Mi born lo Gomba, wanfala area lo Uganda. Plande pipol lo there barava poor. Taon blo mifala no garem paoa, so lo naet mifala iusim olketa kerosene lamp.

 Parents blo mi, olketa farmer, and olketa muv from Rwanda for go stap lo Uganda. Olketa plantim coffee and banana, and tufala wakem wankaen alcohol from olketa banana wea olketa kolem waragi. Parents blo mi garem tu olketa kokorako, goat, pigpig, and buluka. Culture wea mi growap lo hem mekem mi tingse waef mas obeyim hasband lo evri samting and hem no savve talemaot tingting blo hem.

 Taem mi 23 years old, mi muv go lo Rwanda, and mi savve go lo olketa dance club witim olketa narawan wea sem age olsem mi. From mi go plande taem lo wanfala club hia, manager givim card lo mi mekem mi savve go insaed enitaem nomoa and hem free. Mi laekem tumas for watchim olketa movie wea pipol faet and raf tumas. Pipol wea mi associate witim and olketa hapitaem wea mi duim mekem mi man wea raf tumas, durong, and drink tumas.

 Lo year 2000, mi go stap witim gelfren blo mi wea nem blo hem Skolastique Kabagwira, and mitufala garem thrifala pikinini. Mi followim wei wea mi growap lo hem, and mi mekem hem for nildaon lo mi enitaem hem kam story lo mi or laek askem samting. Mi talem hem tu dat evri samting wea mifala famili garem hem blo mi nomoa, and mi savve duim eni samting wea mi laekem witim olketa. Plande taem mi savve go aot lo naet and kam bak lo haos lo samting olsem thri klok lo morning drunk. Mi savve noknok lo door, and sapos Skolastique tek longtaem for openem, mi savve killim hem.

 Lo datfala taem, mi waka olsem supervisor for wanfala security company wea mi tekem gud pei. Skolastique askem mi for go witim hem lo Pentecostal church wea hem attendim, bikos hem tingse datwan bae changem wei blo mi. Bat mi no laek go. Mi start for frenim nara woman, and from mi raf and no faithful, Skolastique tekem thrifala pikinini blo mitufala and olketa go stap witim parents blo hem.

 Wanfala fren blo mitufala wea olo story lo mi abaotem wei blo mi. Hem encouragem mi for go bak lo Skolastique. Hem sei olketa pikinini blo mi shud stap witim dadi blo olketa. So lo 2005, mi stop for drink, mi lusim nara woman, and go bak lo Skolastique. Lo 2006 mitufala marit. Bat mi still raf and spoelem waef blo mi.

 Lo 2008, wanfala Jehovah’s Witness wea nem blo hem Joël kam lo haos blo mifala, and mi lisin lo message blo hem. For staka month, hem witim nara Witness, Bonaventure, visitim mi and mifala storyim plande samting abaotem Bible. Mi askem staka kwestin, especially abaotem buk blo Revelation. Mi trae for pruvim olketa Witness nao rong. Olsem example, mi askem olketa why olketa sei “big crowd” wea Revelation 7:9 storyim bae stap lo earth bikos datfala verse sei “olketa standap front long datfala throne [blo God] and front long datfala Pikinini Sheepsheep” Jesus Christ. Joël patient witim mi and ansarem olketa kwestin blo mi. Olsem example, hem showim Isaiah 66:1 lo mi wea sei God kolem earth “ples wea [hem] putum lek blong [hem] lo hem.” So big crowd hia standap lo earth front lo throne blo God. And mi readim tu Psalm 37:29, wea sei pipol wea raeteous bae stap olowe lo earth.

 Gogo mi agree for studyim Bible. So Bonaventure study witim mi and Skolastique. Taem mi studyim Bible, datwan mekem mi for laek changem wei blo mi. Mi lane for respectim waef blo mi. Mi no savve askem hem for nildaon lo mi taem hem laek story lo mi or askem samting, and mi stop for sei evriting wea famili onam hem blo mi nomoa. Mi stop for watchim olketa raf movie tu. Hem no isi for changem wei blo mi and mi mas lane for barava kontrolem miseleva and for hambol.

 Samfala year bifor diswan, mi tekem firstborn pikinini blo mi, Christian, for go stap witim olketa relative lo Uganda. Bat bihaen mi readim Deuteronomy 6:4-7, mi luksavve God givim responsibility lo mi and waef blo mi for lukaftarem olketa pikinini blo mitufala, wea minim tu for teachim olketa wanem God laekem olketa for duim. Mitufala and boy blo mitufala hapi tumas taem mitufala tekem hem kam bak lo haos!

 Mi lanem Jehovah hem God wea showimaot mercy, and mi bilivim hem forgivim mi for nogud tingting and wei blo mi bifor. Mi hapi tumas Skolastique joinim mi for studyim Bible. Mitufala dedicatem laef blo mitufala lo Jehovah and mitufala baptaes lo December 4, 2010. Distaem mitufala trustim each other, and hapi tumas taem mifala famili followim olketa Bible principle. Waef blo mi barava hapi mi kam bak lo haos stretawe bihaen mi finis waka. Hem tinghae tu dat mi respectim hem, mi disaed for no drinkim alcohol, and mi no raf. Lo 2015, mi kasem appointment for waka olsem elder for help lukaftarem kongregeson blo mifala. Mitufala garem faevfala pikinini, and thrifala nao baptaes finis.

 Taem mi start for studyim Bible witim Olketa Jehovah’s Witness, mi no just bilivim nomoa wanem olketa teachim bat mi askem olketa kwestin for pruvim datwan. Mi tinghae olketa iusim Bible for ansarem olketa kwestin blo mi. Mi and Skolastique luksavve olketa wea sei olketa worshipim tru God shud obeyim evri samting wea hem talem and no just olketa samting wea olketa laek obeyim nomoa. Mi thankiu tumas lo Jehovah wea pullim mi kam lo hem and lo big famili blo olketa brata and sista. Taem mi ting go bak lo laef blo mi, mi luksavve God savve helpem eniwan wea laek mekem hem hapi for changem wei blo hem.