wea nao iumi kam from, or why nao iumi dae. (Genesis 2:7, 17) And tu, olketa Hebrew Scripture storyim wei wea Jehovah God leadim and lukaftarem wanfala pipol wea kasem olketa sem samting long laef wea iumi tu kasem.​—James 5:​17.

• Gudfala advaes. Tufala buk long olketa Hebrew Scripture, Proverbs and Ecclesiastes, garem wisdom wea barava fitim for laef bilong iumi distaem tu. Olketa garem advaes long hao for evriwan insaed famili savve hapi and stap gud tugeta (Proverbs 15:17), hao for garem balance tingting saed long waka (Proverbs 10:4; Ecclesiastes 4:6), and best samting olketa young wan savve duim for garem gudfala laef and hapi (Ecclesiastes 11:9–​12:1).

Iumi savve kasem gudfala samting tu taem iumi studyim Law bilong Moses wea stap long Torah, wea hem nao first faevfala buk insaed Bible. Nomata olketa Christian no anda datfala Law distaem, hem garem nambawan information wea savve helpem iumi for stap gud and for hapi.​—Leviticus 19:18; Deuteronomy 6:​5-7.