Mi born lo Calgary, wanfala taon lo Alberta, Canada. Taem mi smol, parents blo mi divorce, and mitufala mami go stap witim tufala grani blo mi. Tufala lovem mitufala mami, and mi barava hapi. Mi savve tingim yet olketa year wea mitufala stap witim tufala. Hem barava gud tumas.

 Bat taem mi seven years old, laef blo mi start for worse nao. Mami maritim moa dadi blo mi and mifala muv lo Saint Louis, lo Missouri, America. No longtaem bihaen, mi luksavve dadi blo mi savve raf tumas. Olsem example, bihaen lo first day lo niu skul, dadi herem samwan bullyim mi bat mi no faet bak. Hem kros tumas and hitim mi winim olketa pikinini lo skul duim! Mi lane from diswan and start for faet witim olketa nara pikinini taem mi seven years old nomoa.

 Mami savve kros tumas and no hapi bikos dadi hem tok nogud lo hem, so hem tok nogud lo hem tu and savve hitim hem. Evritaem tufala savve raoa big tumas. Taem mi 11 years old, mi start for iusim olketa drug and drinkim alcohol. Mi savve raf tumas and savve faet witim pipol lo street. Taem mi graduate lo hae skul, mi man wea barava raf tumas nao.

 Taem mi 18 years old, mi joinim U.S. Marine Corps (Army). Lo army, mi lanem hao for killim dae narafala man. Faevfala year bihaen, mi lusim army and start for studyim psychology (tingting blo man) bikos mi laek waka lo Federal Bureau of Investigation. Mi start study lo university lo America and then mi muv go bak lo Canada and gohed study lo there.

 Lo university, mi start for feel nogud tumas lo pipol bikos olketa savve tingim olketa seleva nomoa. Hem olsem no eniting gud nomoa lo world, and hem luk olsem no eniwan savve stretem olketa problem blo olketa man. Mi lus hope nao dat olketa man savve mekem world kamap gud.

 From mi no garem eni hope, mi start for drink tumas, iusim olketa drug, laek for kasem staka selen, and duim sex. Mi savve tingim nomoa next party mi bae go lo hem or wanem woman nao bae mi sleep witim. From mi bin stap lo army bifor, datwan mekem mi laek faet witim pipol olowe. Mi tingse mi savve disaedem seleva wanem hem stret and no stret and mi savve go stretem eniwan wea mi tingse hem duim rong samting lo narawan. Bat for tok stret, wei for mi raf lo pipol nao kontrolem mi.

 Wanday, taem mi and fren blo mi ston and sidaon lo rum andanit lo haos for redyim olketa pasol marijuana for salem, wea hem againstim law for duim, hem askem mi sapos mi biliv lo God. Mi sei: “Sapos God nao kosim wei for safa wea gohed lo world, mi no laek savve lo hem!” Lo next day, wea hem first day lo niu waka, wanfala man wea waka witim mi wea hem wanfala Jehovah’s Witness askem mi: “Hao, iu tingse God nao kosim wei for safa wea gohed lo world?” Mi sapraes hem askem mi olsem bikos mi just storyim datwan lo day bifor, so datwan mekem mi laek savve moa. Lo next sixfala month, mifala story abaotem staka samting, and hem showim mi olketa ansa from Bible for samfala hard kwestin blo mi abaotem laef.

 Woman wea mi engage witim and stap witim no laekem mi for story lo hem abaotem olketa samting wea mi lanem. Lo wanfala Sunday, mi talem hem mi invaetem olketa Witness lo haos for studyim Bible witim mitufala. Lo next day, bihaen mi finis waka, mi arrive bak lo haos and lukim hem bin tekem evri samting from haos and lusim mi. Mi go aotsaed and krae fogud. Mi prea lo God tu and begim hem for helpem mi. Hem nao first taem mi iusim nem blo God, Jehovah, taem mi prea.—Psalm 83:18, NW.

