1 Chronicles 23:1-32
23 Taem David hem barava olo and klosap lo end lo laef* blo hem, hem mekem son blo hem Solomon for king ovarem Israel.
2 Then David hem hipimap evri leader lo Israel, olketa priest, and olketa Levite.
3 Olketa kaontem olketa Levite wea 30 years old and go ap. Olketa kaontem each wan, and namba blo olketa hem kasem 38,000 man.
4 From olketa hia, 24,000 nao supervisor for lukaftarem waka lo haos blo Jehovah, and 6,000 hem olketa officer and olketa judge,
5 and 4,000 hem for gaedem gate, and 4,000 hem for singim praise lo Jehovah lo olketa instrument wea David hem sei, “Mi wakem olketa for givim praise lo God.”
6 Then David organizem* olketa lo olketa grup followim olketa son blo Levi, wea hem Gershon, Kohath, and Merari.
7 From laen blo Gershon, hem Ladan and Shimei.
8 Olketa son blo Ladan, hem Jehiel wea hem hed, Zetham and Joel, olketa hem thrifala.
9 Olketa son blo Shimei hem Shelomoth, Haziel, and Haran, olketa hem thrifala. Olketa hia hem olketa hed lo olketa famili laen* wea kam from Ladan.
10 And olketa son blo Shimei hem Jahath, Zina, Jeush, and Beriah. Fofala hia hem olketa son blo Shimei.
11 Jahath hem nao hed and Zizah hem second lo hem. And from Jeush and Beriah no garem staka son, olketa kaontem tufala olsem wanfala famili laen* nomoa and for lukaftarem wanfala waka.
12 Kohath hem garem fofala son, olketa nao Amram, Izhar, Hebron, and Uzziel.
13 Olketa son blo Amram hem Aaron and Moses. Bat olketa markem Aaron nao for mekem holy datfala Most Holy Rum, hem and olketa son blo hem for offerim olketa sakrifaes front lo Jehovah, for duim waka for hem, and for talemaot olketa blessing lo nem blo hem for olowe.
14 And Moses, man blo tru God, olketa son blo hem nem blo olketa stap witim olketa narawan lo tribe blo Levi.
15 Olketa son blo Moses hem Gershom and Eliezer.
16 Lo olketa son blo Gershom, Shebuel nao hem hed.
17 Lo famili laen* blo Eliezer, Rehabiah nao hem hed. Eliezer no garem moa eni nara son, bat Rehabiah nao garem staka son.
18 Lo olketa son blo Izhar, Shelomith nao hem hed.
19 Lo olketa son blo Hebron, Jeriah nao hem hed, mek-tu hem Amariah, mek-thri hem Jahaziel, and mek-foa hem Jekameam.
20 Lo olketa son blo Uzziel, Micah nao hem hed and mek-tu hem Isshiah.
21 Olketa son blo Merari, hem Mahli and Mushi. Olketa son blo Mahli, hem Eleazar and Kish.
22 Eleazar hem dae, and hem no garem eni son, hem garem nomoa olketa gele. So olketa son blo Kish, olketa relative* blo olketa nao maritim olketa gele hia.
23 Mushi hem garem thrifala son, olketa nao Mahli, Eder, and Jeremoth.
24 Olketa hia hem olketa son blo Levi wea olketa kaontem and registerim olketa followim laen blo dadi blo olketa, wea olketa nao hed lo olketa famili laen* blo olketa. Olketa raetem nem blo olketa wea age blo olketa start from 20 years old and go ap, for duim waka lo haos blo Jehovah.
25 David hem bin sei: “Jehovah, God blo Israel hem mekem pipol blo hem stap lo peace, and hem bae stap lo Jerusalem for olowe.
26 And tu, olketa Levite bae no karem datfala tabernacle or eni samting wea olketa savve iusim lo tabernacle hia.”
27 Followim datfala last instruction blo David, olketa Levite wea olketa 20 years old and go ap nomoa olketa kaontem.
28 Waka blo olketa hem for helpem olketa son blo Aaron for duim waka lo haos blo Jehovah, for lukaftarem olketa courtyard, olketa dining rum, for klinim evri holy samting, and for duim eni nara waka wea olketa need for duim lo haos blo tru God.
29 Olketa help for redyim layer bred,* best flour for grain offering,* olketa flat bred wea no garem yeast, olketa cake wea olketa kukim lo frying pan, dough wea mix witim oil, and for weim evri samting and size blo olketa.
30 And evri morning olketa savve standap for talem thankiu and for praisem Jehovah, and olketa duim sem samting tu lo evening.
31 Olketa help tu for redyim burnt offering lo enitaem wea olketa offerim lo Jehovah lo olketa Sabbath, olketa niu moon, and lo taem blo olketa festival. Olketa duim olsem followim wanem olketa raetem insaed lo law, and olketa duim datwan evritaem front lo Jehovah.
32 And tu, olketa garem responsibility for lukaftarem tent for meeting, lukaftarem holy ples, and lukaftarem olketa brata blo olketa, wea hem olketa son blo Aaron, for olketa duim waka lo haos blo Jehovah.
Olketa footnote
^ Heb., “olo and satisfae lo laef.”
^ Or, “divaedem.”
^ Heb., “olketa son.”
^ Heb., “olketa brata.”
^ Diswan hem showbred. Lukim “Showbred” lo Dictionary.
^ Lukim “Grain Offering” lo Dictionary.
