Rong idea: Olketa Jehovah’s Witness no celebratem Christmas bikos olketa no biliv lo Jesus.

Tru samting: Mifala Christian. Mifala bilivim Jesus Christ nomoa savve sevem iumi.—Acts 4:12.

Rong idea: From iufala teachim pipol for no celebratem Christmas datwan mekem olketa famili no stap gud tugeta.

Tru samting: Mifala barava laekem olketa famili for hapi, and mifala iusim Bible for helpem olketa famili member stap gud tugeta.

Rong idea: Iufala misstim gud samting wea nara pipol kasem lo Christmas taem olketa givim samting, mekhae lo peace, and duim gud samting for narawan.

Tru samting: Mifala traem best for kaen and stap gud witim narawan evriday. (Proverbs 11:25; Rome 12:18) Olsem example, olketa meeting blo mifala and wei wea mifala preach hem followim instruction blo Jesus wea sei: “Samting wea iufala kasem hem free nomoa, so iufala mas no askem selen for samting wea iufala duim.” (Matthew 10:8) Nara samting tu, mifala mekhae lo Kingdom blo God wea hem nomoa bae mekem earth for garem peace.—Matthew 10:7.

•   Jesus talem iumi for celebratem dae blo hem, no taem wea hem born.—Luke 22:19, 20.

•   Olketa aposol and disaepol lo taem blo Jesus no celebratem Christmas. Datfala New Catholic Encyclopedia hem sei pipol start for celebratem Christmas lo samting olsem 243 [C.E.], wea hem winim wan handred year bihaen olketa aposol dae.

•   No eni pruv stap wea showimaot Jesus born lo December 25. Bible no talem date wea hem born.

•   Lo tingting blo mifala God hem no hapi lo Christmas bikos Christmas kam from olketa heathen kastom and celebration.—2 Corinth 6:17.

Staka pipol celebratem Christmas nomata olketa savve hem kam from olketa heathen celebration and Bible no sapotim. Maet lo tingting blo olketa hem gud for olketa Christian celebratem Christmas winim for olketa narawan feel nogud lo olketa.

Bible sei iumi shud iusim “gudfala tingting” for “luksavve long samting wea God laekem,” no followim nomoa tingting blo nara pipol. (Rome 12:1, 2) Bible teachim iumi for tinghae lo tru samting. (John 4:23, 24) Mifala no laekem nara pipol for garem nogud tingting abaotem mifala. Bat mifala laek for obeyim wanem Bible talem nomata datwan mekem samfala les lo mifala.

Nomata mifala chus for no celebratem Christmas, mifala respectim raet blo each man wanwan for disaed seleva for celebratem or nomoa. Mifala no trae for stopem narawan for celebratem Christmas.