Waswe, Man Savve Finis for Olsem Wanfala Jehovah’s Witness?

PLAY

Yes. Man savve duim datwan lo tufala wei:

Ask for finis. Man savve raetem leta or talem mifala hem no laek for gohed olsem wanfala Jehovah’s Witness.
Samting hem duim. Man savve duim samting wea showimaot hem no laek for gohed olsem wanfala Jehovah’s Witness. (1 Peter 5:9) Olsem example, maet hem joinim nara religion and talemaot hem bae gohed for member blo datfala religion.—1 John 2:19.

Waswe sapos man hem stop for preach and for attendim olketa meeting blo iufala? Bae iu sei hem finis for olsem wanfala Jehovah’s Witness?

Nomoa. Maet faith blo man hem kamap wik nomoa. Plande taem, olketa wea stop for worship no againstim samting olketa bilivim, bat olketa needim encouragement nomoa. Mifala trae for strongim and sapotim olketa wea wikdaon olsem. (1 Thessalonica 5:14; Jude 22) Sapos datfala man laekem eniwan for helpem hem, olketa elder and olketa narawan tu bae offerim spiritual help.—Galatia 6:1; 1 Peter 5:1-3.

Nomata olsem, olketa elder no garem paoa for forcem samwan for gohed olsem wanfala Jehovah’s Witness. Evri man wanwan nao garem raet for disaedem wanem hem bae duim. (Joshua 24:15) Lo tingting blo mifala, olketa wea worshipim God mas willing for duim datwan, and mas worshipim hem from heart blo olketa.—Psalm 110:3; Matthew 22:37.