Mifala hapi for story witim pipol bilong nara religion abaotem Bible, bat mifala no savve worship witim olketa wea biliv bilong olketa difren from biliv bilong mifala. Bible showim hao olketa tru Christian “wan mind.” Samting wea mekem mifala for wan mind hem olketa biliv bilong mifala. (Ephesus 4:​16; 1 Corinth 1:​10; Philippi 2:2) Diswan minim mifala wan mind for luksavve hem important for showimaot love, kea long pipol, and forgivim olketa. And tu, olketa biliv bilong mifala kam from stretfala savve from Bible, wea datwan nao helpem mifala for worshipim God long wei wea hem laekem.​—Rome 10:​2, 3.

Bible markem wei for worship witim pipol wea biliv bilong olketa difren, olsem tufala samting wea no join gud tugeta. (2 Corinth 6:​14-​17) Jesus talem olketa disaepol bilong hem for no join witim olketa nara religion. (Matthew 12:30; John 14:6) Law bilong Moses stopem olketa Israelite for worship witim olketa nation wea stap raonem olketa. (Exodus 34:11-​14) Olketa Israelite wea faithful bifor les for olketa nara nation for helpem olketa for wakem temple nogud datwan spoelem worship bilong olketa.​—Ezra 4:​1-3.

Ia. Olsem aposol Paul, mifala interest for savve long tingting and biliv bilong “staka pipol” taem mifala preach. (1 Corinth 9:​19-​22) Taem mifala story witim pipol, mifala followim advaes bilong Bible for showimaot “bigfala respect” for olketa.​—1 Peter 3:​15.