A B C D E F G H I J M P R S W Z

A

• Adultery.

  Long Bible, adultery hem wei wea man or woman wea marit finis duim sex witim nara man or woman wea hem no maritim.

• Altar.

  Wanfala samting wea olketa wakem wea hae, wea olketa iusim for bonem olketa sakrifaes or incense antap long hem taem olketa worshipim tru God or nara god.

• Antichrist.

  Long Greek languis disfala word hem minim “againstim Christ.” Long Bible hem minim olketa wea no biliv “Jesus hem Christ,” and no biliv Jesus hem Son bilong God wea “kamap man.” (2Jo 7) Hem savve minim tu eniwan wea sei hem nao Christ, or sei hem wakaman bilong Christ bat hem nating wakaman bilong Christ, or olketa wea no bilivim wanem Bible talem abaotem Christ.

• Aposol.

  Disfala word minim “man wea samwan sendem hem go.” Olketa main wan nao wea Bible kolem aposol hem 12-fala disaepol wea Jesus chusim for wakaman bilong hem.

• Ark bilong agreement.

  Hem datfala holy box wea stap insaed Barava Holy Rum long tent (tabernacle) and, wea bihaen, hem stap insaed long temple wea Solomon wakem. Jehovah nao talem olketa for wakem followim design bilong hem. Tufala ston wea God raetem Ten Komandment long hem nao stap insaed datfala box.

• Armageddon.

  Mining bilong disfala word hem “Maunten long Megiddo.” Armageddon hem war wea bae kamap evriwea long earth. Jesus Christ, datfala King wea Jehovah chusim, bae finisim olketa enemy bilong God long datfala war.

B

• Baptaes.

  Diswan minim for putim man or wanfala samting andanit long wata. Taem Christian baptaes long wata diswan hem wanfala saen wea showimaot hem dedicate long God long nem bilong Jesus Christ for duim wanem Jehovah God laekem. Bible story abaotem baptaes bilong John, baptaes long holy spirit, baptaes long fire, and samfala nara wei for baptaes moa.

• Barava holy rum.

  Smol rum insaed long tent (tabernacle) or temple wea olketa keepim datfala ark bilong agreement.

• Beelzebub.

  Wanfala nem for Satan, wea hem ruler bilong olketa demon.

• Bred wea holy.

  Twelvfala bred wea olketa putim long wanfala tebol long Holy rum insaed long tent (tabernacle) or temple. Evri Sabbath priest aotem old bred and putim olketa niu wan.

C

• Cherub.

  Olketa angel wea garem hae position and spesol waka. Hem difren from olketa angel wea olketa kolem seraph.

• Christ.

  Wanfala title bilong Jesus. Hem kam from Greek word wea semsem witim Hebrew word “Messiah,” or “Anointed Wan.”

• Christian.

  Olketa wea followim Christ Jesus and wea preach abaotem olketa teaching bilong Christ.

• Clay.

  Wanfala kaen graon wea soft taem hem tuwet and strong taem hem drae. Man savve sheipim clay and beikem for wakem olketa pot and brik.

D

• Demon.

  Olketa nogud spirit wea paoa bilong olketa hem winim man. Olketa angel wea no obeyim God long taem bilong Noah and wea join witim Satan for againstim Jehovah.

• Denarius.

  Wanfala silver coin long selen bilong Rome. Hevi bilong hem 3.85 gram. Hem garem piksa bilong King and hem nao selen wea olketa Jew mas givim long gavmen bilong Rome for peim tax. Taem Jesus duim ministry long earth, pei bilong pipol wea waka long planteison for 12-fala hour hem wanfala denarius.

• Devil.

  Nem bilong Satan long olketa Greek Scripture. Devil hem minim “man wea laea for spoelem nem bilong narawan.” Satan hem kasem datfala nem bikos hem main wan wea laea for mekem narawan daotem samting wea Jehovah talem and for spoelem holy nem bilong hem.

• Drink offering.

  Wine wea olketa kapsaetem antap long altar taem olketa givim olketa nara sakrifaes. Paul iusim diswan olsem tokpiksa for wei wea hem willing for helpem olketa nara Christian.

E

• Elder.

  Olketa wea lead long kongregeson. Long Revelation, hem savve minim tu olketa spirit long heven.

• Epicurus.

  Epicurus hem teachim wanfala idea wea sei pipol shud enjoyim laef and no misstim eni gud samting.

• Epilepsy.

  Wanfala sik wea savve affectim brain and mekem man hafded and samfala taem body bilong hem seksek.

F

• Fig.

