Bryn, wea stap lo North Carolina, lo America, hem wanfala member lo Hospital Liaison Komiti lo there, and hem waka witim olketa lo hospital for helpem Olketa Jehovah’s Witness wea sik.

 From COVID-19 pandemic gohed, plande hospital no letem pipol kam visitim olketa wea sik. Bryn ringim boss lo hospital wea lukaftarem spiritual kea blo olketa sik man and famili blo olketa and askem hem wat nao hem savve duim for helpem olketa Witness wea stap lo hospital.

 Taem Bryn hem ring go, hem story witim assistant blo datfala boss. From Bryn no savve visitim olketa Witness wea sik, hem askem datfala man sapos hem savve givim phone namba blo hem lo olketa Witness hia. Datfala man hem sei bae hem duim.

 Then Bryn hem ting abaotem olketa wea waka lo datfala hospital. Hem talem datfala man hem tinghae lo waka wea olketa lo hospital duim and hem hope dat olketa stap healthy. Bryn sei hem readim nius hao staka pipol kasem stress from pandemic and especially olketa wea waka lo hospital.

 Datfala assistant talem Bryn hao COVID-19 kosim staka stress for olketa wea waka lo hospital.

 Then Bryn sei: “Website blo mifala garem information wea savve helpem pipol deal witim stress. Sapos iu go lo datfala website jw.org and typem ‘stress’ lo Search bar, iu bae faendem information wea savve encouragem olketa wea waka lo hospital.”

 Taem tufala story lo phone, datfala assistant hem go lo website, and typem word “stress” lo Search bar, and hem lukim olketa article abaotem stress. Hem sei: “Ei! Bae mi showim diswan lo boss. Disfala information bae helpem olketa wea waka hia and olketa narawan tu. Bae mi printim olketa article hia and givimaot.”

 Bihaen tu-thri week, Bryn story witim datfala boss, and boss hia sei olketa lukluk lo datfala website and olketa printim finis olketa article abaotem stress and olketa nara subject. Olketa sharem article hia witim olketa nurse and olketa narawan wea waka lo datfala hospital.

 Bryn sei: “Datfala boss talem thankiu for help wea iumi givim and wei wea olketa raetem gud olketa article hia. Olketa article hia barava helpem olketa.”