1 Chronicles 13:1-14
13 So David story witim olketa komanda blo wan thousand man, and olketa komanda blo wan handred man and witim evri leader.
2 Then David sei lo evriwan lo Israel: “Sapos hem olraet witim iufala and sapos God blo iumi Jehovah hapi lo hem, iumi sendem toktok go lo olketa nara brata blo iumi lo evri ples lo Israel. And tu, lo olketa priest and olketa Levite wea stap lo olketa taon* blo olketa, for kam and joinim iumi.
3 And iumi go tekem kam bak Ark blo God blo iumi.” Hem bikos lo taem blo Saul, olketa Israelite nating lukaftarem datfala ark.
4 Evriwan lo Israel olketa agree for duim datwan, bikos lo tingting blo olketa hem stret samting for duim.
5 So David hipimap kam evriwan lo Israel, start lo river* lo Egypt go kasem kam Lebo-hamath,* for tekem kam bak Ark blo tru God from Kiriath-jearim.
6 David and evriwan lo Israel go ap lo Baalah, lo Kiriath-jearim, wea hem lo land lo Judah, for tekem kam bak Ark blo tru God, Jehovah, wea sidaon antap* lo olketa cherub, wea pipol iusim for singaot lo nem blo hem.
7 Bat olketa putim Ark blo tru God antap lo wanfala niu wagon and tekem kam from haos blo Abinadab, and Uzzah and Ahio nao leadim olketa buluka wea pullim datfala wagon.
8 David and evriwan lo Israel barava celebrate front lo tru God, olketa singsing and pleim olketa harp, olketa string instrument, olketa tambourine, olketa cymbal, and olketa trumpet.
9 Bat taem olketa kasem ples for aotem wheat from skin blo hem lo Chidon, olketa buluka hia klosap mekem ark hem foldaon, so Uzzah kwiktaem grabim datfala Ark.
10 Datwan mekem Jehovah barava kros lo Uzzah, and God killim hem dae bikos hem grabim datfala Ark, and hem dae nao front lo eye blo God.
11 Bat David hem kros* bikos Jehovah killim dae Uzzah. Kam kasem distaem olketa nemim datfala ples lo Perez-uzzah.*
12 So lo datfala day David fraet lo tru God and hem sei: “Hao nao bae mi tekem kam Ark blo tru God for kam lo mi?”
13 David no tekem go Ark lo Taon blo David wea hem stap lo hem, bat hem tekem ark hia go lo haos blo Obed-edom datfala Gittite.
14 Datfala Ark blo tru God stap witim famili blo Obed-edom, lo haos blo hem for thrifala month, and Jehovah gohed blessim famili blo Obed-edom and evri samting wea hem garem.
Olketa footnote
^ Heb., “taon witim olketa ples for olketa animal kaikai lo hem.”
^ Or, “lo Shihor.”
^ Or, “lo border blo Hamath.”
^ Or maet, “between.”
^ Or, “feel nogud.”
^ Mining blo hem “Judgment Againstim Uzzah.”