  Hem frut wea soft and swit wea grow long olketa hot kantri. Hem garem staka smol seed and pipol savve draem for kaikaim. Long taem bilong Bible hem frut wea pipol barava tinghae long hem.

G

• Grape.

  Hem smol frut wea kala bilong hem green or purple wea grow long olketa bunch. Man savve kaikaim taem hem raep or draem firstaem bifor hem kaikaim. Man savve iusim for mekem wine tu.

• Gud nius.

  Diswan minim gud nius abaotem Kingdom bilong God and wei wea man savve sev sapos hem garem faith long Jesus Christ.

H

• Hae priest.

  Hem nao main wan wea go front long God for olketa pipol. Hem lukaftarem tu evri nara priest.

• Holy rum.

  Hem nao firstfala rum insaed long tent, and datfala temple. Hem big winim nara rum insaed wea olketa kolem Barava Holy Rum. Insaed long disfala rum hem lamp wea olketa wakem long gold, altar for bonem incense wea olketa wakem long gold, tebol for putim holy bred, and olketa nara samting wea olketa wakem long gold olsem olketa kap and dish.

• Holy secret.

  Hem samting wea kam from God nomoa, hem talem long taem wea hem markem, and hem talem long olketa wea hem chusim nomoa.

• Holy spirit.

  Paoa bilong God wea hem iusim for duim wanem hem laekem. God iusim holy spirit for wakem evri samting long skae, earth, and evri samting wea laef.

I

• Incense.

  Wanfala samting wea olketa bonem wea hem smel naes. Long Law bilong Moses wei for bonem incense piksarem prea bilong olketa wea faithful long God.

J

• Judgment Day.

  Wanfala taem wea olketa difren sekson, nation, and olketa man bae givim ansa long God. Maet hem taem wea God bae finisim olketa wea hem judgem finis for dae, and taem wea hem bae sevem samfala and givim olketa laef olowe.

M

• Manna.

  Main kaikai bilong olketa Israelite long 40 year wea olketa wakabaot insaed long wilderness. Jehovah duim mirakol for provaedem diswan. Evri morning olketa savve lukim diswan antap long graon. Bihaen olketa kolektem, olketa smasem and boelem or wakem cake long hem. No eni samting distaem hem barava olsem datfala manna wea Bible storyim.

• Messiah.

  Long Hebrew languis hem minim “anointed” or “anointed wan.” Long Greek languis hem minim Christ.

• Ministerial servant.

  Long Greek languis diswan hem di·aʹko·nos. Main mining bilong datfala word di·aʹko·nos hem ‘wakaman’ (servant) or ‘minister.’ From evri Christian hem wanfala ‘minister’ (wakaman) bilong God, diswan showimaot samfala taem datfala word hem garem spesol mining. Hem savve minim olketa man wea garem waka for helpem olketa elder insaed long kongregeson.

• Morning star.

  Hem last star for kamap long east bifor sun hem kamap, wea showimaot niu day hem start.

• Myrrh.

  Juice wea smel naes and wea kam from olketa smol tree wea garem nila. Timba and skin bilong olketa tree hia barava smel strong.

P

• Pasova.

  Hem celebration wea olketa Israelite start for duim long naet bifor olketa lusim Egypt. Hem for celebratem wei wea Jehovah sevem olketa from Egypt and no killim dae firstborn bilong olketa taem Jehovah finisim evri firstborn bilong Egypt. Firstfala Pasova hem long taem bilong full moon, long mek-14 day bilong Abib (wea bihaen olketa kolem Nisan) long year 1513 B.C.E. Bihaen, olketa celebratem diswan wantaem evri year.

• Pentecost.

  Wanfala nem long olketa Christian Greek Scripture for taem wea olketa celebratem harvest (Ex 23:16). Olketa celebratem diswan long mek-50 day (Pentecost hem minim “Mek-fifti [Day]”) bihaen Nisan 16. Long calendar bilong olketa Jew diswan hem long Sivan 6.

• Pharaoh.

  Title for olketa king long Egypt.

• Pharisee.

  Olketa bigman bilong wanfala sekson bilong Jew religion wea stap long first century C.E. Samfala Pharisee olketa member bilong Hae Kot bilong olketa Jew. Olketa barava strong for followim kastom bilong olketa Jew wea olketa addim go long law bilong Moses.

• Priest.

  Olketa priest stand for God. Olketa teachim pipol abaotem God and olketa law bilong hem. Olketa givim tu olketa sakrifaes long God for olketa pipol and prea for olketa tu.

• Psalm.

