Madián and Marcela garem evri samting wea olketa needim for garem gud laef lo Medellín, wanfala taon lo Colombia. From Madián kasem gud pei from waka blo hem, tufala stap lo wanfala barava naes apartment. Bat nomata tufala worshipim Jehovah God, wanfala samting happen wea mekem tufala for ting raonem wat nao moa important lo laef blo tufala. Tufala sei: “Lo 2006, mitufala attendim ‘Keepim Eye Bilong Iu Simpol’ spesol assembly day. Plande tok lo assembly mekhae lo wei for garem simpol laef, mekem iumi savve duim moa samting for worshipim God. Taem assembly hem finis, mitufala luksavve mitufala bin duim opposite lo datwan. Mitufala garem big kaon bikos mitufala savve evritaem baem samting nomata mitufala no garem inaf selen for datwan.”

 Olketa tok lo assembly mekem Madián and Marcela luksavve tufala need for change, so tufala start for mekem laef blo tufala simpol. Tufala sei: “Mitufala stop for spendem staka selen. Mitufala muv lo wanfala smol apartment, salem car blo mitufala, and peim wanfala motorbike.” And tu, tufala stop for go olowe lo olketa stoa, mekem tufala no kasem temptation for peim staka samting. Tufala spendem moa taem for story abaotem Bible witim olketa neiba. And tufala fren gud witim olketa spesol pioneer a wea spendem staka taem for teachim pipol abaotem Jehovah God.

 No longtaem bihaen, Madián and Marcela disaed for duim moa samting for Jehovah. Tufala muv lo wanfala smol kongregeson lo bush wea garem need. Madián lusim waka blo hem, mekem tufala savve muv. Boss blo hem tingse hem karangge for lusim gud waka blo hem. So Madián story witim hem and sei: “Iu kasem bigfala pei, bat hao, iu hapi?” Boss blo Madián sei hem no hapi bikos hem garem staka problem wea hem no savve stretem. Then Madián talem hem: “So samting wea moa important lo laef hem no haomas selen iumi kasem, bat hem for luksavve wat nao mekem iumi hapi. Wei for teachim pipol abaotem God mekem mi and waef blo mi hapi, and mitufala laek for iusim moa taem for duim disfala waka mekem mitufala hapi go moa.”

 Madián and Marcela barava hapi and satisfae bikos wei for worshipim God hem moa important lo laef blo tufala. For 13 year finis, tufala helpem olketa kongregeson wea garem need lo northwest part lo Colombia. And distaem tufala enjoyim privilege for spesol pioneer.