Mi born lo La Ceiba, Honduras. Mi nao lastborn blo faevfala pikinini and mi nomoa boy. And tu, mi nomoa pikinini lo famili wea earpas. Famili blo mi stap long area wea pipol raf tumas and mifala barava poor. Taem mi samting olsem fofala year nomoa, laef blo mifala kamap hard moa taem dadi blo mi dae long accident long ples hem waka.

 Mami traem best for lukaftarem mi and olketa sista blo mi, bat plande taem hem no garem inaf selen for peim kaleko. Taem hem rain, mi savve cold fogud from mi no garem kaleko wea fitim.

 Taem mi big lelebet, mi lanem Honduras Saen Languis (wea olketa kolem LESHO), so mi savve story witim olketa narawan wea earpas. Bat mami and olketa sista blo mi no savve story long LESHO, so olketa iusim olketa mekap saen nomoa for story witim mi. Nomata olsem, mami lovem mi and protectim mi from eni danger samting. Hem mek saen for warnim mi for stap klia lo olketa nogud samting olsem smoke and wei for drink. Mi hapi mi followim wanem hem talem.

 Taem mi smol, mami savve tekem mi lo Catholic Church, bat mi no minim eni samting bikos no eniwan duim saen languis for mi minim. From hem boring tumas, taem mi ten year, mi no go moa. Nomata olsem, mi laek lanem moa samting abaotem God.

 Lo 1999, taem mi 23 year, mi meetim wanfala woman blo United States wea hem member blo evangelical church. Hem duim samfala Bible leson witim mi and teachim mi American Saen Languis (wea olketa kolem ASL). Mi laekem tumas wanem mi lanem from Bible gogo, mi disaed for kamap pastor. So mi muv go lo Puerto Rico for attendim wanfala Christian training skul for olketa wea earpas. Lo 2002, mi kam bak moa lo La Ceiba and mi witim samfala fren startim wanfala church for olketa wea earpas. Gogo mi maritim wanfala fren hia, wea nem blo hem Patricia.

 From mi pastor, mi duim olketa sermon long LESHO, showim olketa piksa abaotem olketa Bible story, and mi actim olketa story hia for helpem olketa wea earpas for minim. Mi visitim tu olketa wea earpas lo olketa nara taon klosap for encouragem olketa and helpem olketa wea garem problem. Mi go long wanfala missionary gogo tu long United States and Zambia. Bat for tok stret, mi no barava savve gud lo Bible. Mi teachim nomoa samting wea olketa narawan storyim lo mi, and samting wea mi lanem from olketa piksa. Mi garem staka kwestin abaotem Bible.

 Wanday, samfala member blo church wea mi startim talem olketa laea samting abaotem mi. Olketa sei mi man for spaka and mi tekem wanfala O2. Mi feel sorre and barava kros. No longtaem bihaen, mitufala Patricia lusim church hia.

 Plande taem olketa Jehovah’s Witness kam long haos blo mifala, bat no enitaem mitufala Patricia story witim olketa. Bat bihaen mitufala lusim church, Patricia agree for studyim Bible witim Thomas and waef blo hem Liccy. Mi tinghae lo wei wea tufala savve long saen languis, nomata olketa no earpas. So no longtaem bihaen, mi tu join insaed study.

 For samfala month, mitufala iusim olketa video lo ASL for studyim Bible. Bat gogo samfala fren laea for sei olketa Jehovah’s Witness followim olketa man nomoa, so mifala stopem datfala Bible study. Nomata Thomas showim mi samfala pruv olketa Jehovah’s Witness no followim olketa man olsem leader, mi no bilivim hem.

 Samfala month bihaen, Patricia hem kasem feeling for barava sorre wea no savve finis, so hem prea lo God for sendem olketa Jehovah’s Witness kam lo haos moa. No longtaem bihaen, wanfala neiba wea hem Jehovah’s Witness visitim Patricia and askem hem sapos hem laekem Liccy for kam lukim hem moa. Liccy hem kamap wanfala fren wea helpem Patricia tumas. Hem visitim Patricia evri week for encouragem hem and studyim Bible witim hem. Nomata olsem, mi no barava trustim olketa Witness.

 Long 2012, olketa Jehovah’s Witness duim wanfala spesol campaign for offerim video lo LESHO wea garem title Waswe, Iu Laek for Savve Long Tru Samting? Liccy tekem kam wanfala copy for mitufala. Taem mi lukluk lo datfala video, mi barava sapraes for lanem hao staka samting wea mi teachim bifor olsem hellfire and teaching wea sei soul no savve dae, hem no stap insaed Bible.

 Week bihaen datwan, mi go lo Kingdom Hall blo olketa Jehovah’s Witness for story witim Thomas. Mi talem hem mi laek teachim tru samting lo Bible lo olketa wea earpas, bat bae mi no kamap Jehovah’s Witness. Plan blo mi hem for startim niu church blo miseleva for olketa wea earpas nomoa. Thomas praisem mi for wei wea mi laek teachim tru samting, bat then hem showim mi Ephesus 4:5, wea showimaot trufala Christian kongregeson bae wan mind and worship tugeta.

 Thomas givim mi tu video long ASL wea garem title Jehovah’s Witnesses—Faith in Action, Part 1: Out of Darkness. Disfala video showim hao samfala man evritaem hipap tugeta and lukluk gud lo Bible for minim wanem nao olketa tru teaching. Mi minim feeling blo olketa man hia. Mi tu lukaotem truth. From datfala video nao mi luksavve olketa Witness teachim tru samting bikos biliv blo olketa kam from Bible nomoa. So mi start for studyim Bible moa, and long 2014, mitufala Patricia baptaes and kamap Jehovah’s Witness.

 Mi laekem tumas kongregeson blo olketa Jehovah’s Witness bikos hem klin, olsem God hem klin. Olketa iusim klinfala toktok and no ravem narawan. Olketa stap gud tugeta and encouragem narawan. Olketa Witness wan mind and teachim sem samting from Bible nomata wanem kantri olketa stap lo hem or wanem languis nao olketa story lo hem.

 Mi barava hapi for lanem tru samting from Bible. Olsem example, mi lanem Jehovah nao Olmaeti God and Lord blo evri samting. Hem lovem olketa wea earpas and olketa wea herehere. Mi hapi tumas God lovem mi. Mi lanem tu earth bae kamap paradaes and iumi bae garem chance for laef olowe and garem perfect health. Mi barava luk forward lo datfala taem!

 Mitufala Patricia laekem tumas for storyim Bible witim olketa wea earpas. Distaem mifala studyim Bible witim samfala wea mifala sem church bifor. Bat distaem mi no kwestinim olketa samting wea mi teachim, olsem taem mi pastor bifor. Mi hapi tumas for faendem ansa for olketa kwestin blo mi taem mi studyim Bible witim olketa Jehovah’s Witness.