1 Chronicles 20:1-8
20 Lo start blo year,* taem olketa king savve gogo for faet, Joab leadim wanfala army for olketa go and spoelem land blo olketa Ammonite. Hem kam raonem taon lo Rabbah, and lo datfala taem David stap nomoa lo Jerusalem. And Joab attakim Rabbah and distroem.
2 Then David tekem kraon wea stap lo hed blo Malcam,* and olketa putim kraon hia lo hed blo David. Kraon hia hevi blo hem wanfala talent* blo gold, and hem garem staka spesol ston lo hem. And David tekem tu staka samting from datfala taon.
3 And hem tekem olketa pipol wea stap lo datfala taon, and mekem olketa for waka for katem olketa ston, and for waka witim olketa sharp iron, and witim olketa ax. Datwan nao samting wea David duim lo pipol blo evri taon blo olketa Ammonite. Then David and evri soldia go bak lo Jerusalem.
4 Bihaen datwan, olketa faet witim olketa Philistine lo Gezer. And lo datfala taem, Sibbecai datfala Hushathite killim dae Sippai, wea hem man lo laen blo Rephaim, and olketa winim olketa Philistine.
5 Then olketa faet moa witim olketa Philistine, and Elhanan, son blo Jair killim dae Lahmi, brata blo Goliath datfala Gittite. Handol blo spia blo hem olsem timba beam wea man for weavim kaleko iusim.
6 Faet kamap moa lo Gath, and lo there hem garem wanfala big maeti man. Hem garem 6-fala finger lo each hand, and 6-fala toe lo each leg, so evriwan tugeta hem 24, and hem tu hem wanfala lo laen blo Rephaim.
7 Hem gohed for tok spoelem olketa lo Israel. So Jonathan, son blo Shimea, wea hem brata blo David, killim hem dae.
8 Olketa man hia olketa kam from laen blo Rephaim lo Gath, and David and olketa servant blo hem nao killim olketa dae.
Olketa footnote
^ Diswan hem taem blo spring season. Lukim App. B15.
^ Wanfala idol god blo olketa Ammonite.
^ Wanfala talent equals 34.2 kg. Lukim App. B14.
