Yes, plande taem Olketa Jehovah’s Witness duim samting for helpem pipol wea disaster kasem olketa. Mifala savve helpem olketa wea Witness and olketa wea no Witness tu. Diswan hem followim wanem Bible talem long Galatia 6:10, wea sei: “Iumi mas duim gudfala samting long evriwan . . . main wan nao olketa wea garem sem biliv.” Mifala trae tu for givim comfort long pipol and sapotim olketa long spiritual wei, wea datwan hem samting pipol barava needim long taem olsem.—2 Corinth 1:3, 4.

Bihaen disaster happen, olketa elder long olketa kongregeson long datfala ples trae for contactim evriwan long olketa kongregeson for faendemaot sapos olketa stap sef and wanem help nao olketa needim. Then olketa elder bae reportim samting wea olketa faendemaot, and eni samting wea olketa duim finis for helpem pipol, long branch office bilong Olketa Jehovah’s Witness long datfala kantri.

Sapos olketa kongregeson long datfala ples no fit for provaedem evri samting wea pipol bae needim, Governing Body bilong Olketa Jehovah’ Witness bae provaedem help. Olketa Christian long taem bilong Jesus duim semkaen samting long taem wea bigfala hangre hem kamap. (1 Corinth 16:1-4) Branch office bae markem olketa Disaster Relief Komiti for organizem and directim datfala waka. Olketa Jehovah’s Witness from olketa nara ples savve volunteer for iusim taem and samting wea olketa garem for provaedem help.—Proverbs 17:17.

Wanfala wei wea mifala iusim olketa donation wea pipol sendem long olketa branch office bilong Olketa Jehovah’s Witness hem for helpem pipol long taem bilong disaster. (Acts 11:27-30; 2 Corinth 8:13-15) Olketa wea volunteer for duim disfala relief waka no kasem eni pei for datwan, dastawe evri selen wea mifala markem for datfala waka mifala iusim for helpem pipol and no for peim olketa wakaman. Mifala careful for iusim olketa donation hia long stretfala wei.—2 Corinth 8:20.