Irma wea stap lo Germany, hem klosap 90 years old. From hem insaed tufala big accident and hem kasem samfala operation, hem no savve preach from haos tu haos olsem hem duim bifor. Distaem Irma hem story abaotem Bible witim olketa narawan taem hem raetem leta lo olketa relative and fren. Plande taem olketa wea kasem leta from Irma gohed ringim hem for ask wanem taem nao bae olketa kasem next leta, bikos leta wea olketa kasem barava encouragem olketa. Irma savve kasem tu staka leta for sei thankiu lo hem and olketa ask for hem raetem samfala leta moa lo olketa. Irma sei: “Diswan mekem mi hapi and hem mekem mi savve gohed lo preaching waka.”

 Irma sendem olketa leta tu lo plande olo pipol. Hem sei: “Mi raetem wanfala leta lo wanfala olo woman wea hasband blo hem dae, and hem ringim mi for sei datfala leta barava comfortim hem. Hem keepim datfala leta insaed lo Bible blo hem and plande taem hem readim leta hia lo evening. Nara woman wea hasband blo hem dae no longtaem go nomoa sei leta wea hem kasem from mi helpem hem winim wanem priest hem talem. Datfala woman hem garem staka kwestin and hem ask for kam visitim mi mekem mi savve ansarem olketa kwestin blo hem.”

 Wanfala woman wea savve lo Irma bat wea no wanfala Witness hem muv go lo ples wea farawe. Hem askem Irma for raetem olketa leta lo hem. Irma sei: “Datfala woman hem keepim evri leta wea mi sendem. Bihaen hem dae, dota blo hem ring kam. Hem sei hem readim evri leta wea mi raetem lo mami blo hem and hem ask sapos mi savve raetem olketa leta abaotem Bible lo hem tu.”

 Irma barava enjoyim ministry blo hem. Hem sei: “Mi prea strong lo Jehovah for helpem mi gohed worshipim hem. Nomata distaem mi no savve duim haos-tu-haos ministry olsem mi duim bifor, mi duim best blo mi for worshipim Jehovah.”