Wanday taem Eliso, wea hem wanfala Jehovah’s Witness hem conductim Bible study lo haos blo wanfala woman wea interest, seknomoa tufala visitor noknok lo door. Wanfala pastor and waef blo hem kam visitim datfala woman. Eliso bin herem hao only son blo tufala just dae.

 Taem Eliso talem tufala hem sorre tumas for herem son blo tufala hem dae, datfala pastor and waef blo hem start for krae big. Then from datfala pastor hem kros tumas, hem sei: “Mi no minim why God letem kaen samting olsem for happen! Why nao hem tekem only son blo mi? Mi bin duim waka for God for 28 years, mi duim staka gud samting, and diswan hem pei wea hem givim lo mi! Why nao God killim dae son blo mi?”

 Eliso explainim lo tufala dat God no killim dae son blo tufala. Sista hia story tu abaotem ransom, resurrection, and olketa reason why God letem olketa nogud samting for happen. Datfala pastor and waef blo hem talem Eliso hao hem just givim ansa for olketa kwestin wea tufala bin prea abaotem.

 Lo week bihaen, datfala pastor and waef blo hem kam joinim study wea Eliso conductim witim datfala woman wea interest. Eliso and datfala woman studyim chapter “Hope for Olketa Famili Member and Fren wea Dae,” lo buk Wanem Nao Really Samting wea Bible Teachim? Pastor hia and waef blo hem talem olketa koment tu lo study.

 Gogo tufala attendim spesol convention blo Olketa Jehovah’s Witness wea kamap lo Tbilisi, lo Georgia. Tufala tinghae tumas lo love and wan mind wea olketa Witness garem, wea hem nao olketa fasin wea tufala trae for encouragem olketa member lo church blo tufala for showimaot, bat olketa no win for duim datwan.