  Hem singsing for praisem God. Olketa wea worshipim God singim olketa psalm followim music. Olketa duim diswan tu taem olketa hipap for worshipim Jehovah God long temple long Jerusalem.

R

• Ransom.

  Diswan hem price for baem bak wanfala man or mekem hem free from wanfala samting wea hem mas duim or free from wanfala nogud samting. Price olsem mas semsem witim nara samting, and hem mas changem bak or exchangem samting.

• Repent.

  For “repent” hem minim “man changem tingting abaotem samting wea hem duim (or ting for duim), from hem feel sorre or feel nogud abaotem datwan.” Long Bible, “repent” minim man changem tingting bilong hem and barava feel sorre for wei bilong hem bifor, for rong samting wea hem duim, or for samting wea hem shud duim bat hem no duim.

S

• Sabbath.

  Sabbath hem kam from wanfala Hebrew word wea minim “rest or stop for duim samting.” Law bilong Moses sei wanfala day evri week, samfala day moa insaed long year, witim mek-seven year and mek-fifti year hem olketa Sabbath. Sabbath day bilong olketa Jew, wea hem mek-seven day long week, hem start taem sun go daon long Friday go kasem taem sun go daon long Saturday. Hem day wea God markem for olketa rest from waka bilong olketa. Jehovah markem Sabbath olsem wanfala saen midolwan long hem and olketa son bilong Israel. Bat long taem bilong olketa Christian, pipol mekem staka nara rul moa abaotem Sabbath.

• Sadducee.

  Olketa bigman bilong wanfala sekson bilong Jew religion wea join witim olketa priest. Samfala long olketa member bilong Hae Kot bilong olketa Jew.

• Sakrifaes wea olketa bonem.

  Hem sakrifaes wea pipol seleva disaed for givim long God. Olketa givim full animal and no tekem eni part for olketa seleva. Animal wea olketa savve givim nao hem buluka, man sheepsheep, man goat, olketa big kurukuru, or olketa young wan.

• Sanhedrin.

  Hae Kot bilong olketa Jew long Jerusalem. Long taem bilong Jesus, disfala hae kot garem seventi-wan member. Samfala member nao hem hae priest and samfala narawan wea hae priest bifor, witim tu, samfala member bilong famili bilong olketa hae priest, olketa elder, and samfala man wea teachim law. Disfala kot garem paoa saed long community, gavman, and religion.

• Satan.

  Long Hebrew languis “Satan” hem minim “man for againstim narawan.” Hem main enemy bilong God.

• Sinagog.

  Disfala word hem minim “hipap,” bat long plande scripture diswan hem minim ples wea olketa Jew hipap for prea and readim olketa Holy Raeting.

• Son bilong man.

  Disfala toktok “son bilong man” hem stap samting olsem 80 taem long olketa Gospel, and evritaem hem minim Jesus Christ. Diswan showimaot Jesus bae mekem datfala profesi long Daniel 7:13, 14 kamap tru. Olketa Hebrew Scripture kolem Ezekiel and Daniel “son bilong man” tu, wea showimaot tufala man nomoa. Diswan showimaot man wea givim message long olketa, wea hem nao Barava Haefala God, hem winim nao Ezekiel and Daniel. Wei wea Jesus kolem hemseleva “son bilong man” long olketa Gospel showimaot son bilong God hem kamap wanfala man long earth, no wanfala angel wea tekem body bilong man.

• Spiritism.

  Greek word for “Spiritism” (duim samting wea join witim devildevil), hem phar·ma·kiʹa, wea minim wei for iusim olketa drug. Diswan hem bikos pipol long bifor iusim olketa drug for duim magic and kasem paoa from olketa demon. Insaed olketa samting wea join witim devildevil hem wei for bilivim olketa wea dae finis garem spirit wea no savve dae wea savve story witim olketa wea laef. Olketa savve iusim kastom man wea story witim olketa demon for duim diswan.

W

• World.

  Samfala taem long English hem sei “system of things,” wea long Greek languis hem “aion.” “Aion” savve minim “longfala taem.” Hem savve minim tu “samting wea pipol duim and wei bilong olketa long wanfala taem.” Long samfala taem, ‘world’ hem transleison for datfala Greek word koʹsmos. Datfala word hem savve minim (1) “olketa man nomoa,” or (2) “olketa samting wea man duim,” (wea plande taem hem semsem witim datfala Greek word ai·onʹ), or (3) “olketa wea againstim God.”

Z

• Zeno.

  Zeno hem wanfala savveman wea sei pipol shud no showimaot feeling bilong olketa nomata olketa safa or hapi. Pipol wea followim teaching bilong Zeno garem disfala nem “Stoics.”