Nomoa. Olketa Jehovah’s Witness agree for tekem vaccine. Mifala luksavve diswan hem samting wea each Christian nao mas disaedem. Staka Jehovah’s Witness chus for tekem vaccine.

 Mifala laekem olketa treatment wea barava gud and mifala tinghae tumas lo wei wea olketa scientist waka hard for faendem treatment for olketa bigfala sik. Mifala tinghae tu lo hard waka blo olketa doctor, especially lo taem wea staka hard taem hem gohed.

 Olketa Jehovah’s Witness willing for followim advaes blo olketa bigman blo health. Olsem example, start lo taem wea COVID-19 pandemic start for spred, Olketa Jehovah’s Witness gohed for pablisim samfala reminder lo disfala website lo winim handred languis, wea encouragem pipol for obeyim olketa safety gaedlaen. Website blo mifala storyim tu why hem important for keepim physical distancing, followim gaedlaen saed lo olketa hipap lo pablik ples, quarantine, wasim hand, werem mask, and olketa nara samting olsem for kavarem feis wea olketa bigman blo gavman encouragem iumi for duim.—Rome 13:1, 2.

 Insaed staka year wea go pas, Olketa Jehovah’s Witness bin pablisim staka pablikeson wea mekhae lo olketa principle hia:

•   Olketa disison saed lo health, man seleva nao savve disaedem.—Galatia 6:5.

   “[Disfala magasin] hem no talem wankaen medicine or treatment wea gud winim narawan and hem no givim olketa medical advaes tu. Goal blo hem, hem for storyim olketa tru samting and letem man wea readim nao bae mekem olketa disison blo hemseleva”—Awake!, February 8, 1987.

   “Sapos iu or pikinini blo iu bae tekem vaccine or nomoa, datwan hem samting wea iuseleva nao mas disaedem.”—Awake!, August 22, 1965.

•   Mifala laek for kasem medical treatment bikos mifala tinghae lo laef.—Acts 17:28.

   “Taem Olketa Jehovah’s Witness kasem health problem, olketa willing for kasem help from olketa doctor wea barava savve gud lo waka blo olketa. Olketa tinghae lo laef and laek for duim best blo olketa for kasem treatment wea savve mekem olketa for gohed laef wea fitim olketa scripture lo Bible.”—The Watchtower, July 1, 1975.

   “Olketa Jehovah’s Witness willing for acceptim medicine and medical treatment. Olketa laek for gohed garem gudfala health and for laef for long taem. Olsem Luke, wanfala Christian lo first century, samfala Jehovah’s Witness tu kamap doctor. . . . Olketa Jehovah’s Witness barava tinghae lo hard waka and taem wea olketa doctor spendem for provaedem help saed lo medical. Olketa barava hapi tu taem olketa kasem help from olketa doctor and olketa kamap gud moa.”—The Watchtower, February 1, 2011.