Rong idea: Olketa Jehovah’s Witness no celebratem Easter bikos olketa no Christian.

Tru samting: Mifala bilivim Jesus Christ nao man for sevem iumi, and iumi shud traem best for “barava followim gud” example bilong hem.—1 Peter 2:21; Luke 2:11.

Rong idea: Iufala no bilivim Jesus hem laef bak bihaen hem dae.

Tru samting: Mifala bilivim Jesus hem laef bak, wea datwan nao main reason why olketa Christian savve garem faith. Mifala mekhae long wei wea Jesus laef bak long preaching waka bilong mifala.—1 Corinth 15:3, 4, 12-15.

Rong idea: Iufala no laekem olketa pikinini bilong iufala for hapi witim olketa narawan wea celebratem Easter.

Tru samting: Mifala lovem olketa pikinini bilong mifala, and mifala waka hard for trainim olketa and for helpem olketa for hapi.—Titus 2:4.

• Bible no sapotim wei for celebratem Easter.

• Jesus talem iumi for celebratem dae bilong hem, no taem hem laef bak. Mifala celebratem Memorial bilong dae bilong Jesus evri year long sem day wea hem dae followim kalenda bilong olketa Jew long datfala taem.—Luke 22:19, 20.

• God hem no hapi long Easter, bikos olketa kastom wea join witim Easter kam from wei for worshipim wanfala heathen god. God laekem iumi for worshipim hem nomoa, and no hapi long worship wea no followim samting wea hem talem.—Exodus 20:5; 1 Kings 18:21.

Long tingting bilong mifala, disison for no celebratem Easter hem barava followim wanem Bible talem. Bible encouragem iumi for no just followim nomoa samting wea nara pipol duim, bat for garem gudfala tingting and ting raonem sapos hem stret for duim datwan. (Proverbs 3:21; Matthew 15:3) Mifala storyim biliv bilong mifala abaotem Easter witim narawan taem olketa askem mifala for duim datwan. Nomata olsem, mifala respectim raet bilong man wanwan for disaedem wanem hem bae duim.—1 Peter 3:15.