1 Chronicles 14:1-17
14 King Hiram blo Tyre sendem samfala man go lo David, witim olketa timba blo cedar tree, olketa man wea savve wakem samting lo ston,* and olketa carpenter for buildim haos* for hem.
2 And David luksavve Jehovah nao mekem hem for kamap king ovarem Israel, bikos kingdom blo hem kasem bigfala praise. God duim diswan bikos hem tingim pipol blo hem Israel.
3 Taem David lo Jerusalem, hem maritim staka woman moa, and David garem staka son and dota moa.
4 Diswan nao nem blo olketa pikinini blo David wea born lo Jerusalem: Shammua, Shobab, Nathan, Solomon,
5 Ibhar, Elishua, Elpelet,
6 Nogah, Nepheg, Japhia,
7 Elishama, Beeliada, and Eliphelet.
8 Taem olketa Philistine herem dat olketa anointim David for king ovarem full Israel, evriwan lo Philistine go for faet againstim David. Taem David herem datwan, hem go aot for faet againstim olketa.
9 Then olketa Philistine kam and gohed for attakim pipol wea stap lo Valley* lo Rephaim.
10 David askem God olsem: “Hao, bae mi go for faet againstim olketa Philistine? Hao, bae iu helpem mi for winim olketa?” So Jehovah sei lo hem: “Iu go, and bae mi givim olketa lo hand blo iu.”
11 So David go ap lo Baal-perazim, and hem killim olketa dae lo there. And David hem sei: “Tru God hem iusim hand blo mi for distroem olketa enemy blo mi, olsem wata hem brekem wanfala wall.” Dastawe olketa nemim datfala ples lo Baal-perazim.*
12 Olketa Philistine lusim olketa god blo olketa lo there, and taem David givim komand lo olketa man blo hem, olketa bonem olketa god hia lo fire.
13 Bihaen, olketa Philistine kam bak moa for attakim pipol wea stap lo valley.*
14 David askem God moa, bat tru God sei lo hem: “Iu no go ap stret bihaen lo olketa, bat iu go raon and kam bihaen lo olketa, and kam againstim olketa front lo olketa baca tree.
15 And taem iu herem noes antap lo olketa baca tree olsem pipol march, stretawe iu attakim olketa, bikos tru God bae go firstaem lo iu for killim dae army blo olketa Philistine.”
16 So David duim olsem followim hao tru God komandim hem, and olketa killim dae army blo Philistine start lo Gibeon go kasem Gezer.
17 And nius abaotem David spred lo evri ples, and Jehovah mekem evri nation for fraet lo David.
Olketa footnote
^ Or, “olketa man for buildim wall.”
^ Or, “palace.”
^ Or, “Flat Ples.”
^ Mining blo hem “Bigman for Brekem Daon Samting.”
^ Or, “flat ples.”
