Mifala Olketa Jehovah’s Witness traem best for strongim olketa famili blo mifala and blo nara pipol tu. Mifala respectim God wea hem nao startim famili arrangement. (Genesis 2:​21-​24; Ephesus 3:​14, 15) Lo Bible, hem talem olketa samting wea helpem pipol evriwea lo world for strongim marit blo olketa and for hapi.

 Mifala traem best for followim wanem Bible talem, bikos datwan helpem mifala for kamap gudfala hasband, waef, mami, and dadi. (Proverbs 31:10-​31; Ephesus 5:22–​6:4; 1 Timothy 5:8) Wisdom lo Bible helpem evri famili, nomata sapos no evriwan insaed Bible garem sem biliv. (1 Peter 3:​1, 2) Tingim toktok blo samfala man and woman wea marit partner blo olketa kamap wanfala Jehovah’s Witness:

•   “Bihaen mitufala marit, mitufala savve evritaem raoa and feel nogud. Then bihaen lo mek-six year, waef blo mi, Ivete, kamap wanfala Jehovah’s Witness and hem barava change. Hem savve patient tumas and kaen. Wei wea hem change olsem barava sevem marit blo mitufala.”​—Clauir, from Brazil.

•   “Mi barava feel nogud taem hasband blo mi, Chansa, start for studyim Bible witim Olketa Jehovah’s Witness, bikos mi tingse olketa Jehovah’s witness savve divaedem famili. Gogo mi start for luksavve hao Bible hem helpem marit blo mitufala.”​—Agness, from Zambia.

 Lo ministry blo mifala, mifala showim pipol hao wisdom insaed Bible savve helpem olketa for

•   Chusim gudfala marit partner

•   Hapi insaed firstfala year blo marit

•   Deal witim olketa in-law

•   Iusim selen lo gudfala wei

•   No raoa

•   Forgivim narawan

•   Trainim olketa pikinini

 For tok stret, samfala taem hem olsem. Olsem example, wanfala report lo 1998 from datfala research company Sofres storyim hao 1 lo evri 20 marit wea hasband or waef hem Jehovah’s Witness, garem bigfala problem taem datfala hasband or waef kamap Witness.

 Jesus hem sei, samfala wea followim olketa teaching blo hem bae garem problem lo famili blo olketa. (Matthew 10:32-​36) Wanfala man for raetem history wea nem blo hem Will Durant, talem hao lo rul blo Rome bifor, “pipol sei olketa Christian mekem olketa famili for divaed,” a and pipol lo distaem tu talem sem samting abaotem samfala Jehovah’s Witness. Bat waswe, datwan minim olketa Witness nao kosim problem?

 European Court of Human Rights sei staka taem hem olketa nara famili member nao wea nating willing for letem datfala Witness followim olketa biliv wea hem garem raet for followim. Datfala Kot hem sei moa: “Kaen problem olsem no affectim olketa Witness nomoa, bat hem affectim staka nara famili tu wea no evriwan insaed famili garem sem biliv.” b Nomata lo taem wea olketa famili member againstim narawan lo famili wea Jehovah’s Witness, olketa Witness traem best for followim toktok lo Bible wea sei: “Sapos eniwan duim nogud samting long iufala, iufala no changem bak. . . . Traem best blo iufala for stap gud witim olketa narawan.”​—Rome 12:17, 18.

 Olketa Witness followim instruction lo Bible for maritim nomoa samwan wea hem disaepol blo Christ,” wea minim for maritim samwan wea garem sem biliv. (1 Corinth 7:​39) Disfala komand kam from Bible, and hem fitim. Olsem example, wanfala article lo Journal of Marriage and Family lo 2010 sei: “staka taem olketa wea marit partner blo olketa hem sem religion, and garem sem biliv, olketa hapi winim olketa narawan wea marit. c

 Nomata olsem, Olketa Jehovah’s Witness no encouragem olketa wea insaed religion blo olketa for separate from marit partner wea garem difren biliv. Bible hem sei: “Sapos waef bilong wanfala brata hem no biliv bat hem hapi for stap witim hem, datfala brata mas no lusim hem. Sapos hasband bilong wanfala woman hem no biliv bat hem hapi for stap witim hem, datfala woman mas no lusim hasband bilong hem.” (1 Corinth 7:​12, 13) Olketa Jehovah’s Witness obeyim disfala komand.