 Tufala day bihaen, mi duim first Bible study witim olketa Witness, wanfala hasband and waef. Bihaen tufala go bak, mi gohed readim study buk You Can Live Forever in Paradise on Earth, and lo datfala naet mi readim finis full buk. a Wanem mi lanem abaotem Jehovah God and Son blo hem, Jesus Christ, kasem heart blo mi. Mi lanem Jehovah hem tingim iumi and feel nogud taem iumi safa. (Aesaea 63:9) Mi tinghae tumas lo love wea God garem for mi and sakrifaes wea Son blo hem mekem for mi. (1 John 4:10) Mi luksavve Jehovah hem patient witim mi “bikos hem no laekem eniwan for dae bat hem laekem evriwan for garem chance for repent.” (2 Peter 3:9) Mi feel olsem Jehovah laekem mi for fren witim hem.—John 6:44.

 Mi start for attendim olketa kongregeson meeting lo sem week nomoa. Mi garem long hair, olketa earring, and mi luk raf tumas, bat olketa Witness ting lo mi olsem wanfala relative wea olketa no lukim for longfala taem. Olketa nao tru Christian. Mi feel olsem mi stap witim tufala grani blo mi taem mi smol, bat distaem hem winim datwan.

 No longtaem bihaen, olketa samting wea mi lanem lo Bible start for changem laef blo mi. Mi katem hair blo mi, stop for durong, and stop for iusim drug and drinkim alcohol. (1 Corinth 6:9, 10; 11:14) Mi laek for mekem Jehovah hapi. So taem mi lanem hao samting wea mi duim mekem Jehovah no hapi lo mi, mi no trae for mek excuse. Bat plande taem samting wea mi duim barava katem heart blo mi and mi savve sei lo miseleva, ‘Mi no savve gohed duim diswan.’ And semtaem nomoa mi trae for changem tingting blo mi and wanem mi duim. From datwan, mi start for kasem olketa gud samting from mi duim wanem Jehovah hapi lo hem. Lo July 29, 1989, wea hem sixfala month bihaen mi start studyim Bible, mi baptaes for kamap wanfala Jehovah’s Witness.

 Bible helpem mi for changem wei blo mi. Bifor mi savve raf tumas sapos samwan againstim mi. Bat distaem mi waka hard for “stap gud witim olketa narawan.” (Rome 12:18) Mi thankiu lo Jehovah bikos olketa toktok blo hem lo Bible and holy spirit nao mekem mi for change and no paoa blo mi.—Galatia 5:22, 23; Hebrew 4:12.

 Distaem mi no slave nao lo olketa drug, wei for raf, and for durong, bat mi traem best for mekem Jehovah hapi and duim best blo mi for hem. Mi trae for helpem olketa narawan for savve lo hem. Samfala year bihaen mi baptaes, mi muv go lo nara ples lo world wea needim staka moa pipol for preach. Lo olketa year wea go pas, mi hapi tumas bikos mi garem chance for teachim Bible lo plande pipol and mi lukim hao Bible barava helpem olketa tu. Mi hapi tumas tu bikos mami blo mi kamap wanfala Jehovah’s Witness. Wan reason why hem duim olsem hem bikos hem lukim mi changem wei and tingting blo mi and kamap gudfala man.

 Lo 1999, lo El Salvador, mi graduate lo skul wea distaem olketa kolem Skul for Olketa Kingdom Evangelizer. Datfala skul trainim and helpem mi for leadim waka for preach and teach and for lukaftarem kongregeson. Bihaen lo skul, lo datfala sem year, mi maritim Eugenia. Mitufala gohed for duim preaching waka full taem lo Guatemala.

 Lo bifor mi feel nogud tumas lo pipol and laef, bat distaem mi hapi tumas. Wei for followim olketa teaching lo Bible mekem mi kamap free from wei for durong, for raf, and hem mekem laef blo mi fulap lo love and peace.