Virginia, wea hem wanfala Jehovah’s Witness, hem garem sik wea olketa kolem locked-in syndrome. Body blo hem paralaes. Hem savve lukim and herem samting, openem and klosim eye, and lelebet muvim hed blo hem. Bat hem no savve toktok or kaikai. Bifor hem kasem disfala sik hem strong and healthy. Bat lo wanfala morning lo 1997, hem kasem big pain lo bak lo hed blo hem. Hasband blo hem tekem hem lo hospital, and lo datfala evening hem coma nao. Tufala week bihaen hem wekap and hem lo intensive-care unit lo hospital, hem paralaes and wanfala machine nao helpem hem for brith. For samfala day, hem no savve rememberim eni samting, nomata hemseleva tu.

 Virginia explainim next samting wea happen. “Isisi olketa memory blo mi start for kam bak. Mi barava prea strong. Mi no laek dae and for smol boy blo mi no garem mami. For mekem mi no fraet, mi trae for rememberim staka verse lo Bible.

 “Bihaen samfala taem go pas, olketa doctor muvim mi aot from intensive care. For sixfala month mi bin stap lo olketa difren hospital and nara ples for helpem mi kamap moabeta, and then mi go bak lo haos. Bat mi still paralaes and mi needim help for duim evri samting. Mi feel barava wikdaon! Mi feel iusles and tingse mi no savve duim eni samting for Jehovah and olketa narawan. And mi wari tu abaotem hu nao bae lukaftarem son blo mi.

 “Mi start for readim experience blo olketa nara Witness wea kasem bigfala sik and mi sapraes lo wanem olketa savve duim for Jehovah. Experience blo olketa helpem mi for garem positive tingting and for tingim wanem mi savve duim. Bifor mi kasem disfala sik, mi iusim lelebet taem nomoa for duim study, for go lo preaching waka, and for prea. Bat evri day nao mi garem plande taem for duim olketa samting hia. So mi disaed strong for no wikdaon bat for iusim taem blo mi for worshipim Jehovah.

 “Mi lane for iusim computer. Mi iusim software lo computer wea savve type for mi followim wei wea mi muvim hed blo mi. Hem savve mekem mi taed, bat datfala technology letem mi for studyim Bible and for sharem hope blo mi lo olketa narawan lo wei for raetem leta and sendem e-mail. For mi story witim narawan, mi savve iusim wanfala board wea garem alphabet lo hem. Narawan wea stap witim mi hem point go lo olketa leta lo alphabet. Sapos hem chusim rong leta lo alphabet then mi bae openem waed tufala eye blo mi, bat sapos hem chusim stretfala leta then mi bae satem tufala eye blo mi. Mifala gohed for duim datwan for mekem olketa word and sentence. Samfala sista wea spendem staka taem witim mi savve kwiktaem luksavve wanem mi laek talem. Bat samfala taem olketa chusim difren word, then mifala savve laflaf.

 “Mi savve enjoyim wei for spendem taem witim kongregeson. Mi evritaem lisin lo olketa meeting, and distaem mi iusim videoconferencing for joinim meeting. Mi savve typem olketa koment blo mi and then samwan lo kongregeson savve readim aot lo kwestin and ansa part lo kongregeson meeting. Each month mi savve joinim smol grup blo olketa Witness for lukim olketa JW Broadcasting program. a

 “Mi garem disfala locked-in syndrome for 23 years nao. Samfala taem mi feel sorre. Bat samting wea helpem mi for no feel olsem hem wei for prea, spendem taem witim olketa brata and sista, and for gohed busy for worshipim Jehovah. And witim help blo kongregeson mi duim auxiliary pioneer for winim sixfala year. Mi trae for showimaot gudfala example for son blo mi Alessandro, wea distaem hem marit and hem wanfala elder. Hem and waef blo hem tufala regular pioneer tu.

 “Plande taem mi savve ting raonem olketa samting wea mi bae fit for duim lo paradaes. First samting mi laek for duim hem for iusim voice blo mi for story abaotem Jehovah. Mi laek for wakabaot followim stream for enjoyim ples wea luk naes tumas. And for winim 20 years olketa iusim wanfala tube for feedim mi, so mi barava luk forward for pikim apple from tree and kaikaim. And from mi born lo Italy, mi luk forward for kaikaim olketa fevaret kaikai blo mifala, and pizza tu!

 “Datfala ‘hope wea iumi garem for sev’ hem help for protectim tingting blo mi. (1 Thessalonica 5:8) From mi tingim niu world, datwan mekem mi hapi nomata mi no savve duim plande samting distaem. Mi savve klosap nao bae datwan change. Mi barava luk forward ‘lo datfala tru laef’ wea Jehovah promis for givim iumi and hem bae iusim Kingdom blo hem for duim datwan.”—1 Timothy 6:19; Matthew 6:9, 10.